Magazine Oro Otụkde Esịt

ẸMEMỊN̄ anana-ibat magazine ke ofụri ererimbot ndiyụhọ udọn̄ andikot nyom ntọt m̀mê inemesịt. 

Nso inam magazine emi afo osụk akamade mi ke ubọk edi ata isio isio? Leta oro etienede mi, emi ọfis n̄kọk itieutom Watch Tower Society ke Germany ọkọbọde, ekeme ndinọ ibọrọ:

“Ẹsọsọn̄ọ etieti, ndima nditọete, ke ukeme ye utom mbufo. Ke ini ami ye nditọiren mi iba ikọnyọn̄de mbonoesop idi, okposụkedi n̄kanika ekedide ebe usụkkiet okoneyo, ami n̄kenyene ndikpan̄ utọn̄ nnọ obufa Enyọn̄-Ukpeme [ke kaset]. Nte n̄keyetde usan, mma ntọn̄ọ ndikpan̄ utọn̄ n̄kop akpa ibuotikọ ukpepn̄kpọ (April 1, 1995). Mma n̄kere ke n̄kpenyene ndikpan̄ utọn̄ nnọ enye ini kiet efen, ntre mma ntre se n̄kanamde ke itie utem udia nnyụn̄ ntiene tape n̄kot ibuotikọ oro [“Afo Ọmọsọn̄ Urua ke Enyịn Abasi!”] ke Enyọn̄-Ukpeme oro. Enye ama otụk mi esịt, akpan akpan ọyọhọ ikpehe ekikere inan̄ ye ition. Ndien ekem mmọn̄eyet ama ọtọn̄ọ ndisiaha mi—edi ikebịghike. Mmọkọm Jehovah nte ke ami mmodu uwem nnyụn̄ ndu ke otu ikọt esie ye nte ke ami, ọkọrọ ye ediwak mbon en̄wen, imekeme ndinam ẹdiọn̄ọ enyịn̄ esie. Ke akpanikọ ufọn idụhe owo ndikere ke imọ iwọrọke n̄kpọ. Spirit Jehovah odu ye ikọt esie. Akpakam kpukpru nnyịn iyọ inyụn̄ isọn̄ọ ida ke mbuọtidem, nte owo kiet. Ye ima Christian, ami eyenete mbufo ke mbuọtidem.”

Enyọn̄-Ukpeme esinọ se ikande ntọt. Enye esitụk esịt mme andikot enye onyụn̄ oyụhọ udọn̄ mmọ kaban̄a udia eke spirit ye ekemini nsịnudọn̄. Ih, Enyọn̄-Ukpeme ọmọnọ “udia ke edikem ini.”—Matthew 24:45.