Mbụk Ukwọ Ọsọn̄ọ Uwetn̄kpọ Bible

UKWỌ ofụri ererimbot eke eyo Noah edi mbụk akpanikọ. Ẹkụt nsio nsio ekikere ẹban̄ade mbụk emi ke n̄ke ediwak nsio nsio idụt ke ererimbot. Ke idụt Chad ke Africa, ekpụk Moussaye anam Ukwọ an̄wan̄a ke usụn̄ emi:

‘Ini kiet ko-o, ubon kiet ama odu ke idụt kiet emi oyomde usụn̄ etieti. Usen kiet, eka ubon emi ama oyom ndinam usọrọ nnọ mbonima esie. Ntre enye ama ada udụn̄ ye eyenudụn̄ nditịm ibokpot. Ke ini oro ikpaenyọn̄ ama esikpere isọn̄ akan nte ekperede idahaemi. Ke akpanikọ, edieke afo emenerede ubọk fo ke enyọn̄, afo emekeme nditụk enye. Enye ama otịm ibokpot oro ke ofụri odudu esie, ndien ibokpot oro enye eketịmde ama ọdọrọ usọp usọp. Edi nte enye eketịmde n̄kpọ, n̄wan emi ke idue enyịn ama enen̄ede emenede eyenudụn̄ ke enyọn̄, ndien enye ama etịbi odudu ke ikpaenyọn̄! Ndondo oro, ata ediwak mmọn̄ ama ọtọn̄ọ ndiduọhọ ke isọn̄. Emi ikedịghe ata edịm. Enye ama edep ke uwemeyo itiaba ye okoneyo itiaba tutu mmọn̄ ofụk ofụri isọn̄. Nte edịm ekedepde, ikpaenyọn̄ ama ọtọn̄ọ ndidaha ndọk tutu enye osịm ebiet emi enye odude idahaemi—ebiet emi owo mîkemeke ndisịm. Nso nsobo ke emi ekedi ntem ọnọ ubonowo! Tọn̄ọde ke ini oro, nnyịn inyeneke aba ifet nditụk ikpaenyọn̄ ke ubọk nnyịn.’

Nte enemde, ẹkeme ndikụt mme mbụk eset ẹtịn̄de n̄kpọ ẹban̄a ukwọ ofụri ererimbot ke ofụri ererimbot. Mme amanaisọn̄ ke akamba ubak isọn̄ America ọkọrọ ye mme Amanaisọn̄ ke Australia kpukpru ẹnyene mbụk ẹban̄ade enye. Nte ẹnọde ofụri mbụk oro ekeme ndikpụhọde, edi ediwak mbụk ẹsịne ekikere oro nte ke mmọn̄ ama ofụk isọn̄ ndien ibat ibat owo ẹkebọhọ ke ubom oro owo ọkọkọn̄de. Ibuot nneme emi nditara nsuana adian nsọn̄ọ ke akpanikọ oro nte ke Ukwọ ofụri ererimbot ama etịbe, nte ẹbụkde ke Bible.—Genesis 7:11-20.