“Kûbịn Mmọ!”

“EDIEKE owo kiet, m̀mê iba, ke otu Mme Ntiense Jehovah ẹkọn̄de usụn̄ufọk fo, kûbịn mmọ!” ntre ke Corriere della Sera ọdọhọ. N̄wedmbụk oro eketịn̄ aban̄a n̄kpọntịbe oro akadade itie ke Treviso, edere edere Italy, emi anam mbubehe kiet ekesịnde idem ke itiendịk editaba se ibede miliọn lire kiet (se iwakde ikan $600, U.S.) ke ntak ekebịnde Mme Ntiense iba oro ẹkewahade edem esie.

Nte n̄wedmbụk oro ọdọhọde, Mme Ntiense iba oro ẹma ẹtịn̄ mbon ẹmi mmọ ẹdide ẹnọ eren oro ye mme ikọ ẹmi: “Mfịn edi eti usen ọnọ fi. Nnyịn idi Mme Ntiense Jehovah, ndien nnyịn imenyene ọsọn̄urua n̄kpọ ndinọ fi.” Ke oro, ọsọn̄-ido anam mbubehe oro ama eberi usụn̄, iyakke mmọ ẹkụre etop mmọ.

Ke ekpekedide eren oro ama akpan̄ utọn̄, enye ọkpọkọfiọk ete ke Mme Ntiense oro ẹkewaha ufọk esie ndikayak ekpatokụk esie, emi mmọ ẹkekụtde odorode ke n̄kpọitie itie nduọkodudu, nnọ enye. Ntre Mme Ntiense oro ikekemeke ndinam n̄kpọ efen n̄kan ndimen ekpatokụk oro ye se ikesịnede ke esịt n̄ka itieutom mme bodisi emi ekekperede akan. Ke ndan̄nsiere, mme bodisi ẹma ẹda enye ẹkeyak ẹnọ nnennen andinyene.

“Ke owo efen okpokokụtde idemesie ke idaha [Mme Ntiense] iba oro ẹkenyenede ndiọkiso mi,” nte Il Gazzettino di Treviso ọkọdọhọde, “ekeme ndidi enye . . . akpakada ediwak okụk oro ekesịnede ke ekpatokụk oro. Edi idịghe Mme Ntiense Jehovah, ẹmi ẹnyenede ndinam akpanikọ ofụri ofụri.”

Nso inụk Mme Ntiense Jehovah “ndinam akpanikọ ofụri ofụri”? Edi ima oro mmọ ẹnyenede ẹnọ Abasi ye mbọhọidụn̄, ke n̄kemuyo ye mme ukpepn̄kpọ Jesus Christ. (Matthew 22:37-39) Ntak edi oro n̄ko Mme Ntiense Jehovah ẹsan̄ade ke ufọk ke ufọk nditan̄a eti mbụk aban̄ade utịbe utịbe “obufa isọn̄” emi Jehovah Abasi ọn̄wọn̄ọde. Utọ etop idotenyịn oro enen̄ede ọsọn̄ urua akan inyene obụkidem ekededi!—2 Peter 3:13.