Ntọt M’ọkwọrọ Obio Ubọn̄
‘Ẹma Ẹberede Akamba Usụn̄ Oro Adade Osịm Utom’ ke Cuba
APOSTLE Paul ekedi n̄wọrọnda ọkwọrọ eti mbụk Obio Ubọn̄ Abasi. Enye ama ada kpukpru ifet oro ẹkebererede ndibuana ye mmọ en̄wen mme un̄wọn̄ọ Andibot ẹban̄ade nsinsi uwem emi okopitem ubonowo ẹdinyenede. Ke adan̄aemi akade ekese Ephesus eset, Paul ama okụt mbufa idaha oro edinọde enye ifet ndin̄wam mme owo efen efen. Enye ọkọdọhọ ete: “Nyedu ke Ephesus . . . koro ẹma ẹberede usụn̄ akamba ẹnọ mi ndinam akwa utom do.”—1 Corinth 16:8, 9.
Mme Ntiense Jehovah ke Cuba ẹkụt idemmọ n̄ko ke mbufa idaha. Okposụkedi ukara mîsịnke mmọ enyịn̄ ke n̄wed kan̄a, Mme Ntiense ẹkeme ndibuana idotenyịn Bible mmọ idahaemi ye ekemmọ mbon idụt mmọ an̄wan̄wa. Ndondo emi ukara Cuba owụt ọkpọsọn̄ udọn̄ ndiyak nsio nsio otu ido ukpono ẹnam n̄kpọ ifụre ifụre. Castro, adaibuot ukara, ama asiak Mme Ntiense Jehovah an̄wan̄wa nte otu ido ukpono kiet emi ukara Cuba enyenede itie ebuana ọfọnde idahaemi.
Obufa idaha emi emeberede ‘akamba usụn̄ oro adade osịm utom’ ọnọ Mme Ntiense. Ke uwụtn̄kpọ, Mme Ntiense Jehovah ke ndondo emi ẹma ẹberede ọfis ke Cuba, emi an̄wamde mmọ nditịm utom ukwọrọikọ mmọ ke idụt oro. Se iwakde ikan Mme Ntiense 65,000 ke ẹn̄wam mme owo ndikpep nnyụn̄ mfiọk Bible. Mmọ ẹkama mme n̄wed Bible, utọ nte mme magazine Enyọn̄-Ukpeme ye Awake! Ediwak mbon Cuba oro ẹnyenede eti esịt ke ẹbọ ufọn ẹto edikpep Bible ye Mme Ntiense Jehovah.
Mme Ntiense n̄ko ke ẹnịm mme mbonoesop mmọ kpukpru ini ke n̄kpri otu ke ofụri isuo oro. Ndusụk ini mmọ ẹsikam ẹkop inemesịt ke ifet ẹnyenede ndinịm ikpọ mbono ke mme otu oro ẹsisịnede n̄kpọ nte owo 150. Mmọ ẹnen̄ede ẹwụt esịtekọm ke unyịme oro mmọ ẹnyenede ẹto ikpọ owo ukara Cuba, emi ọnọde mmọ ifet edisop idem ye nditọete mmọ iren ye iban eke spirit, ẹkwọde itoro ẹnọ Abasi, ẹnyụn̄ ẹbọn̄de akam ọtọkiet.
Ndondo emi ẹma ẹnịm Mbono District “Mbak Abasi” ke se iwakde ikan utịm ike 1,000 ke n̄kpasịp utịturua ita kpọt. Ntọt kiet ọdọhọ ete ke “ndutịm, eti usụn̄ unam n̄kpọ, ye emem” ẹma ẹdu ke kpukpru mbono. Ikpọ owo ukara ẹma ẹkọm Mme Ntiense ke n̄kpọ emi.
Ke ofụri ererimbot, mme ata Christian ẹdomo ndinam ewụhọ oro Abasi ọnọde mmọ ete ẹkwọrọ eti mbụk Obio Ubọn̄ Abasi. Ke ukem ini oro, mmọ ẹdomo ndimụm emem emem itie ebuana ye ikpọ owo ukara n̄kama. (Titus 3:1) Mme Ntiense Jehovah ẹtiene item apostle Paul, emi ekewetde ete: “Ke akpa itie ndien, mmeteme nte ẹnam n̄kpe-ubọk, ẹnyụn̄ ẹbọn̄ akam, ẹnyụn̄ ẹben̄e eben̄e, ẹnyụn̄ ẹnọ ekọm, ẹban̄a kpukpru owo; ẹban̄a ndidem ye kpukpru mmọ ẹmi ẹdude ke ikpọ itie; man nnyịn idu uwem ifụre ye emem, ke kpukpru uten̄e ye eti ido.”—1 Timothy 2:1, 2.