Mme Mbụme Ẹtode Mme Andikot
Nte nnyịn imekeme ndidọhọ nte ke mme asan̄autom Abasi ẹmi ẹnyenede idotenyịn eke isọn̄ ẹnyene ukem spirit Abasi nte mme Christian ẹmi ẹyetde aran ke spirit?
Emi idịghe obufa mbụme. Ẹma ẹbọrọ ukem mbụme emi ke “Mme Mbụme Ẹtode Mme Andikot” ke Enyọn̄-Ukpeme (Ikọmbakara) eke April 15, 1952. Ediwak owo ẹmekabade ẹdi Mme Ntiense toto ke ini oro, ke ntre nnyịn imekeme ndifiak n̄kere mban̄a mbụme emi ndien ke ndinam ntre, ifiak idụn̄ọde se uwetn̄kpọ oro ekebemde iso eketịn̄de.
Nte ata akpan n̄kpọ, ibọrọ edi, ih, mme anam-akpanikọ nditọete iren ye iban ẹdude ke otu mme erọn̄ en̄wen ẹkeme ndibuana ukem ukem ye mbon oro ẹyetde aran ke ndibọ edisana spirit Abasi.—John 10:16.
Emi, nte ededi, iwọrọke ite ke spirit anam utom ke ukem usụn̄ ye kpukpru owo. Fiak kere ban̄a mme anam-akpanikọ asan̄autom mbemiso eyo mme Christian, emi ke akpanikọ ẹkebọde spirit Abasi. Ye odudu otode spirit, ndusụk ke otu mmọ ẹma ẹwot mme enyene-ndịk unam, ẹkọk mbon udọn̄ọ, idem ẹnam mme akpan̄kpa ẹset. Ndien mmọ ẹma ẹyom spirit ndida n̄wet mme n̄wed odudu spirit eke Bible. (Judges 13:24, 25; 14:5, 6; 1 Ndidem 17:17-24; 2 Ndidem 4:17-37; 5:1-14) Enyọn̄-Ukpeme oro ọkọdọhọ: “Okposụkedi mîdịghe eke otu oro ẹyetde aran, mmọ ẹma ẹyọhọ ye edisana spirit.”
Ke usụn̄ efen, kere ban̄a iren ye iban oro ẹkeyetde aran ke edisana spirit ke akpa isua ikie, oro ẹkekabarede ẹdi nditọ Abasi eke spirit ẹnyenede idotenyịn eke heaven. Ẹma ẹyet kpukpru mmọ aran, edi oro iwọrọke ite ke oro ebede spirit akanam utom ke idem kpukpru mmọ ke ukem usụn̄. Oro an̄wan̄a oto 1 Corinth ibuot 12. Do apostle Paul ama eneme aban̄a mme enọ eke spirit. Nnyịn ikot ke 1Co 12 ufan̄ikọ 8, 9, ye 11 ite: “Ẹnọ owo kiet ikọ ọniọn̄, oto ke Spirit; ẹnyụn̄ ẹnọ enye eken ikọ ifiọk, kpa ke Spirit oro; ẹnọ owo efen mbuọtidem, ke Spirit oro; ẹnyụn̄ ẹnọ enye eken ukeme ukọk-udọn̄ọ, kpa ke Spirit kiet oro . . . Edi kpukpru orụk edinam oro ke edi Spirit kiet anam; Enye edeme ọnọ kpukpru owo kiet kiet nte Enye amade.”
Ke edide akpan n̄kpọ, idịghe kpukpru mbon oro ẹkeyetde aran ko ke ini oro ẹkenyene mme ẹnọ eke spirit. Ke 1 Corinth ibuot 14, Paul ama asiak mbonoesop kiet emi owo kiet ekenyenede enọ edisem usem, edi owo ndomokiet ikodụhe emi ekenyenede enọ edikabade. Kpa ye oro, ke ndusụk ini ke mbemiso, ẹma ẹyet owo mmọ kiet kiet aran ke spirit. Nte okpowụt ifiọk ndikere ke eyenete emi enyenede enọ edisem usem ama enyene spirit akan mmọ eken oro ẹkedude? Baba. Owo ikosụhọkede mbon eken oro ẹkeyetde aran itie, nte n̄kpọ edide Bible ikan̄wan̄ake mmọ ọkọrọ ye enyeoro m̀mê ndinyụn̄ ndi nte ke mmọ ikekemeke ndisobo mme idomo. Spirit akanam n̄kpọ ke san̄asan̄a usụn̄ ke idem eyenete oro ekekemede ndisem usem. Edi, ama oyom enye ye mmọ ẹkpere Jehovah ẹnyụn̄ “ẹyọhọ ye spirit,” nte Paul ekewetde.—Ephesus 5:18.
Kaban̄a mbon oro ẹdide nsụhọ oro ẹyetde aran mfịn, mmọ ke akpanikọ ẹmebọ spirit Abasi. Ama anam utom ini kiet ke idem mmọ ke san̄asan̄a usụn̄—kpa ini oro ẹkeyetde mmọ aran ẹnyụn̄ ẹbonde mmọ nte nditọ eke spirit. Ke oro ebede mmọ ‘ẹkaiso ndiyọhọ ye spirit,’ ẹnyenede un̄wam esie ke ini mmọ ẹyomde Bible otịm an̄wan̄a mmọ, ẹdade iso ke utom ukwọrọikọ, m̀mê ẹsobode mme idomo—edide ọkpọkpọ m̀mê eke esop.
Okposụkedi mbon oro ẹdide eke “mme erọn̄ en̄wen” mînyeneke ifiọk iban̄a nte ẹyetde owo aran, mmọ ẹbọ spirit ke mme usụn̄ en̄wen. Enyọn̄-Ukpeme (Ikọmbakara) eke April 15, 1952, ọkọdọhọ ete:
“‘Mme erọn̄ en̄wen’ mfịn ẹnam ukem utom ukwọrọikọ oro nsụhọ ẹnamde, ke mme ukem idaha oro ẹtiede idomo idomo, ẹnyụn̄ ẹwụt ukem edinam akpanikọ ye nsọn̄ọnda. Mmọ ẹdia n̄kpọ ke ukem okpokoro eke spirit, ẹdia ukem udia, ẹkpep ukem akpanikọ. Ẹdide otu eke isọn̄, ye idotenyịn eke isọn̄ ye ọkpọsọn̄ udọn̄ idemowo ke mme n̄kpọ eke isọn̄, mmọ ẹkeme nditịm nnyene udọn̄ ke mme itien̄wed Abasi oro ẹnyenede ebuana ye mme idaha ẹmi ẹdidude ke isọn̄ ke obufa ererimbot; ke adan̄aemi nsụhọ oro ẹyetde aran, ẹmi ẹnyenede idotenyịn eke heaven ye ọkpọsọn̄ udọn̄ ke mme n̄kpọ eke spirit, ẹkemede ndinen̄ede n̄kpep mme n̄kpọ oro ẹdude ke Ikọ Abasi ifịk ifịk. . . . Kpa ye oro akpanikọ edi nte ke ukem akpanikọ ye ifiọk ẹdu ẹnọ mme otu mbiba ẹmi, ndien akam edi nte owo kiet kiet esịnde idem esie ke ukpepn̄kpọ edibiere ifiọk oro enye enyenede aban̄a mme n̄kpọ eke heaven ye eke isọn̄. Spirit Ọbọn̄ odu ke ukem udomo ọnọ otu mbiba ẹmi, ẹnyụn̄ ẹnọ mbiba ifiọk ye mbufiọk ukem ukem, ye ukem ifet ndinyene enye.”