Mmọ Ẹda Odudu Mmọ Ẹto M̀mọ̀n̄?

EDIEKE afo etịn̄de enyịn ese ọfọn̄ekpo oro odude ke ndise emi, afo eyekụt nte ke kiet ke otu mba esie inan̄ inyeneke ufọn ndomokiet. Edi, ọfọn̄ekpo akaiso ndidia udia nnyụn̄ mfe. Emi idịghe ata utịben̄kpọ. Ẹsikụt mme ọfọn̄ekpo ẹnamde mme mbubehe mmọ eke usen ke usen ye unana mbahade 70 eke ikie ke otu mba mmọ.

Ukem ntre, ediwak owo ẹwụt edu oro enyenede iwụk. Kpa ye ndutụhọ ẹtode n̄kpọsọn̄ mfịna eke ikpọkidem m̀mê eke ntụk, mmọ ikpaha mba.—Men 2 Corinth 4:16 domo.

Apostle Paul ama ọyọ akwa nsọn̄ọn̄kpọ ke ini isan̄ utom isụn̄utom esie. Ẹma ẹmia enye ke ikpa, ẹtịm, ẹtọn̄ọ ke itiat, ẹnyụn̄ ẹsịn ke n̄kpọkọbi. Adianade do, enye ama enyene ndusụk udọn̄ọ, ndusụk edide mfịna enyịn esie, oro ekedide “n̄kukịm ke obụkidem” ọnọ enye kpukpru ini.—2 Corinth 12:7-9; Galatia 4:15.

Ebiowo Christian kiet ekerede David, emi akan̄wanade ye mfịna edikop mfịghe ke ediwak isua, onịm ke akpanikọ ete ke odudu Jehovah ekedi akpan n̄kpọ ọnọ enye ndikan. Enye anam an̄wan̄a ete: “Ediwak ini, n̄kọri oro n̄kenyenede ye ọkpọsọn̄ ukeme ama osop. Ke ini nsobode utọ mmemidem oro, mma mberi edem ofụri ofụri ke Jehovah, ndien enye ke akpanikọ ama omụm mi akama. Mme ini ẹma ẹsidu oro n̄kesibọn̄de akam ke ediwak hour ndusụk ini. Ke ini nnemede nneme ye Jehovah, ekikere editie ikpọn̄ ye edikere ke nnyeneke ufọn ẹma ẹsisop. Mma nsidomo ukeme ke mme ini ọkpọsọn̄ mmeme, edi nte Jehovah anamde n̄kpọ, mma nsinyene odudu nto mmeme emi—idem ukeme ndin̄wam mbon en̄wen.”

Jehovah Abasi ama ọsọn̄ọ Paul idem. Ke ntre, enye ama ekeme ndidọhọ: “Ke adan̄aemi idem ememde mi, adan̄oro ke ntịm nnyene nsọn̄idem.” (2 Corinth 12:10) Ih, mmemidem Paul ama ekpep enye ndiberi edem ke odudu oro Abasi ọnọde. Apostle oro ọkọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Jehovah ke akpanikọ esinọ mme asan̄autom esie odudu.