Ẹkpono Unen Oro Mbon Udọn̄ọ Ẹnyenede
‘Usụn̄ idụhe emi n̄kemede ndinam usiakidem emi ye unana edisịn iyịp. Edieke oyomde nnam fi usiakidem emi, afo enyene ndinyịme usụn̄ unọ usọbọ mi. Mîdịghe ntre, afo enyene ndiyom dọkta efen.’
MME ikọ dọkta oro ikesehekede mbuọtidem Cheng Sae Joo, kiet ke otu Mme Ntiense Jehovah emi odụn̄de ke Thailand. Ke ẹdụn̄ọrede ẹfiọk ẹte enye enyene meningioma, kpa orụk mbufụt ke mfre, ama enen̄ede oyom ẹsiak Cheng idem. Edi n̄wan emi ama ebiere ndinam ewụhọ Bible: “Ẹbet . . . iyịp.”—Utom 15:28, 29.
Cheng ama aka ufọkibọk iba en̄wen, emekde ndibọ usọbọ ke idụt esie ke ekemede. Ke edikpu esie, mme dọkta do n̄ko ẹma ẹsịn ndinam usiakidem ke owo mîsịnke iyịp. Ke akpatre, Itieutom Utịm Ntọt Ufọkibọk (HIS) ke Thailand ama emen Cheng aka Neurological Institute of the Tokyo Women’s Medical College. Ufọkibọk oro ama ọnọ se ibede mbon udọn̄ọ 200 ẹmi ẹnyenede mbufụt ke mfre usọbọ ebe ke ikwa gamma, kpa kiet ke otu ata mbufa n̄kọri ke usụn̄ unọ usọbọ emi ẹkamade un̄wana ikan̄.
Ẹma ẹnam ndutịm ẹnọ Cheng ndidu ye Mme Ntiense ke Japan ẹmi ẹdụn̄de ẹkpere ufọkibọk oro. Otu kiet ama osobo ye enye ke an̄wambehe ubomofụm, ẹsịnede Mme Ntiense Jehovah iba ẹmi ẹsemde usem Thai ye andida ke ibuot HIS kiet. Ke ẹma ẹkese enye idem ke n̄kpọ nte urua kiet, ẹma ẹsịn Cheng ke bed ufọkibọk ke ebiet emi ẹkekamade ikwa gamma ẹnọ enye usọbọ. Edinam oro akada n̄kpọ nte hour kiet. Ke ọkpọn̄de ufọkibọk edem usen, Cheng ama afiak ọnyọn̄ Thailand edem usen oro.
Cheng ama etịn̄ ete: “Akananam n̄kekereke ke ẹkeme ndinọ ekese un̄wam ntre ebe ke ndutịm emi. Ima oro ẹkewụtde ọkọrọ ye edidianakiet mbon ẹmi ẹkebuanade ama otụk mi etieti.”
Ke nditọt mbụk n̄kpọntịbe emi, n̄wedmbụk n̄kpọntịbe Japan Mainichi Shimbun ọkọdọhọ ete: “Tutu osịm ini emi, ẹsiwụt mme ntak eke ido ukpono ẹmi ẹsinamde ẹsịn edikịm iyịp nsịn ke idem. Nte ededi, edikịm iyịp nsịn ke idem enyene mme mfịna esie utọ nte AIDS, n̄kpọndịk edimen udọn̄ọ otode ifọt udọn̄ọ utọ nte hepatitis C, ye ibọk usọbọ ndifịna owo. Ke ntak emi odu mbon udọn̄ọ ẹmi mîyomke edikịm iyịp nsịn ke idem inamke n̄kpọ m̀mê nso ke mmọ ẹnịm ke akpanikọ ke ido ukpono mmọ.”
N̄wedmbụk n̄kpọntịbe oro ama akaiso ọdọhọ ete: “Ẹsinyịk ediwak mbon udọn̄ọ ẹmi ẹsisịnde edikịm iyịp nsịn ke idem ndikpụhọ ufọkibọk, edi oyom mme itieutom unọ usọbọ ẹnam ukpụhọde ke ndiwụt ukpono nnọ se owo udọn̄ọ emekde. Oyom edinyịme oro asan̄ade ye ifiọk (edinam se ibuanade otịm an̄wan̄a owo udọn̄ọ ndien ekem onyịme usọbọ), owo inyụn̄ isioho edikịm iyịp nsịn ke idem ifep. Ẹkpenyene ndifiọk nte ke emi idịghe n̄kpọ abuanade akpan ido ukpono kiet.”
Ukem nte Cheng Sae Joo, ẹsinọ ediwak mbon ẹmi mîyomke usọbọ oro abuanade iyịp ẹka mme ufọkibọk efen. Kpa ye oro, mmọ ẹsidara ukeme mme dọkta oro ẹsinyịmede ndikpono unen oro mbon udọn̄ọ mmọ ẹnyenede.
Mme Ntiense Jehovah ẹketọn̄ọ Itieutom Utịm Ntọt Ufọkibọk ke mme n̄kọk itieutom Watch Tower Society man ẹnyene edidianakiet mbiausọbọ ẹmi ẹwụtde ukpono ẹnọ se mmọ ẹnịmde ke akpanikọ. Ke ofụri ererimbot, HIS anam itie ebuana oro adianade kiet ọkọri ye mme ufọkibọk, mbiausọbọ, mme anamutom unọ usọbọ, mme ekpe ibet, ye mme ebiereikpe.