Ẹma Ẹbiere Ikpe Aban̄ade Mme Ntiense Jehovah

KE ẸMA ẹkesio ikpe ẹdori ediwak ini, Esop Usion̄oikpe ke Thessalonica, Greece, ke akpatre ama odụk ke June 8, 1995, ndikop ikpe aban̄ade Mme Ntiense Jehovah inan̄ ẹdide iban. Nso ikọ ke ẹkedori mmọ? Edikwọrọ ikọ n̄kabade owo esịt, emi ibet Greece akakpande ke se iwakde ikan isua 50.

Nte ededi, etisịm ini oro esop okodụkde, akpan owo emi ekedide ntiense ke ikpe emi—kpa oku emi ekesịnde nsọk ke ikpe aban̄ade iban inan̄ ẹmi—ikodụhe aba ke uwem. Oku en̄wen ama odomo ndinọ ikọ ntiense ke itie esie, edi esop ikonyịmeke eben̄e esie. Ntem, idịghe n̄kpọ n̄kpaidem nte ke ikpe oro ekebịghi ke n̄kpasịp minit 15! Ebiereikpe oro ama odụn̄ọde mme ntiense oro ẹkedade ke n̄kan̄ mme okot ikpe onyụn̄ okụt ete ke mme akan̄idem iduehe ke ikpe edikwọrọ ikọ n̄kabade owo esịt nte mîkemke ye ibet. Ubiere emi owụt nte ke mme esop ke Greece ẹnyịme ndikpono nnyụn̄ nda ye ubiere oro Esopikpe Mbon Europe Kaban̄a Unen Owo okosịmde ke 1993.

Ekenen̄ede edi n̄kpọ n̄kpaidem ndikụt iban ita ẹmi ẹkedide ntiense ẹnọ okot ikpe nte ẹsan̄ade ekpere Ntiense oro ẹkedide mme akan̄idem, ẹkọmde mmọ ke ofụri esịt. “Nnyịn imeseme iban̄a kpukpru n̄kpọ ẹmi ẹketịbede,” ntre ke kiet ke otu mmọ ọkọdọhọ. Enye ama adian ete: “Ikedịghe ndudue nnyịn. Oku akakpak nnyịn ete ikot mbufo ikpe. Kemi enye mîdụhe aba ke uwem, nnyịn iyom mbufo ẹsidi obio nnyịn ye mme ufọk nnyịn.”

Ntem, Jehovah amafiak anam ikọt esie ẹnyene utịbe utịbe edikan ke Greece. Ẹkesio ibet aban̄ade edikwọrọ ikọ n̄kabade owo esịt ke Greece ẹdi ke 1938 ye 1939. Ke 1993 Esopikpe Mbon Europe Kaban̄a Unen Owo ama owụk nte ke ndida ibet emi n̄kọbọ Mme Ntiense Jehovah akwan̄a.—Se Enyọn̄-Ukpeme, September 1, 1993, page 27-31.