‘Kpa Nte Ukwak Abande Ukwak Ọsọp’

KE EKPEREDE utịt ọyọhọ isua ikie ita E.N., enyene-ifịk akparawa kiet emi ekekerede Anthony, emi ẹtịn̄de ẹban̄a nte “Christian Owo Copt,” ama adianade idem ọkpọn̄ ererimbot onyụn̄ abiat isua 20 ke ndidụn̄ ikpọn̄ ke desat. Ntak-a? Enye ekekere ke emi edi mfọnn̄kan usụn̄ ndinam n̄kpọ Abasi. Enye ekedi akpa owo Christendom emi okodụn̄de ikpọn̄.

Mfịn, Christendom enyene ibat ibat mbon oro ẹdụn̄de ikpọn̄. Edi ata ediwak owo ẹyom itie ikpọn̄ ke usụn̄ efen. Mmọ ẹsisịn ndinyene nneme ye mbon en̄wen mban̄a ido ukpono, ẹkerede ẹte ke utọ ikọ oro esida okosụn̄ọ ke eneni ye en̄wan. Utuakibuot mmọ esịne sụk editre ndinam mbọhọidụn̄ mmọ idiọkn̄kpọ.

Edi akpanikọ, owo nditre ndinam mbọhọidụn̄ esie idiọkn̄kpọ edi ubak ido ukpono akpanikọ, edi oyom se ikande oro. N̄ke eset kiet ọdọhọ ete: “Ukwak aban ukwak ọsọp: owo onyụn̄ anam iso ufan esie ọsọn̄.” (Mme N̄ke 27:17) Akpanikọ edi-o, Bible esịn udọn̄ ọnọ mme Christian ndisop idem ọtọkiet, idịghe ndidianade idem ofụri ofụri n̄kpọn̄ ererimbot m̀mê ndidianade n̄kpọn̄ mme Christian eken. (John 17:14, 15) Enye ọdọhọ ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide.” (Mme Hebrew 10:24, 25) Mme Ntiense Jehovah ẹtiene item oro. Ediwak ini ke urua, mmọ ẹsisop idem ọtọkiet ‘ndinam iso ufan mmọ ọsọn̄,’ ẹbọpde mbuọtidem ekemmọ mme andinịm ke akpanikọ. Mmọ ẹkụt ẹte ke ndineme Bible ke esịt akpanikọ isidaha ikosụn̄ọ ke en̄wan. Utu ke oro, enye esida okosụn̄ọ ke n̄kemuyo ye emem. Enye edi akpan ikpehe utuakibuot akpanikọ.