Udia A-tian Ọnọ Ikọ Ntiense

KE MME usen ẹmi ẹketienede unyekisọn̄ oro okotịbede ke Kobe, Japan, ke January emi ekebede, ama ọsọn̄ mme owo idem ndinyene udia ke ebiet unọmọ emi. Edi, Mme Ntiense Jehovah ikananake n̄kpọ uduuwem, ke ntak un̄wam mfọnido mme ufan mmọ. Ke akpa usen iba m̀mê ita ẹma ẹkebe ke unyekisọn̄ oro ama okotịbe, mme esop ẹmi ẹkedude ẹkpere ẹma ẹnọ usụn̄ edesi. Ikebịghike, mme ufan ẹmi ẹwụtde edikere mban̄a ke ẹkenọ mme udia a-tian. Ediwak owo ẹma ẹwet n̄kpọ ẹdian ke mme udia a-tian oro ndiwụt edikere mban̄a oro mmọ ẹnyenede ẹnọ mbon unọmọ ẹmi. Mbon oro ẹkebọde udia ẹmi ẹkedọhọ ke “inụn̄ ama odu” ke kpukpru udia sia mmọn̄eyet mîketreke ndisiaha mmọ ke enyịn ke ini ẹkotde mme n̄wed oro.

Mme Ntiense Jehovah ẹma ẹbuana udia mmọ ye mmọ eken ẹmi ẹkedude ke unana. Ntiense kiet akadia udia esie ke adan̄aemi anamde isan̄ ke moto ye nsan̄autom kiet emi mîdịghe Ntiense emi anamde utom ke ukem usiakifia oro. Ntre enye ama abuana kiet ke otu udia a-tian oro enye ọkọbọde.

“M̀mọ̀n̄ ke afo ekedep udia a-tian emi?” ntre ke nsan̄autom esie okobụp. Eyenete oro ama anam utom un̄wam eke Mme Ntiense an̄wan̄a. “Ediwak usen edi emi ndiaha ikọn̄. Mmọn̄ nsụhọ ndusụk nnyụn̄ nda nnyọn̄ ufọk n̄kọnọ ubon mi,” ntre ke eren oro ọkọdọhọ ye idatesịt.

Ke ini emi okotịbede ọyọhọ utịm ikata, nsan̄autom oro ama ọnọ Ntiense oro yen 3,000 (n̄kpọ nte $35, U.S.) onyụn̄ ọdọhọ ete: “Ami mmemehe ye mme utom mbufo, mmọdo mbọk yak nnọ etịbe ke utom mbufo. Ami mmokop idatesịt ke afo ndibuana udia fo ye ami. Ke akpanikọ, mme ufan fo kpukpru ẹfọn etieti.”