Edinam Oro Mînyeneke Ufọn?

MBON Catholic ẹmenam edinam uyarade ndudue ke ediwak isua ikie. Edi, ye ediwak owo enye edi ikpîkpu edinam. Ke afiakde eti ini uyen esie, akwa etubom ufọkn̄wed sekọndri emi ekerede Bob ọdọhọ ete: “N̄kedi eyenọwọn̄, ndien kpa ye oro n̄kadaha enye ke akpan n̄kpọ ini oro.” Ntak mîkadaha? Ye enye, uyarade ndudue ama akabade edi edinam oro mînyeneke ufọn. Enye anam an̄wan̄a ete: “Ediyarade ndudue eketie nte afo nditan̄ kpukpru ekpat mbiomo ẹmi ẹyọhọde ye idiọkn̄kpọ nsọk omụm n̄kpọmbet ke an̄wambehe ubomofụm. Enye obụp fi mme mbụme aban̄a mme idiọkn̄kpọ fo ndien ekem ayak fi ebe ke ama ekekpe utomo ke mme nnunụm nnunụm n̄kpọ oro ekedepde ke ini okodude ke esenidụt.”

Ukem ntre, Frank Wessling, ke ewetde ke U.S. Catholic, etịn̄ aban̄a edinam uyarade ndudue nte “ebeubọk mmemmem ukpeme oro ẹnọde ke nde ke nde, ọtọn̄ọde ke edisio ọsọ idiọkn̄kpọ mfep ebe ke editịn̄ akam edikabade esịt oro ẹmụmde ẹsịn ke ibuot tutu osịm enyọn̄ enyọn̄ edinam uyarade ndudue.” Didie ke Wessling ekeberi? Enye ọdọhọ ete: “Ami mmonịm ke akpanikọ nte ke Ediyarade Ndudue ọfọn ye ukpọn̄. Edi usụn̄ nte mbon Catholic ẹnamde enye edi mfịna.”

Bible etịn̄ aban̄a ediyarade idiọkn̄kpọ ke ata isio isio usụn̄. Se idide akpan n̄kpọ ikan edi ediyarade idiọkn̄kpọ nnọ Abasi. (Psalm 32:1-5) Ndien Christian mbet oro James ekewet ete: “Nte owo ọdọn̄ọ ke otu mbufo? Yak enye okot mbiowo Ufọk Abasi; mmọ ẹnyụn̄ ẹnụhọ ẹfụk enye ẹbọn̄ akam, ẹda aran ẹyet enye ke enyịn̄ Ọbọn̄. Mmọdo ẹyarade idiọkn̄kpọ mbufo ẹnọ kiet eken, ẹnyụn̄ ẹbọn̄ akam ẹban̄a kiet eken, man ẹkọk udọn̄ọ mbufo.”—James 5:14, 16.

Christian oro idiọkn̄kpọ efịghede enye ekeme ndikot mme esenyịn esop, ẹmi ẹkemede ndinọ ọkpọkpọ eti item nto Bible ndin̄wam anamidiọk ọkpọn̄ idiọk usụn̄ esie. Mme esenyịn ẹkeme ndinọ nsịnudọn̄ oro odotde nte mmọ ẹkụtde n̄kọri owo oro ọdọn̄ọde ke n̄kan̄ eke spirit. Nso ukpụhọde ke emi edi ntem ye edinam uyarade ndudue eke mme ufọkabasi mfịn! Ke ẹkopde nsịnudọn̄ ebe ke ọkpọkpọ un̄wam oro mbiowo esop ẹnọde, mme anamidiọk oro ẹkabarede esịt ẹkeme ndinyene ubọhọ oro David ekenyenede, nte enye okowụtde ke psalm kiet ete: “Nyesian fi ndudue mi, ndien n̄kofụkke mme ukwan̄n̄kpọ mi. N̄kọdọhọ nte, Ndien nyetịn̄ mme idiọkn̄kpọ mi nnọ Jehovah; ndien afo efen ukwan̄n̄kpọ ye ndudue mi.”—Psalm 32:5.