Ẹfiak Ẹkere Ẹban̄a Edikịm Iyịp Nsịn ke Idem

KE N̄KỊMN̄KỊM eyo AIDS emi, n̄kponn̄kan ndịk kaban̄a nsọn̄idem owo udọn̄ọ ufọkibọk ekeme ndidi ke ubet usiakidem. Dr. Richard Spence emi ke se iwakde ibe isua duop, ọnọde Itie Usiakidem Owo Mîkamake Iyịp ndausụn̄, ke Cooper Hospital-University Medical Center ke Camden, New Jersey, U.S.A., ọdọhọ ete: “Usụn̄ idụhe oro nnyịn ikemede ndinam n̄kpri unam ẹkûdọn̄ọ ke iyịp.”

Eyịghe idụhe, itie usọbọ idem emi ọsọbọ ediwak Mme Ntiense Jehovah, emi ẹtịmde ẹdiọn̄ọ ẹban̄a edisịn oro mmọ ẹsịnde edikịm iyịp nsịn ke idem oro ekemde ye Bible. (Leviticus 17:11; Utom 15:28, 29) Nte ededi, ediwak mbon udọn̄ọ oro mîdịghe Mme Ntiense ẹsika ẹkebọ usọbọ ke itie usọbọ idem emi n̄ko, ke ẹkerede ẹban̄a mme n̄kpọndịk oro ẹdude ke edikịm iyịp nsịn ke idem, emi esịnede edimen udọn̄ọ edidiana ekpa, AIDS, ye mme udọn̄ọ eken. Courier-Post Weekly Report on Science and Medicine ọdọhọ ete: “Nte AIDS awakde owụt ke oyom ẹdụhọde iyịp. Edi ẹsụk ẹkeme nditre ndikụt ndusụk n̄kpọ ke ini edidụhọde emi koro owo ekeme ndinyene ifọt udọn̄ọ mbemiso ẹkemede ndikụt.”

Ke ntak mme utọ n̄kpọndịk oro, Itie Usiakidem Owo Mîkamake Iyịp ẹda ukpụhọ ibọkusọbọ ke itie edikịm iyịp nsịn ke idem, esịnede edifiak mmen iyịp owo udọn̄ọ oro nsịn enye ke idem—kpa usụn̄ edinam oro ndusụk Mme Ntiense ẹkemede nditre ndifan̄a ke ndusụk idaha.a Usọbọ efen esịne edida mme ibọk oro ẹdemede ndutịm unọ iyịp owo udọn̄ọ emi. Adianade do, ẹsida ubọknnam iyịp man an̄wam ke edinọ ofụm ye unana ediyom ẹsịn iyịp. Dr. Spence ọdọhọ ete: “Mme Ntiense Jehovah ẹyom ukpeme ibọkusọbọ oro ọfọnde akan, edi mmọ ẹyom ukpụhọ ẹnọ edikịm iyịp nsịn ke idem.”

Mme Ntiense Jehovah ẹwụt esịtekọm ẹban̄a edidianakiet ye un̄wam oro mmọ ẹbọde ẹto mme dọkta ẹmi ẹkponode edinịm ke akpanikọ ido ukpono mmọ. Nte utịp, mmọ ke akpanikọ ẹbọ “ukpeme ibọkusọbọ oro ọfọnde akan” ẹnyụn̄ ẹnyene edisana ubieresịt ke iso Jehovah Abasi.—2 Timothy 1:3.

[Mme Ikọ idakisọn̄]