Ntọt M’ọkwọrọ Obio Ubọn̄
Ndisịm N̄kpri Obio-In̄wan̄ Greenland Ẹmi Ẹdude Nsannsan
KE EDIWAK isua Mme Ntiense Jehovah ẹmeda magazine Enyọn̄-Ukpeme ye Awake! ẹkwọrọ eti mbụk. N̄wed ẹmi ẹmenede ọniọn̄ Jehovah ke enyọn̄ nte ẹwụtde ke Ikọ esie, kpa Bible. Mmọ ẹkaiso ẹkpeme mme n̄kpọntịbe ererimbot oro ẹnyenede n̄kpọ ndinam ye prọfesi Bible, mmọ ẹnyụn̄ ẹda eti item Bible ẹkebuan ye mme mfịna idahaemi.—James 3:17.
Ke 1994, Mme Ntiense ke Greenland ẹma ẹsịn san̄asan̄a ukeme ndinọ ediwak owo Enyọn̄-Ukpeme ye Awake! nte ẹkekeme. Ke ndaeyo, mmọ ẹma ẹnam ndutịm ndika ndusụk obio-in̄wan̄ oro ẹdude ata nsannsan ke Greenland. Otu mme anditan̄a Obio Ubọn̄ ẹma ẹwat ke ubom ke se iwakde ibe kilomita 4,000 ẹka edem usoputịn mbenesụk Qaanaaq (Thule), ẹsịmde mme obio ata edere edere ke ekondo. Isan̄ mmọ akada urua itiaba. Ke mbenesụk edem usiahautịn, Mme Ntiense ẹdide ebe ye n̄wan ẹma ẹsịm obio-in̄wan̄ odude ke Ittoqqortoormiit ndien ke akpa ini ẹma ẹkwọrọ eti mbụk do ke nde ke nde.
Ke ntọn̄ọ ntọn̄ọ isua oro, ke ọfiọn̄ April, ẹma ẹnịm idem Enyọn̄-Ukpeme ye Awake! 7,513 ẹnọ mme owo ke Greenland. Oro ọwọrọ ete, ke ẹbaharede ukem ukem, owo kiet kiet ke otu mme asuanetop Obio Ubọn̄ 127 ẹkenịm magazine 59—magazine 1 ke kpukpru mme andidụn̄ 7. Ọfiọn̄ oro, Awake! ama akama udịm udịm ibuotikọ ke idak ibuotikọ ikpaedem oro “Breast Cancer—Every Woman’s Fear.” Ntiense kiet, oro okonịmde magazine 140, ama ọkpọn̄ ndusụk Awake! oro ọnọ ọkọmbụk n̄kpọntịbe television kiet. Usen ifan̄ ke ukperedem, ndutịm mbụk n̄kpọntịbe television ama eneme aban̄a mme ibuotikọ ẹban̄ade kansa eba. Ọkọmbụk n̄kpọntịbe oro ama owụt magazine oro ke ukwak usio ndise, owụtde ndusụk page ke adan̄aemi enye okotorode eti uduot ukabade n̄wed usem Greenlandic. N̄wan emi ama osio nti ekikere oro Awake! ọnọde nte n̄kpọ ukpeme nsọn̄idem owụt n̄ko.
Ẹma ẹnam ndụn̄ọde ye Ntiense emi ọkọnọde ọkọmbụk n̄kpọntịbe oro mme magazine ẹmi ke ukem ndutịm TV oro. N̄wan emi ama ọbọrọ ediwak mbụme aban̄ade Mme Ntiense Jehovah onyụn̄ etịn̄ n̄kpọ aban̄a ntatara edisuan oro ẹsuande mme magazine ẹmi ke ọfiọn̄ oro. Enye ama etịn̄ n̄kpọ n̄ko aban̄a ata ọniọn̄ oro ẹkụtde ke Bible onyụn̄ anyan ubọk owụt nte ke utọ item oro owụtde ifiọk do ekeme ndin̄wam nnyịn iyọ mme mfịna oro ẹdude mfịn.
Ẹkeberi ndutịm oro ye ndụn̄ọde oro ẹkenamde ye etieibuot N̄ka Kansa Greenland. Enye ama ọdọhọ ete ke akanam imọ ikwe utọ eti ibuot nneme oro esịnede ifiọk ntre ke usem esiemmọ. Ekem enye ama esịn udọn̄ ọnọ kpukpru mmọemi ẹnyenede udọn̄ ke ibuot nneme aban̄ade kansa eba ndikot mme ibuotikọ Awake! emi. N̄wan emi ọkọdọhọ ete ke eti ntak ama odu ndiwụt esịtekọm nnọ Mme Ntiense Jehovah ke usio-ukot oro mmọ ẹnamde.
Nte edide ke Greenland, Mme Ntiense Jehovah ke ofụri ererimbot ẹkaiso ndikwọrọ eti mbụk ‘nnọ kpukpru owo ke idak ikpaenyọn̄.’ (Colossae 1:23; Utom 1:8) Ye un̄wam n̄wed ukpep Bible, esịnede Enyọn̄-Ukpeme ye Awake!, mmọ ẹn̄wam kpukpru orụk owo ẹyo mme mfịna oro ẹdude mfịn ẹnyụn̄ ẹnọ mmọ idotenyịn kaban̄a mfọnn̄kan ini iso.
[Ndise obio ke page 8]
(Ama oyom ndikụt nte enye enen̄erede etie, se n̄wed)
Qaanaaq (Thule)
Ittoqqortoormiit
Nuuk (Godthåb)