Ntọt M’ọkwọrọ Obio Ubọn̄

“Mmọ Idopke Uyo”

TOTO ke ini Jesus Christ ye mme apostle esie, mme adaiso ido ukpono ẹmeda se ededi usụn̄ oro odude ke ukeme mmọ ndikpan edikwọrọ eti mbụk Obio Ubọn̄ Abasi. Ẹma ẹsọn̄ọ uyo ‘ẹkpan’ mme apostle ndien ndien ẹte “ẹkûkpep aba n̄kpọ ke enyịn̄ [Jesus].” (Utom 5:27, 28, 40) Edi, mbụk Bible ọdọhọ ete “ikọ Abasi ọdọdiọn̄ asuana; ibat mbet onyụn̄ ọtọt ke Jerusalem etieti.”—Utom 6:7.

Tọsịn isua iba ke ukperedem nnyịn ke isụk ikụt mme adaiso ido ukpono ke Israel ẹmi ẹnamde mme ukara n̄kann̄kụk ẹbiọn̄ọ utom mme ata Christian ke idụt oro. Ke idak mfịghe otode mbon ido ukpono oro ẹnyenede ukwan̄ ifiopesịt, ke November 1987, mbon ukara n̄kann̄kụk ke Tel Aviv, Israel, ẹma ẹnọ uyo ẹte Mme Ntiense ẹtre ndinyene mme mbonoesop Christian ke Ufọkmbono Obio Ubọn̄ oro odude ke ọfis n̄kọk itieutom Watch Tower Society. Ewụhọ oro ama ọtọn̄ọ ndidu ke edinam ke October 1989. Ke ndinam ewụhọ oro, Mme Ntiense ẹma ẹbọ ufọk ke ukpeokụk ke n̄kann̄kụk oro ke ufan̄ isua ita ke adan̄aemi ekperede ndidi Ufọkmbono Obio Ubọn̄ okodu ye unana edida nnam n̄kpọ.

Kan̄a kemi, ẹma ẹneme n̄kpọ emi ẹnọ Esop Enyọn̄ Israel. Ọfis ekpeikpe idụt oro ama odụn̄ọde eneni oro Mme Ntiense ẹkenọde onyụn̄ ọdọhọ ete ke usion̄oikpe mmọ eyekụt unen ke ẹkerede ẹban̄a in̄wan̄în̄wan̄ asari ido ukpono oro akabuanade. Ntem, ama anam mbon ukara n̄kann̄kụk ẹkpụhọde ubiere mmọ, ndien Mme Ntiense Jehovah ke idatesịt ẹma ẹfiak ẹnyọn̄ ẹka Ufọkmbono Obio Ubọn̄ mmọ.

Nte utom edikwọrọ akpanikọ Bible ama osụhọde ubọk ke mme isua oro? Ke akpanikọ ikosụhọkede! Ke ini emi ẹkeberide Ufọkmbono Obio Ubọn̄ oro, esop iba ẹkedu ke Tel Aviv ye nsannsan otu ukpepn̄kpọ Bible kiet ke n̄kpet n̄kpet obio Lod. Isua ita ke ukperedem, ke ini ẹkefiakde ẹberede Ufọkmbono Obio Ubọn̄ oro, Mme Ntiense Jehovah ẹma ẹwak ẹsịm esop inan̄, ndien obufa otu ukpepn̄kpọ Bible kiet ke okosop idem ke Beersheba.

N̄kọri ke Israel itreke ye mme otu oro ẹsemde mme akpan usem oro, Arabic ye Hebrew. Akwa udịmowo oro ẹwọrọde idụn̄ ke akani Soviet Union ẹdu, ntre Mme Ntiense Jehovah ẹmi ẹsemde usem Russia ke ẹsịn idem idahaemi ndibuana eti mbụk ye mmọ. Ẹnịm ndusụk mbonoesop usem Russia ke esop ita; se iwakde ikan owo ikie ẹma ẹsop idem ndondo emi kaban̄a mbono usem Russia.

Nte eyịghe mîdụhe, asari asari mbon ido ukpono ẹyekaiso ke ubịnikọt mmọ ndibiọn̄ọ utuakibuot akpanikọ. Edi mme anditan̄a Obio Ubọn̄ ẹkaiso ndikpebe mme Christian akpa isua ikie emi, kpa ye ubiọn̄ọ, “idopke uyo ndikpep nnyụn̄ n̄kwọrọ, ẹte, Jesus edi Christ.”—Utom 5:42.