“Ndinyam Inụn̄” ke Mozambique

FRANCISCO COANA, andibuana ke kọmiti oro esede aban̄a utom ke Mozambique, ama odu ke “mme itie edifiak nnọ ukpep” ke isua duop. Enye obụk ifiọk n̄kpọntịbe esie ete: “Mma mfiọk ke nnyịn iyedu mi ibịghi esisịt, ntre mma mbụp esenyịn circuit m̀mê mmekeme ndikaiso nte asiakusụn̄ ofụri ini. Edi didie ke ndikeme ndisịn ini oro ekemde ke an̄wan̄wa utom ukwọrọikọ, sia ekperede ndidi kpukpru owo ke mme itienna ẹmi ẹkedide Mme Ntiense Jehovah? Mma ndọhọ ke nnyene ndiwọrọ n̄ka Milange, obio emi oyomde usụn̄ ke kilomita 47, man n̄koyom mme owo ndikwọrọ ikọ nnọ.

“Okposụkedi owo mîkọnọhọ nnyịn unyịme ndikpọn̄ itienna emi, ewụhọ emi ikenen̄ekede isọn̄ ubọk. Mmekeme nditi nte ndụkde ikọt, ntọn̄ọ edọn̄, nnyụn̄ mbọn̄ akam mban̄a usụn̄ ndikwọrọ ikọ nnọ mme owo n̄kann̄kụk oro. Ikebịghike Jehovah ama ọbọrọ.

“Mma nsobo eren kiet emi ekenyenede enan̄ukwak, ndien mma nnam ediomi ye enye. Enye ama onyịme ke edieke ndinamde utom ke in̄wan̄ imọ edide hectare 3/4 mbemiso ukwọedịm edide edisịm, ke imọ iyenọ mi enan̄ukwak nte okụk utom mi. Ntre mma nsida kpukpru usenubọk ndinam utom ke in̄wan̄ esie. Jehovah ama ọdiọn̄ ndutịm emi, sia ke akpatre n̄kọbọde enan̄ukwak mi.

“Utịp ekedi nte ke mma n̄keme ndika akwa obio Milange nnyụn̄ n̄kaiso ke usiakusụn̄ mi uforo uforo ke in̄wan̄ emi on̄wụmde mfri mi. Sia ẹkedoride ukpan ke utom nnyịn, n̄kenyene ndisio usụn̄ edimen mme owo n̄wụt akpanikọ ndi. Ke ndọn̄de mme n̄wed ye mme magazine ke idak ọfọn̄idem mi, nyemen ekpri inụn̄ ke ekpat nnyụn̄ ntọn̄ọ mbubehe unyam inụn̄. Utu ke ndinyam enye ke meticais 5, nyekọm meticais 15. (Edieke ekpekememde urua akaha, mme owo ẹkpekedep ẹma, ndien n̄kpenyeneke inụn̄ ndomokiet ndikama nnam utom ukwọrọikọ aba!) Nneme mi ekesika ntem:

“‘Mmọkọm-o! Nnyam inụn̄ mfịn.’

“‘Akpa okụk ifan̄?’

“‘Meticais 15.’

“‘Ih ih. Ọsọn̄ urua akaha!’

“‘Ih, mmonyịme ke ọsọn̄ urua. Edi edieke afo ekerede ke enye ọsọn̄ urua idahaemi, kam bet esisịt koro enye eyesọn̄ urua akan oro ke ini iso. Ndi afo ọmọfiọk ke ẹma ẹbem iso ẹtịn̄ emi ke Bible?’

“‘Akanam n̄kotke oro ke Bible mi.’

“‘Ih, mmọdo. Men Bible fo di, yak n̄wụt fi.’

“Ye oro nneme eyetọn̄ọ ikamade Bible esie, ntre okịm eyesịne ke idak ọfọn̄idem mi. Nyetịn̄ ntụk Ediyarade ibuot 6, aban̄ade mme idiọk idaha ye unana udia. Edieke n̄kụtde ke ẹnam n̄kpọ nte ọfọnde, nyesio Akpanikö oro Adade osim Nsinsi Uwem m̀mê Eti Mbụk Ndinam Fi Okop Inemesịt nnyụn̄ ntọn̄ọ ata ukpepn̄kpọ Bible.

“Utịp ekedi nte ke mma n̄keme nditọn̄ọ otu emi esịnede owo 15 emi ẹnyenede udọn̄ ke Milange. Edi ikebịghike ukara ẹma ẹdidiọn̄ọ ẹban̄a utom nnyịn. Usen kiet ke ini n̄konịmde ukpepn̄kpọ Bible, mme bodisi ẹma ẹbụmede ẹdụk ufọk ẹnyụn̄ ẹmụm nnyịn. Ẹma ẹtan̄ kpukpru nnyịn, esịnede n̄kpri nditọwọn̄ ke ubon, ẹka ufọk-n̄kpọkọbi n̄kann̄kụk. Ke ima ikodu do ke ọfiọn̄ kiet, ẹma ẹnọ kpukpru nnyịn ifiak inyọn̄ itienna.”

Mme ifiọk n̄kpọntịbe ẹmi ikanamke ifịk nditọete nnyịn etek. Ke edide isio ye oro, Francisco ye ubon esie, ọkọrọ ye ediwak tọsịn nditọete mmọ ẹmi ẹkedude ke mme itienna oro, idahaemi ẹtuak ibuot ẹnyụn̄ ẹkwọrọ ikọ ke mme ifụre ifụre idaha ke Mozambique.