Mme Mbụme Ẹtode Mme Andikot
Ke Matthew 3:7, ntak emi “New World Translation” adade anyan ikọ oro “ndondo oro okokụtde” utu ke “okụtde” nte ẹdade ke ediwak edikabade Bible eken?
Ke akpanikọ, ẹkpekeme ndida edikabade mbiba ẹmi ndien emi ikpakwan̄ake. Inyụn̄ idịghe kpukpru usem ẹkeme ndiwụt inem inem edu utịn̄ikọ eke akpasarade ikọ Greek emi mmemmem mmemmem ke utọ idaha emi. Edi usụn̄ oro ẹsịnde Matthew 3:7 ke New World Translation of the Holy Scriptures ke Ikọmbakara owụt inem inem edu utịn̄ikọ oro ẹkụtde ke udọn̄ikọ usem Greek emi. Nnyịn ikot ite: “Ke ini [John Andinịm Owo Baptism] ke ndondo oro okokụtde ediwak mme Pharisee ye mme Sadducee ẹdide ndina baptism, enye ama ọdọhọ mmọ ete: ‘Mbufo nditọ ibom, anie ekeyịp editịn̄ ọnọ mbufo ete ẹfehe ẹbọhọ iyatesịt oro edide?’”
Nte ẹwụtde, ediwak Bible ẹdọhọ mmemmem mmemmem ẹte ke John “ama okụt” mme Pharisee ye mme Sadducee ẹwọn̄ọde ẹdi itie oro enye okonịmde mme Jew baptism. Nte ededi, ndi ikọ Bible oro ọwọrọ ete ke John ama okụt emi otịbede ke anyanini, nte n̄kpọ eke ẹdọhọde ke enye ama ese ke ndusụk ini ndien ke akpatre onụkde enye nditịn̄ mban̄a mbubịk edinam mmọ? Edikabade oro “okụtde” ekpekeme ndida n̄kosịm utọ ekikere oro. Ke akpanikọ, ekikere oro owụt idem ke edikabade eke Ferrar Fenton, emi ọdọhọde ete: “Edi ke esede ediwak mme Pharisee . . .”
Ẹkot idaha oro ikọedinam usem Greek emi odude nte ikọedinam ini edem emi mîwụtke udomo ini edinam. Ikọedinam ini edem emi mîwụtke udomo ini edinam mi owụt edinam ebe oro, m̀mê eke ata ibio ini, ke adan̄aemi ikọedinam idahaemi owụtde edinam oro akade-kaiso (oro ẹnamde-nam) ndien edinam oro ẹnamde ẹma enen̄ede edi edinam oro ẹma ẹkekụre (ẹma ẹkenanam). Ntre ekikere ikọedinam ini edem emi mîwụtke udomo ini edinam ke Matthew 3:7 edi nte ke John Andinịm Owo Baptism ke idaha kiet ama okụt mme Pharisee ye mme Sadducee ẹdide, mîdịghe “enye ndondo oro ama okụt” mmọ. Ke ndondo oro enye okokụtde, enye ama osioro uyo, nte nnyịn ikotde ke Mt 3 ufan̄ikọ 7-12.
Ediwak uwụtn̄kpọ ẹdu emi ẹdade ikọedinam ini edem emi mîwụtke udomo ini edinam ẹtịn̄ ikọ ye ekikere emi. Nnyịn ndifiọk inem inem edu utịn̄ikọ esie ekeme ndida n̄kosịm nnyịn ndinyene eti ekikere mban̄a se Bible etịn̄de.
Ke uwụtn̄kpọ, Matthew 9:9 ọdọhọ ete: “Nte Jesus otode do asan̄a ebe, enye [ndondo oro okụt, “NW”] owo kiet, emi ekerede Matthew, etiede ke itie ubọ utomo; onyụn̄ ọdọhọ enye ete, Tiene Mi. Ndien Matthew adaha ke enyọn̄, etiene Enye.” Jesus ikenyeneke ndibiat anyanini nse Matthew, m̀mê enye ndise Matthew mfiak nse. Jesus ndondo oro ama okụt Matthew, ndien Enye ama anam n̄kpọ.
Mmọ oro ẹdi uwụtn̄kpọ iba ẹban̄ade ọyọhọ ntịn̄enyịn oro New World Translation ọnọde mme ikọedinam usem Greek ẹdude ke ikọedinam ini edem emi mîwụtke udomo ini edinam. Kere ban̄a ndusụk ebiet emi mbiet ikọ oro odude, nyụn̄ se m̀mê nso inem inem edu utịn̄ikọ efen ke afo edikụt:
“Ndien ke ini Jesus odụkde ke ufọk ọbọn̄ oro, ndien [ndondo oro okụtde, “NW”] mme efri ifiom, ye nte owo ẹnamde ndutịme, Enye ete mmọ, Ẹdaha ke usụn̄; eyenan̄wan ikpaha n̄kpa, edi edede.”—Matthew 9:23, 24.
“Edi ke [ndondo oro mbet ẹkụtde, “NW”] Enye asan̄ade ke enyọn̄ inyan̄, esịt otịmede mmọ, ẹte, Edi ekpo: ndien mmọ ẹsio n̄kpo ọnọ ndịk. Edi idaha oro Jesus etịn̄ ikọ ye mmọ ete, Ẹsọn̄ esịt; edi Ami; ẹkûfehe ndịk.”—Matthew 14:26, 27.
“Ndien ọbọn̄ synagogue kiet, emi ekerede Jairus, edi; ndien ke [ndondo oro enye okụtde, “NW”] Jesus, ọduọ Enye ke ukot, ọsọn̄ọ ekpe Enye ubọk, ete, Ekpri eyen mi an̄wan ekpere ndikpa: mmekpe fi ubọk nte Afo edi edidori enye ubọk.”—Mark 5:22, 23.
“Edi nte enye ekperede inuaotop obio [Nain], sese, ke ẹbiom okpo owo ẹwọrọ; enye oro edi ikpọn̄ eyen eka esie, emi onyụn̄ edide ebeakpa: ediwak mbio obio ẹnyụn̄ ẹsan̄a ye enye. Ndien ke [ndondo oro Ọbọn̄ okụtde, “NW”] n̄wan oro, atua enye mbọm, onyụn̄ ọdọhọ enye ete, Kûtua.”—Luke 7:12, 13.
“Adan̄aemi Mary osịmde ebiet oro Jesus odude, [ndien ndondo oro okụtde, “NW”] [Jesus], ọduọ Enye ke ukot, ete Enye, Ọbọn̄, edieke Afo okpodude mi, eyeneka mi ikpakpaha. Ntem ke ini Jesus okụtde nte Mary atuade eyet, ye nte mme Jew emi ẹsan̄ade ye enye ẹtuan̄ade, Enye omụm mmụm ke spirit.”—John 11:32, 33.
Edieke afo edimade ndikot mme uwụtn̄kpọ efen efen, kụbọde ka Utom Mme Apostle 7:23-25; 9:39, 40; 21:32; 28:3-5; ye 1 John 5:16. Ndinam ntre ekeme ndikaiso n̄wụt nte ekemede ndinọ mme enyene-ifiopesịt nditọ ukpepn̄kpọ Bible uyụhọ nditat, m̀mê ndinam ifiọk mmọ kaban̄a se ẹwetde ke Ikọ Abasi otụn̄ọ.