Odudu Eti Ikọ

“Esịt eke ọkpọsọn̄ ekikere efịghede, eti ikọ ekeme ndidat enye didie ntem!”​—⁠Mme N̄ke 12:25, Knox.

MME Christian ibọhọke mfịna. Ndusụk ini mmọ ẹsikop editịmede esịt ke ntak ẹdude uwem ke “ndiọkeyo” ẹmi.​—⁠2 Timothy 3:⁠1.

Ke ini ẹsobode utọ afanikọn̄ oro, nso edidiọn̄ ke edi ntem ndikop nti ikọ nto ufan akpanikọ! Bible ọdọhọ ete: “Ufan amama ufan kpukpru ini, edi eyeneka amana ọnọ ini nnanenyịn.” (Mme N̄ke 17:⁠17) Ẹkediọn̄ọ anam-akpanikọ owo oro Job nte utọ ufan emi. Eliphaz ama akam etịn̄ aban̄a enye ete: “Ke ini owo atuakde ukot ọduọ, okopde mmemidem onyụn̄ akpade mba, mme ikọ fo ẹsịn udọn̄ ẹnọ enye ndisọn̄ọ nda.”​—⁠Job 4:4, Today’s English Version.

Nte ededi, ke ini Job ke idemesie okoyomde nsịnudọn̄, Eliphaz ye mme nsan̄a esie iketịn̄ke nti ikọ. Mmọ ẹma ẹduọhọ Job ẹban̄a mfịna esie, ẹdọhọde ẹte ke anaedi enye ama enyene ndusụk ndedịbe idiọkn̄kpọ. (Job 4:8) The Interpreter’s Bible ọdọhọ ete: “Se Job oyomde edi mbọm otode esịt owo. Se enye ọbọde edi udịm udịm ata ‘akpanikọ’ ye ata inem inem mfefere ikọ ido ukpono ye mme ikọ ido uwem.” Job ama enen̄ede okop editịmede esịt ke okopde ikọ Eliphaz ye mme nsan̄a esie tutu onụk enye ndiseme nte: “Adan̄a didie ke mbufo ẹdiyat mi esịt, ẹnyụn̄ ẹda uyo mbufo ẹnuak mi mbai mbai?”​—⁠Job 19:⁠2.

Nnyịn ikpedehede inam ekemmọ asan̄autom Abasi eseme ke mfụhọ ke ntak ndiọi ikọ oro owo mîkereke-kere. (Men Deuteronomy 24:15 domo.) N̄ke Bible kiet odụri owo utọn̄ ete: “Se afo etịn̄de ekeme ndinịm uwem m̀mê ndibiat enye; ntre ana afo ọbọ mme utịp ikọ fo.”​—⁠Mme N̄ke 18:21, TEV.

Ke idiọn̄ọde odudu oro ikọ enyenede, ẹyak nnyịn itiene uwụtn̄kpọ apostle Paul. Ke adan̄aemi okodude ke Macedonia, enye ama “ọnọ mmọ ediwak item.”​—⁠Utom 20:2.