Bible—Nso Idi Ata Ufọn Esie?
“BIBLE edi ndịben̄kpọ, n̄wed oro owo mîkewetke man an̄wan̄a owo,” ntre ke enyeneufọk kiet ọdọhọ. Efen ọdọhọ ete: “Mmọfiọk nte ke Bible edi akpan n̄wed, edi mfiọkke ekese mban̄a enye. Ọsọsọn̄ enye ndin̄wan̄a owo.”
The Toronto Star ọkọdọhọ ete: “Ediwak Christian ẹfiọk . . . esisịt ẹban̄a Bible.” N̄wan Catholic kiet ọkọdọhọ ete: “Ndinyene Bible anam mi n̄kop inem. Enye ada emem esịtidem edi.” Ọkọiyak kiet ọdọhọ ete: “Bible etie nte ekanem mbakara (compass) emi ekpemede owo ebe idiọk, mbufụt inyan̄ uwem osịm ebiet ubọhọ.” Ke mme ikọ akani owo Hindu, “Bible edi Ikọ Abasi ye enọ oro ẹnọde ubonowo onyụn̄ edi ibọkusọbọ ọnọ mme ufen eke spirit.”
Mme ekikere ẹnyenede ẹban̄a ata ufọn emi Bible enyenede ẹwawak ẹnyụn̄ ẹkpụhọde. Nso, ndien, idi ata ufọn esie?
Bible edi ata akpan n̄wed ye n̄wed oro ẹsuande atara akan ke uwem. Mme usọbọ ke mme mfịna oro ẹnen̄erede ẹtịmede owo ekikere oro owo osobode m̀mê edisobode ẹdu ke esịt esie. Ufọn oro item esie enyenede inyeneke mbiet. Idụhe n̄kpọ oro akande mme idaha ido uwem oro enye esịnde udọn̄ ọnọ. Etop esie okop odudu onyụn̄ enyene ufọn. N̄wed emi enyenede anana-mbiet ufọn mi odot se isiode ke itie ubonn̄wed nnyịn inyụn̄ inọ eti ntịn̄enyịn ye ndụn̄ọde.
Nnyịn imekeme ndikụbọde Bible ye ọyọhọ mbuọtidem nte ke enye enen̄ede enen, edi se ẹberede edem, onyụn̄ edi akpanikọ. Mbụk ererimbot ẹsọn̄ọ mme mbụk n̄kpọntịbe oro ẹwetde ke esịt esie. Ndien ndien, mme n̄kpọ oro ẹdọkde ke isọn̄ ẹsion̄o ẹsọn̄ọ nte ke Bible edi akpanikọ onyụn̄ etịn̄ akpanikọ. In̄wan̄în̄wan̄ edu owo 40 m̀mê n̄kpọ ntre oro ẹkewetde Bible owụt mmọ nte mbon akpanikọ ye nsọn̄ọnda. N̄kemuyo oro odude ke esịt Bible owụt nte ke enye itoho owo. Mme n̄kpọntịbe oro ẹwetde ke esịt esie ẹdi ata idem n̄kpọ. Mme owo oro enye etịn̄de aban̄a ẹdi mme ata owo. Mme itie ye mme ebiet oro enye etịn̄de aban̄a ẹdu. N̄ko-n̄ko, Bible ọdọn̄ọ mme n̄wọrọnda prọfesi oro nte owo mîkemeke ndifan̄a ẹwụtde Jehovah Abasi nte Andiwet Bible.—2 Peter 1:21.
Akwa Anditeme nnyịn ama okụt ete ke ifiọk aban̄ade mme uduak esie odu ọnọ mbon oro ẹyomde ndifiọk. Ke akpanikọ, Jehovah asian nnyịn in̄wan̄în̄wan̄ nte ke edi uduak imọ ete kpukpru orụk owo ẹkpep Ikọ esie ẹnyụn̄ “ẹsịm ifiọk akpanikọ.” (1 Timothy 2:3, 4; Mme N̄ke 1:5, 20-33) Emi edi kiet ke otu ata akpan n̄kpọ emi nnyịn ikemede ndida uwem nnyịn nnam. Enye edi n̄kpọ-ata oro nnyịn inyenede ndisak iso nse. Emi ama an̄wan̄a mme akpa Christian. Ama onụk kiet ke otu mmọ ndidọhọ ete: “Mmeben̄e ntem nte, ima mbufo akpakam ọdọdiọn̄ awak ke ifiọk ye kpukpru ikike; man mbufo ẹkeme ndidomo mfiọk se ifọnde ikan.”—Philippi 1:9, 10; Colossae 1:9, 10.
Bible edi akpan usụn̄ oro Andibot adade nditịn̄ uduak esie nnọ ekpụk ubonowo, ndien enye etịn̄ nte nnyịn owo kiet kiet ibuanade ke uduak oro. Ẹwet mme n̄kpọntịbe ini edem ke esịt esie, ndien enye ọnọ in̄wan̄în̄wan̄ ndise aban̄ade ini iso. Bible owụt nnennen ukpepn̄kpọ onyụn̄ ọnọ nnyịn nnennen ndausụn̄ kaban̄a se nnyịn ikponịmde ke akpanikọ ye se nnyịn mîkponịmke. (Utom 17:11; 2 Timothy 3:16, 17) Enye ọnọ mbet ido uwem emi owo akpadade odu uwem, ndien enye ada owo usụn̄ ke usụn̄ oro okụtde unen ye inemesịt. (Matthew, ibuot 5 osịm 7) Enye ọsọn̄ọ etịn̄ aban̄a Obio Ubọn̄ Abasi nte n̄kukụre idotenyịn ofụri ubonowo onyụn̄ owụt nte ukara esie edide n̄kpọutom ndida nnam enyịn̄ esie asana nnyụn̄ n̄wụt unen itie edikara esie. Bible anam an̄wan̄a usụn̄ oro oyomde nnyịn ibịne man ikpadara n̄kpet n̄kpet, ima ima itie ebuana ye Ọnọ-Uwem nnyịn, kpa Jehovah.
N̄ko-n̄ko, Bible edi n̄kukụre n̄wed oro edidade fi okosịm n̄kponn̄kan utịp oro akanam ubonowo edibọde—nsinsi uwem ke paradise isọn̄ nte mfọnmma owo. (Rome 6:23) Ikpọn̄îkpọn̄ edibon Eyen Jehovah asian nnyịn ete: “Nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ke akpanikọ n̄wed oro enyenede utọ akwa ufọn oro ekpenyene ndinụk nnyịn ndikpep se anade nnyịn inam man ibọ enọ nsinsi uwem. Bible edi n̄wed oro ẹkewetde man an̄wan̄a owo, nte ibuotikọ etienede ediwụtde.