Abraham—Ẹkebụk Mi, ke Osụk Ododu Uwem?

Ke ediwak isua ikie mme Jew, mbon Muslim, ye mme Christian ẹmenam isan̄ ẹka ebiet emi.

Afo emekeme ndinam isan̄ n̄kese enye ke obio Hebron eset, edem usụk Jerusalem. Ẹkot n̄kpọ oro ẹbọpde mi Haram el-Khalil ye Itiatudi Mme Ete ekpụk. Ih, emi edi se ẹnyịmede ntatara ntatara nte itie emi ẹkebụkde mme ete ekpụk oro Abraham, Isaac, ye Jacob, ọkọrọ ye ibanndọ mmọ kiet kiet Sarah, Rebekah, ye Leah.

Ti nte Bible etịn̄de ete ke Sarah, edima n̄wan esie ama akakpa, Abraham ama edep ebiet ubụkowo abaitiat ye ndusụk isọn̄ ke Machpelah, ekperede Hebron. (Genesis 23:​2-⁠20) Ekem, ẹma ẹbụk Abraham mi n̄ko, nte ẹkenamde ye mbonubon eken. Ediwak isua ikie ke ukperedem, ke n̄kanade itie udi ẹkpụk oro, Akamba Herod ama ọbọp ediye ufọk emi mme andikan ke ekọn̄ ẹkediọn̄de ẹnyụn̄ ẹnamde okpon, owụtde mme edinịm ke akpanikọ eke ido ukpono mmọ.

Ke odụkde, afo eyekụt itiatudi itiokiet (mme n̄kpọ editi m̀mê ukpọk udi). Udiana n̄kpọ oro ẹnamde ẹnịm owụt eke Isaac, eyen Abraham. Mme odudu ẹdu ke isọn̄ oro ẹkperede enye, emi ẹkesidade ẹsan̄a ẹkesịm se idude ke idak. Mme anam ndụn̄ọde ẹmekụt mme ukpe oro ẹkemede ndidi ama ọdọn̄ọ ediwak ọkpọ mbon eset.

Nso kaban̄a Abraham? Edieke edide ẹkebụk enye ke abaitiat oro odude idahaemi ke idak ebiet emi, enye ama akpa ke anyanini, nte oro idịghe akpanikọ? Ediwak mme andika n̄kese ẹyenyịme ye oro. Edi prọfet oro okponde akan Abraham ama ọdọhọ ete ke Abraham ke osụk odudu uwem ke ndusụk usụn̄ifiọk. Didie? Ndien nso ebuana ke emi ekeme ndinyene ye mbuọtidem fo?

Mbọk kot ibuotikọ emi “Mbonima Fo Oro Ẹkekpade​—⁠Mmọ̀n̄ ke Mmọ Ẹdu?” (Page 3) Enye owụt se akwa prọfet oro eketịn̄de aban̄a Abraham ndidu uwem, kpa ntọt emi ekemede ndinyene akwa ufọn nnọ fi ye ubon fo.