Mbonima Fo Oro Ẹkekpade M̀mọ̀n̄ ke Mmọ Ẹdu?
ẸMA ẹbụme inyene Alec. Ke ufan̄ urua kiet, enye ama ataba iba ke otu mme ufan esie. Nevil, kiet ke otu mmọ, akakpa ke unan oro ẹketopde enye ke ikan̄. Tony, enye eken, akakpa ke mbabuat n̄kpọntịbe moto. Mme mbụme oro akanam mîkafịnake enye mbemiso ẹma ẹdifịna eyeneren isua 14 idụt South Africa emi idahaemi. Enye ama ekere ete, ‘Ntak emi mme owo ẹnyenede ndikpa? Ndien nso itịbe ke owo ama akakpa?’
Ke usụn̄ esie ndika itie n̄kpa Nevil, Alec ke esịt akpanikọ ama odori enyịn ke imọ iyenyene mme ibọrọ inọ mme mbụme ẹmi. Enye eti ete: “Edi, oku oro n̄kukụre okokot oto n̄wed kiet onyụn̄ ọdọhọ ete ke Nevil ama aka heaven. Ndien, ke itie udi, enye ama ọdọhọ ete ke nnyịn ibet ediset ke n̄kpa. Oro ama otịmede mi. Edieke Nevil okodude ke heaven, enye akpasan̄a didie ebet ediset ke n̄kpa?”
Ekem ke ukem usen oro, Alec ama aka itie n̄kpa Tony. Ẹkenịm edinam oro ke usem oro enye mîkọfiọkke. Edi, idat idat usụn̄ unam n̄kpọ eke ndusụk mme andifụhọ n̄kpa oro ama anam Alec onịm ke akpanikọ nte ke owo ikọnọhọ ndọn̄esịt ndomokiet. Enye anam an̄wan̄a ete: “Esịt ama ayat mi idiọk idiọk okoneyo oro. Mma nnana un̄wam nnyụn̄ mfiọkke se n̄kpanamde. Owo ndomokiet ikekemeke ndinọ nti ibọrọ ke mme mbụme mi. Ke akpa ini ke uwem mi, ami mma nnen̄ede n̄kere m̀mê Abasi odu.”
Ke isua kiet kiet, ukem nte Alec, ediwak miliọn owo ẹsitaba mbonima mmọ ke n̄kpa. 1992 Britannica Book of the Year anam an̄wan̄a ete: “Ke ofụri ererimbot, mbon oro ẹkekpan̄ade ke 1991 ẹkedi 50,418,000.” Ndien miliọn ifan̄ efen efen ẹkam ẹkpan̄a ọtọn̄ọde ke ini oro? Kere ban̄a mmọn̄eyet oro ebietde inyan̄ emi mme oduuwem ẹsiduọkde! Se itịpde isịn ke mfụhọ mmọ edi ndutịme oro otode mme akama-ntuaha ekikere oro ẹnyenede ẹban̄a n̄kpa.
Nte ediwak owo, ukem nte Alec, ẹmekabade ẹdu ke mfụhọ ẹnyụn̄ ẹyịk m̀mê isọn̄ ekededi odu ọnọ idotenyịn uwem ini iso ke owo ama akakpa. Nte ekemde ye Encyclopedia of Religions, “ke kpukpru eyo, mme ekere n̄kpọ owo ẹmewọrọ ẹda san̄asan̄a ẹkpọn̄ otuowo, . . . ẹyịkde nte ukpọn̄ m̀mê uwem owo ekemede ndidu n̄kpọn̄ mfre ye idem owo.”
Nte enemde, n̄wed ofụri-orụk-ifiọk eke enyọn̄ emi onyịme nte ke ekikere ido ukpono oro nte ke ukpọn̄ oro mîkpaha ke nsinsi odu ọkpọn̄ idem owo inyeneke nsọn̄ọ ke Bible. Edi akpanikọ, ke ibat ibat itie, Bible etịn̄ aban̄a “ukpọn̄” owo nte ọkpọn̄de akam onyụn̄ afiakde odụk idem akpan̄kpa, edi ke mme idaha ẹmi ẹda “ukpọn̄” ke ekikere ediduọk m̀mê edinyene “uwem.” (Genesis 35:16-19; 1 Ndidem 17:17-23) Ata ediwak ini, ẹda ikọ oro “ukpọn̄” ke Bible nditịn̄ mban̄a mme edibotn̄kpọ eke obụk ye iyịp oro ẹkụtde ke enyịn, ih, mme oduuwem edibotn̄kpọ. (Genesis 1:20; 2:7) Ntem, Bible etịn̄ ndien ndien nte ke ukpọn̄ esikpa. (Ezekiel 18:4, 20; Utom 3:23; Ediyarade 16:3) Ikọ Abasi ọdọhọ ete ke ndondo oro mme ukpọn̄ ẹkpade, mmọ “ifiọkke baba n̄kpọ kiet.”—Ecclesiastes 9:5, 10.
Ke n̄kan̄ eken, Bible esịne mbụk mme akpan̄kpa oro ẹkenamde ẹfiak ẹdu uwem. Ke eke Lazarus, emi okotịbe ke enye ama akakpa ke usen inan̄. (John 11:39, 43, 44) Nso, ndien, iditịbe inọ mbon oro ẹkekpan̄ade ke ediwak isua ikie m̀mê ediwak tọsịn isua ko? Nte idotenyịn uwem ini iso mmọ oyom ete Abasi anam ata ukem idem oro mmọ ẹkenyenede ke ini mmọ ẹkpade ẹset?
Baba-o. Utọ ekikere oro ikemke ye se itịbede inọ mme n̄kpatan̄a n̄kpọ oro ẹnamde okpo owo. Nte ini akade, ndusụk n̄kpatan̄a n̄kpọ ẹmi ẹsibe ẹdụk mme ikọn̄ ẹmi ẹkabarede ẹdi udia ẹnọ mme edibotn̄kpọ eken ẹnyụn̄ ẹkabade ẹdi ubak idem mmọ.
Nte emi ọwọrọ ke idotenyịn idụhe inọ mbon oro ẹkekpade ke anyanini? Baba-o. Andibot akwa ekondo nnyịn enyene utịbe utịbe ibuot uti n̄kpọ oro mînyeneke adan̄a. Ke mfọnmma ibuot uti n̄kpọ esie, enye enyene ukeme nditi edu ye mbiet owo ekededi eke akpade oro enye emekde nditi. Akande oro, Jehovah Abasi enyene odudu ndifiak mbot idem owo ye ata ukem nsen ubon oro okodude uwem akpa. Enye n̄ko ekeme ndinọ owo oro enye etide, utọ nte Abraham, ibuot uti n̄kpọ ye edu oro enye ekenyenede.
Ke ekperede tọsịn isua iba ke Abraham ama akakpa, Jesus Christ ama ọnọ nsọn̄ọ emi ete: “Edi kpa Moses etịn̄ ke ibuot n̄wed emi otụkde eto oro, aban̄a ete ẹnanam mme akpakpa ẹset, ke adan̄aemi okotde Jehovah ete, Abasi Abraham, ye Abasi Isaac, ye Abasi Jacob. Enye idịghe Abasi mme akpan̄kpa, edi edi eke mme oduuwem: koro kpukpru owo ẹdu uwem ẹnọ Enye.” (Luke 20:37, 38) Ke ẹsiode Abraham, Isaac, ye Jacob ẹfep, ediwak miliọn mme akpan̄kpa eken ẹdi mme oduuwem ke ibuot uti n̄kpọ Abasi, ẹbetde ediset ke n̄kpa oro edide. Bible ọsọn̄ọ ete: “Nti ye mme idiọk owo ẹyeset ke n̄kpa.”—Utom 24:15.
Urua ifan̄ ke n̄kpa oro ama ẹkebe, Alec ama enyene mme ibọrọ ọnọ mbụme esie. Kiet ke otu Mme Ntiense Jehovah ama awaha ufọk esie onyụn̄ owụt enye se Ikọ Abasi etịn̄de aban̄a n̄kpa ye ediset ke n̄kpa. Emi ama ọdọn̄ Alec esịt onyụn̄ anam uwem esie enyene se ọwọrọde ke usụn̄ efen.
Nte afo n̄ko akpama ndikpep n̄kpọ efen efen mban̄a idotenyịn ediset ke n̄kpa oro ọkọn̄ọde ke Bible? Ke uwụtn̄kpọ, nte ekese ediset ke n̄kpa ẹdida itie ke heaven m̀mê ke isọn̄? Ndien nso ke ana owo anam man enyene unyịme Abasi onyụn̄ okụt edisu utịbe un̄wọn̄ọ Esie nte ke mme owo ẹkeme ndifiak ndiana ye mbonima mmọ oro ẹkekpade?