“Mme Ntiense Jehovah Ẹma Ẹkpeme Mi!”
KE MME akpatre usen ẹmi, ediwak owo “etie obom obom, ẹnyụn̄ ẹsua se ifọnde.” (2 Timothy 3:1, 3) Isaac, asan̄autom unyịmesịt ke ọfis n̄kọk itieutom Watch Tower Society ke West Africa, ama okụt nte emi edide akpanikọ. Enye obụk ete:
“Ke January 1992, ami n̄kaka isan̄ ke ndobo ndobo usụn̄ ke taksi ye mme akaisan̄ ition efen. Mma ntọn̄ọ nneme ye n̄wan oro eketiede adiana mi, ndien enye ke inemesịt ama onyịme ndibọ mi ekpri n̄wed oro ọkọn̄ọde ke Bible.
“Ke mbuari, ke n̄kpọ nte n̄kanika inan̄ uwemeyo, obufa moto oro mînyeneke nọmba ama ọbiọn̄ọde nnyịn ke iso, ndien moto nnyịn ama atuak ada ye ọkpọsọn̄ uyom. Mme okopidem irenowo ita, kpukpru mmọ ye ikan̄, ẹma ẹfrọ ẹn̄wọn̄ọ ke moto oro ẹnyụn̄ ẹberede usụn̄ moto nnyịn idat idat. Owo kiet ke otu mmọ ama ofiori ete, ‘Kpukpru mbufo ẹwọn̄ọ.’
“Eren efen ama ọbọ mi ekpatn̄wed mi. Ke ini enye okokụtde ete ke n̄wed ukpep Bible ikpọn̄ ẹkedọn̄ọ, enye ama otop ekpat oro ọduọk. Enye ama obụp ete, ‘Nso efen ke enyene?’ anyande mi ikan̄ esie. Mma nsọsọp nnọ enye okụk oro ekesịnede ke ekpri ekpatokụk mi. Enye ama obụp ete, ‘Okụre ke emi?’ Mma nsian enye nte ke ami ndi kiet ke otu Mme Ntiense Jehovah ye nte ke Mme Ntiense isisụhe nsu. Enye ama awabade ekpri ekpatokụk mi ọbọ, okụt kad idiọn̄ọ Watch Tower mi ndien ekem ọdọhọ ete, ‘Ọfọn, Watchtower. Tuak da mi.’
“Ekem, enye ama ọwọn̄ọde ebịne eyenan̄wan oro n̄kenyenede nneme ke taksi. Enye usọp usọp ama osio n̄kwaitọn̄ esie ọnọ onyụn̄ ọnọ enye okụk oro okodude ke ekpatokụk esie. Ke ini inọ emi okokụtde ekpri n̄wed oro ke ubọk esie oro ekenyekde, enye ekekere ete ke nnyịn ikasan̄a kiet, ndien ke ntre enye anyan ubọk ete enye ada ye ami.
“Kan̄a kemi, inọ eken ẹma ẹbịne ekemmọ mbonisan̄ nnyịn afai afai. Mmọ ẹma ẹmia ẹnyụn̄ ẹwo awat o-moto ye eren enye eken oro akasan̄ade ye nnyịn. Inọ kiet ama omụm n̄kwaitọn̄ ọyọhọ n̄wan iba. Ke ini enye akan̄wanade ndibiọn̄ọ, mmọ ẹma ẹda etak ikan̄ ẹyịbi enye ke ibuot ye ikpanesịt idiọk idiọk tutu enye akpa. Mmọ ẹma ẹdụri ọyọhọ n̄wan ita ẹsio ke moto ẹnyụn̄ ẹtop enye ke ikpanesịt. Edi n̄kpọ mbọm, enye n̄ko ama akpa. Ami kpọt ye n̄kaiferi oro akadade ye ami ke owo mîkọnọhọ unan ndomokiet.
“Ke ini moto oro akawatde ebe ekemende nnyịn, n̄wan oro okokopde ndịk do ama akaiso ndidọhọ ndien ndien ete ‘Mme Ntiense Jehovah Ẹma Ẹkpeme Mi!’”