Okoneyo Oro Ẹnyenede Nditi

E ATA akpan usen kiet ke se ibede isua 3,500 ẹmi ẹkebede, Jehovah Abasi ama anam nditọ Israel ẹmi ẹkedide ifịn ke Egypt ẹwot eyenerọn̄ ẹnyụn̄ ẹsịme iyịp esie ke enyịnusụn̄ ye ke mme itịm ufọk mmọ. Kpa ke okoneyo oro, angel Abasi ama asan̄a ebe mme ufọk oro ẹkenịmde idiọn̄ọ ke utọ usụn̄ emi edi ama owot mme akpan ke mme ufọk kpukpru nditọ Egypt. Nditọ Israel adan̄aoro ẹma ẹwọrọ ke ufụn. Ọtọn̄ọde ke ini oro, ke ukem usen n̄kpọntịbe oro ke isua ke isua, mme Jew ẹma ẹsinịm Passover.

Ndondo oro ke Jesus Christ ama okokụre ndinịm akpatre Passover esie ye mme apostle esie, enye ama ọtọn̄ọ udia oro edinamde ẹti n̄kpa uwa esie. Enye ama ayak uyo ọnọ mme anam-akpanikọ apostle esie onyụn̄ ọdọhọ ete: “Ẹbọ, ẹta; emi edi ikpọkidem Mi.” Ekem enye ama ayak cup wine ọnọ mmọ onyụn̄ ọdọhọ ete: “Mbufo kpukpru ẹda ẹn̄wọn̄; koro emi edi iyịp Mi, eke ediomi, emi ẹduọkde ẹban̄a ediwak owo, man ẹfen mme idiọkn̄kpọ mmọ.” Jesus ama ọdọhọ n̄ko ete: “Ẹnam emi nditi Mi.” (Matthew 26:​26-⁠28; Luke 22:​19, 20) Ntre Jesus ama owụk mme anditiene enye ndinịm usọrọ n̄kpa esie emi.

Mme Ntiense Jehovah ẹnọ fi ufiop ufiop ikot ndibuana ye mmọ ke ndinịm usọrọ Editi n̄kpa Jesus emi. Afo emekeme ndidụk ke Ufọkmbono Obio Ubọn̄ emi ekperede ufọk fo akan. Bụp Mme Ntiense ẹmi ẹdude ke n̄kann̄kụk fo ban̄a nnennen ini ye ebiet. Usenọfiọn̄ usọrọ emi ke 1994 edi Saturday, March 26, ẹmende uyo ye wine ẹkanade ke utịn ama okosụhọde.