Ndika Heaven m̀mê Hell?

“NSO idi mme ifet oro ẹdude ẹnọ fi ndika heaven m̀mê ndika hell?”

Ata akpan n̄kpọ edi nte ke ẹma ẹbụp otu mbon America mbụme emi ke ndụn̄ọde oro ẹkenamde ke ndondo emi. Itie Unam Ndụn̄ọde Mban̄a Ido Ukpono Princeton ama emịn̄ mme ibọrọ ke Religion in America 1992-1993.

Didie ke afo ọkpọkọbọrọ? Nso idi ifet odude ọnọ nsan̄a ndọ fo m̀mê mbonima fo eken ndika heaven ke ẹkpade? Nte afo emekere ke afo, m̀mê mmọ ẹkeme ndika hell ke akpatre?

Ndụn̄ọde oro owụt nte ke mbahade 78 eke ikie ẹkere ke mme ifet mmọ ndika heaven okpon m̀mê okpon etieti, akan ibọrọ oro ẹkenọde n̄kpọ nte isua 40 ẹmi ẹkebede. Hell? N̄kpọ nte mbahade 77 eke ikie ẹdọhọ ẹte ke ifet edika do ekedi esisịt.

Nte ibọrọ mmọ ọkọkọn̄ọ ke nnennen ifiọk Bible? Ọfọn, n̄kpọ nte owo 4 ke otu owo 10 ẹnyịme nte ke imetek ubọk ke ndidụk mme edinam ido ukpono ikan nte ekedide ke isua ition ẹmi ẹkebede. Mbahade 28 eke ikie kpọt ẹdọhọ nte isibuanade ke mme otu ukpepn̄kpọ Bible ye mbahade 27 ẹbuanade ke mme ukpepn̄kpọ ido ukpono.

Edieke afo ekpepde Bible ye ntịn̄enyịn, afo eyekụt ndusụk akpanikọ oro akpade owo idem. Ke uwụtn̄kpọ, Bible owụt in̄wan̄în̄wan̄ nte ke Jesus ke ama akakpa ama aka “hell” nte esịnde ke ndusụk edikabade Bible. (Utom 2:31, King James Version; “Hades,” New World Translation) Ikọ Abasi owụt n̄ko nte ke Edidem David m̀mê John Andinịm owo baptism ikakaha heaven ke ẹkpade. (Matthew 11:11; Utom 2:29) Mmoemi ẹdi akpanikọ, idịghe mme ikpîkpu ekikere otode ndụn̄ọde ido ukpono.

Mme akpanikọ eken oro ekemede nditụk fi: Bible ekpep nte ke ẹyemen mme apostle Jesus ye ibat ibat mmọ en̄wen ẹka heaven man ẹkekara ye Jesus. Nte ededi, ata ediwak owo oro ẹma ẹkekpan̄a ẹka ikpîkpu udi ubonowo. Abasi eyenam mmọ eset, anamde mmọ ẹdidu uwem ke isọn̄ ye idotenyịn anana utịt uwem oro ọyọhọde ye inemesịt ke paradise eke isọn̄ oro ẹfiakde ẹwụk.

Mme Ntiense Jehovah ẹyedara ndin̄wam fi enyene isọn̄ oro enyenede iwụk kabana idotenyịn emi ke Bible fo.