Ntọt M’Ọkwọrọ Obio Ubọn̄

Nsọn̄ọnda Ada Nti Utịp Edi

JESUS ama ebemiso etịn̄ nte ke ẹyekọbọ mme anditiene enye, kpa ntre ke apostle Paul eketịn̄, nte ẹwetde ke 2 Timothy 3:12 ete: “Ke akpanikọ kpukpru owo eke ẹyomde ndidu eti uwem ke Christ Jesus ẹnyene ndibiom isịnenyịn.” Edi ndisọn̄ọ nda nnam n̄kpọ Jehovah Abasi esida nti utịp edi.

◻ Emi ekedi ntre ke obio kiet ke mbenesụk n̄kan̄ ufọt edem edere ye edem usiahautịn Malaysia. Okposụkedi enye ekedide enyene-ifịk owo Ido Ukpono Buddha emi ekesinọde nditọ esie ukpep ntotụn̄ọ ntotụn̄ọ, ete kiet ikekemeke ndibiọn̄ọ nditọiban esie ita ye nditọiren esie ita ndikpep Bible ye Mme Ntiense Jehovah. Idem n̄wan esie ama owụt udọn̄ ke akpanikọ. Ekem usen kiet mbọhọidụn̄ kiet ama asak enye ete: “Anam didie afo mûnyeneke odudu ke idem nditọ fo onyụn̄ ayakde mmọ ẹkabade ẹdi Mme Ntiense Jehovah? Kpukpru nditọ mi ẹdiana ye ami ye ke Ido Ukpono Buddha eke mme eteete nnyịn. Afo emenyene mbọm-⁠e!”

Ete oro ama efehe ọnyọn̄ ufọk onyụn̄ aduak ndikamia eyenete an̄wan oro ekekpepde n̄kpọ ye nditọ esie. Nte ededi, nditọ esie ẹma ẹnam enye osụhọde esịt ẹnyụn̄ ẹkaiso ndikpep Bible ye Mme Ntiense Jehovah nnyụn̄ ndụk mme mbonoesop ye un̄wam eka mmọ.

Nte ededi, ke akpatre, ete oro ama okot ofụri ubon obon ọtọkiet. Enye ama odọhọ mmọ ete, “Ẹmek ndidụn̄ ke ufọk ye ami m̀mê ndikabade ndi mme Christian nnyụn̄ n̄kpọn̄ ufọk.” Akpan esie, kpa eyen erenowo emi esitịn̄de ikọ sụn̄sụn̄, ama ọsọsọp atan̄ n̄kpọ ndikpọn̄ ufọk. Ete ama ofiori ete, “Baba! Sia kpukpru mbufo ẹdide nditọ nsọn̄ibuot, ọfọn ami ndikpa.” Enye ndien ama efehe ọwọrọ ke ufọk, mbonubon esie ẹma ẹfehe ẹbịne ẹkekpe enye ubọk ẹte okûwot idem. Ke n̄kpeubọk mmọ ama okotụk enye ke idem, enye ama afiak ọnyọn̄ ufọk.

Ini ama ebe. Ete oro ama ọtọn̄ọ ndikụt eti utịp akpanikọ Bible ke eduuwem nditọ esie. Usen kiet enye ama osobo ye ufan esie oro akasakde enye, oro idahaemi ekedide owo mfụhọ, emi ọkọdọhọde ete: “Ami mmokụt edikpu idiọk idiọk mban̄a nditọ mi. Mmọ ẹtụk mi ẹnyụn̄ ẹyịp mme n̄kpọ mi.” Edi ete oro nditọ esie ẹkekpepde n̄kpọ ye Mme Ntiense Jehovah ama ọdọhọ ete: “Oh, nditọ mi ẹdi isio isio! Mmọ ẹfọn ido ye ami etieti idem ẹn̄wamde mi ndikpe okụk oro n̄kọbuọtde ndep moto ke ini mmen̄kenyeneke utom.”

Mfịn, nditọiban ita ye eka mmọ ẹma ẹna baptism. Eyeneren kiet edi akpan asiakusụn̄. Nso kaban̄a akani enyene-ifịk ye ayatesịt ete oro? Enye idahaemi etie ufan ufan ndien ama odụk Editi.

Jehovah ama ọnọ eyeneren oro ye nditọeka esie iban ita oro ọkọrọ ye eka mmọ utịp ke ntak nsọn̄ọnda mmọ ke n̄kan̄ Esie. Mmọ idahaemi ẹdi mme enyene-ifịk ọkwọrọ Obio Ubọn̄ ẹmi ẹnamde esịt Jehovah adat.​—⁠Mme N̄ke 27:11.