Nte Eto

“MME ndisịme owo nte ami ẹtịn̄ uto, edi Abasi ikpọn̄ ekeme ndibot eto.” Ke otorode uyai ediwak eto, ewet-uto oro Joyce Kilmer ke ntre ama ọnọ Abasi itoro ke ndikobot mmọ.

Jehovah Abasi ama anam mme eto oro ẹnyenede ediwak uduot, uyai, ye ufọn. N̄kpri eto ye ikpọ eto ukem ukem, mmọ ẹkeme ndinen̄ede nye uyai tutu mmọ ẹkak inua nditịn̄. Akande oro, mme eto ẹsinọ udia, ifia, ye itie udakibuot. Ndien mme ọdiọn̄ n̄kpọ ke ẹkaiso ndiyom mbufa usụn̄ ndida eto nnam n̄kpọ.

Ke Bible, ẹsida mme eto ndusụk ini ẹtịn̄ ikọ ke ndamban̄a usụn̄ ndida nnọ mme obio ubọn̄, mme andikara, ye mme owo. (Ezekiel 31:1-18; Daniel 4:10-26) Ẹsiak mme eto ke ebuana ye idara idara, emem emem, ye nti idaha oro osụn̄ọde oto itie edidem Jehovah ye edifiak n̄wụk ikọt esie. (1 Chronicles 16:33; Isaiah 55:12; Ezekiel 34:27; 36:30) N̄wed Abasi n̄ko ọn̄wọn̄ọ ete ke usen ikọt Abasi ẹyebiet usen eto. (Isaiah 65:22) Emi enyene se ọwọrọde akamba akamba ke ini nnyịn ifiọkde ite ke ndusụk eto ẹsidu uwem ke ediwak isua ikie.

Andiwet psalm eke Bible ọkọdọhọ ete ke owo eke mbet Abasi adatde enye esịt “ebiet eto eke ẹtọde ke mben akpa mmọn̄, eke esion̄ode mfri esie ke ekemini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.” Ediye eto oro etọde ke mben akpa mmọn̄ ama eti andiwet psalm aban̄a mfọnọn̄kpọ eke spirit eke mbon oro “mbet Jehovah adatde . . . esịt.” (Psalm 1:1-3) Edieke afo okopde ata idatesịt ke mbet Abasi ye Edisana Ikọ, mme usen fo ẹkeme ndikabade ntie nte eke mme eto. Ke akpanikọ, ke ndinam n̄kpọ ke n̄kemuyo ye nnennen ifiọk Jehovah Abasi ye Jesus Christ, afo emekeme ndinyene idotenyịn uwem nsinsi.—John 17:3.