Ini Ukpen̄e!
NTAK emi mbụk “Ido Ukpono Christ” okpụhọrede ntem ye mme Christian-a? Ediwak mme ekere n̄kpọ owo ẹsibụp mbụme emi, edi Jesus ama ọbọrọ emi ke se ikperede isua 2,000 ẹmi ekebede ke n̄ke. Enye ama etịn̄ aban̄a “owo eke asuande eti n̄kpasịp ke in̄wan̄ esie.” Ekem, “owo usua esie edi edisuan idiọk n̄kpasịp.” Ke ini n̄kpasịp oro ẹtịbede, mbonutom ẹma ẹkụt idiọk n̄kpasịp ẹnyụn̄ ẹyom ndidịbede mmọ nsio. Edi owo oro ama ọdọhọ ete: “Ẹyak mmọ mbiba ẹkọri ọtọkiet tutu osịm ini ukpen̄e.” Ke ini ukpen̄e, ẹyebahade ibokpot ẹsio ke otu idiọk n̄kpasịp.—Matthew 13:24-30.
Jesus, ke anamde n̄ke emi an̄wan̄a, ama ọdọhọ ete ke imọ ke idemmọ ikedi enyeoro ọkọtọde “eti n̄kpasịp”—mme Christian akpanikọ. Owo usua oro ekedi Satan, emi ekedide edisuan “idiọk n̄kpasịp”—mme nsunsu Christian abian̄a ke esop. Jesus ama ayak mme nsunsu Christian ye mme Christian akpanikọ ẹdu ọtọkiet—edi tutu osịm ini ukpen̄e. Ekem ẹyebahade mmọ.—Matthew 24:36-44.
Ntem, ikpaha nnyịn idem ke ini ifiọkde ite ke mme esop “Christian” ke ofụri ediwak isua ikie ẹmesuene Abasi ebe ke ndikpep mme ukpepn̄kpọ mme okpono ndem, ndinyịme oburobụt ido, ndinọ mme ekọn̄ edikan ibetedem, ye nditịm mme ibak ibak ukọbọ. Ke emi ke nnyịn ifiọk idiọk n̄kpasịp oro Satan ọkọtọde. Nte ededi, ke ini nnyịn ikotde iban̄a mme owo oro ẹbọde ufen n̄kpọkọbi m̀mê n̄kpa utu ke ndibiat mme edumbet Bible, nnyịn ikụt ite ke owo ikosoboke eti n̄kpasịp oro ofụri ofụri.
Jesus ọkọdọhọ ete ke ini ukpen̄e ekedi “akpatre ini eyo emi.” Sia nnyịn idude uwem ke akpatre ini eke editịm n̄kpọ eke odude kemi, anaedi ini ukpen̄e edi emi! Ntre anaedi edibahade ama adada itie ke ufọt mme Christian akpanikọ ye mme nsunsu Christian. Mfịn, ana odu otu mme owo, idịghe sụk owo kiet kiet oro mîdianake kiet, emi ẹkemde ye utịn̄ikọ Jesus aban̄ade mme Christian akpanikọ—emi ẹdide mme andidu ke idak ukara Obio Ubọn̄ Abasi ẹnyụn̄ ẹkwọrọde eti mbụk ẹban̄a enye, emi emenerede ido uwem oro ọkọn̄ọde ke Bible ke enyọn̄ ẹnyụn̄ ẹsịn mme ukpepn̄kpọ mme okpono ndem ke ntak akpanikọ Bible, emi ẹyararede enyịn̄ Abasi mînyụn̄ idịghe ubak ererimbot.—Matthew 6:33; 24:14; John 3:20; 8:32; 17:6, 16.
Nnyịn imọnọ fi nsọn̄ọ nte ke utọ mme owo oro ẹdu! Nte afo omoyom ndinam n̄kpọ Abasi ke usụn̄ oro enye onyịmede? Do yom mme owo emi kụt, nyụn̄ nam n̄kpọ Abasi ye mmọ.