Nte Ẹda Edikịm Iyịp Nsịn ke Idem ke Akpan N̄kpọ Ẹkaha?
Edikịm iyịp nsịn ke idem edi ọsọ n̄kpọ ke ibọkusọbọ eyomfịn, edi nte mmọ ẹfọn nte etop oro mmọ ẹwọrọde? Afo ekere didie?
Ke The American Journal of Medicine (February 1993), Dr. Craig S. Kitchens ama obụp ete: “Nte ẹda edikịm iyịp nsịn ke idem ke akpan n̄kpo ẹkaha?” Enye ama ọdọhọ ete ke mbiaibọk usọbọ ẹsiwak ndidomo ye ntịn̄enyịn nse m̀mê ufọn oro usọbọ ẹnyenede okpon akan n̄kpọndịk oro enye ekemede ndida ndi. Nso kaban̄a edikịm iyịp nsịn ke idem?
Kitchens ama afiak odụn̄ọde uyarade oro aban̄ade n̄kpọndịk eke ndondo emi oro enyenede ebuana ye edikịm iyịp nsịn ke idem, utọ nte udọn̄ọ esịt, edibiat editịbe idemowo, ndido idemowo nditre ndinam utom ọfọn, ye mme ntuaha oro ẹdude ke ini ẹsiode ndido idemowo ẹsịn ke owo efen. Ndụn̄ọde kiet oro etịn̄de ibio ibio aban̄a “ekese mfịna” otode edikịm iyịp nsịn ke idem “ama eberi ete ke edikịm iyịp nsịn ke idem kiet kiet enyene idiọk utịp oro edide mbahade 20 eke ikie ke ẹtan̄de kpukpru ẹdian ọtọkiet, emi ndusụk ẹdide n̄kpri edi mmọ eken ẹsinọ unan oro owo mîkodorike enyịn,” idem ẹdide n̄kpọ n̄kpa.
Nte ededi, ndi mme ufọn oro ẹdọhọde nte ẹnyenede mi odot ndisak iso nse mme utọ n̄kpọndịk oro?
Dr. Kitchens ama afiak odụn̄ọde ndụn̄ọde 16 oro ẹdọhọde nte ẹkenamde ẹmi ẹbuanade usiakidem 1,404 ẹmi ẹkenamde Mme Ntiense Jehovah, ẹmi ẹkesịnde edikịm iyịp nsịn ke idem ke n̄kopitem nnọ ewụhọ Bible oro ọdọhọde ‘ẹbet iyịp.’—Utom 15:28, 29.
Nso ikedi utịp? “Etie nte ubiere Mme Ntiense Jehovah nditre ndibọ edikịm iyịp nsịn ke idem ke mme akpan usiakidem adian ibat n̄kpan̄a edide mbahade 0.5 osịm 1.5 eke ikie ke n̄kpọndịk oro usiakidem enyenede ke ofụri ofụri. Adan̄a ediwak ibat udọn̄ọ ye n̄kpan̄a oro ẹfepde ke nditre ndibọ iyịp in̄wan̄ake, edi anaedi mmọ ẹwak ẹkan n̄kpọndịk oro ẹnyenede ẹto editre ndibọ edikịm iyịp nsịn ke idem.” (Sịghisịghi ubọkn̄wed edi eke nnyịn.) Nso ke ikọ esie ọkọwọrọ? Anaedi n̄kpọndịk oro enyenede ẹto ibọkusọbọ ekededi ke ndisịn ndibọ iyịp ekpri akan mme n̄kpọndịk oro ẹbuanade ke ndinyịme edikịm iyịp nsịn ke idem.
Ntem, mbụme Kitchens emi esịnede ifiọk edi: “Edieke editre ndikịm iyịp nsịn Mme Ntiense Jehovah ke idem enen̄erede osụn̄ọ ke esisịt udọn̄ọ ye n̄kpa efen efen onyụn̄ akpande ikpọ utịp ye mfịna oro ẹbịghide, nte mbon udọn̄ọ ẹkpebọ esisịt edikịm iyịp nsịn ke idem?”
Mbon oro ẹtrede ndibọ edikịm iyịp nsịn ke idem ke ntak utọ uyarade oro ẹyenam n̄kpọ n̄ko ke n̄kemuyo ye mme ndausụn̄ otode Andibot nnyịn.