Nte Akanam Emesịn Ikan̄ ke Akai?

AFO EYEDỌHỌ, ih ih. Edi bet ise! Ekeme ndidi emesịn. Kpan̄ utọn̄ ke mme ikọ mbet James emi: “Edeme edi ekpri ndido, edi enye obụre ata akamba mbụre. Se nte ata ekpri ikan̄ obuberede ata akwa akai.”—James 3:5.

Edeme edi akpan ndido utịn̄ikọ, edi ẹsida enye ẹnam n̄kpọ ke idiọk usụn̄ didie ntem! Mme owo ẹsida edeme ẹsu nsu ẹnyụn̄ edọk edidọk. Mmọ ẹda enye ẹsụk mmọ en̄wen uyo ke idiọk usụn̄, ẹbiat eti enyịn̄ mmọ, ẹnyụn̄ ẹbian̄a mmọ. Mme adaiso ntịme ẹsida edeme ndisịn nsọk ke en̄wan ukpụhọ ukara. Adolf Hitler ama ada eke esie anam mme idụt ẹn̄wana ekọn̄—‘ikan̄ akai’ ke akpanikọ!

Idem mbon oro ẹnyenede nti uduakesịt ẹkeme ndisịn ekpri ‘ikan̄ akai.’ Nte akanam afo emetịn̄ ikọ ndien ekem ke ndondo oro afo ekere ke ikpakanaha etịn̄ emi? Ke edide ntre, an̄wan̄a fi se ikọ James ọwọrọde ke ini enye ọkọdọhọde ete: “Edi amaedi edeme, baba owo kiet ikemeke ndisụk enye nnịm.”—James 3:8.

Edi, nnyịn imekeme ndidomo ndida edeme nnyịn nnam se ifọnde. Ukem nte andiwet psalm, nnyịn imekeme ndibiere ite: “Nyekpeme usụn̄ mi, man n̄kûdue ke edeme mi.” (Psalm 39:1) Utu ke ndisụk mmọ en̄wen uyo ke idiọk usụn̄, nnyịn imekeme ndidomo ndinam mmọ ẹkọri. Utu ke ndidọk mme owo edidọk, nnyịn imekeme nditịn̄ nti ikọ idian mmọ. Utu ke utụk ye abian̄a, nnyịn imekeme nditịn̄ akpanikọ inyụn̄ inọ item. Ke ini eti uduakesịt onụkde nnyịn, edeme ekeme nditịn̄ mme utịbe utịbe ikọ oro ẹkọkde unan. Jesus ama ada edeme esie anam n̄kpọ ke utịbe utịbe usụn̄ ke ndikpep ubonowo mban̄a edinyan̄a.

Ke akpanikọ, “n̄kpa ye uwem ẹdu edeme ke ubọk.” (Mme N̄ke 18:21) Nte edeme fo edi enyeoro akamade n̄kpa m̀mê enyeoro ọnọde uwem? Nte enye esitọn̄ọ ‘mme ikan̄ akai’ m̀mê esinịme mmọ? Andiwet psalm ọkọbọn̄ akam ọnọ Abasi ete: “Yak edeme mi ọbọrọ se afo ọdọhọde: koro kpukpru mbet fo ẹnende.” (Psalm 119:172) Edieke nnyịn ikọride edu andiwet psalm oro, nnyịn n̄ko iyeda edeme nnyịn inam se ifọnde.

[Ndise ke page 32]

Foto U.S. Forest Service