Mmọn̄ Uwem

“OWO eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) “Mmọn̄ uwem”—oro ọwọrọ kpukpru ndutịm ẹmi Abasi anamde ọnọ edinyan̄a oro ọkọn̄ọde ke uwa ufak Jesus Christ. Mme ndutịm ẹmi ẹdu, ndien mmọ ẹdi ke ikpîkpu. Nso utịbe ntatubọk ke emi edi ntem ke n̄kan̄ Abasi nnyịn! Nte ededi, ntak emi ẹdade mmọn̄ ndida mban̄a mmọ?

Ọfọn, ata mmọn̄ esinam mbiet ke isọn̄ ekeme ndikọri, ndien oro anam owo ekeme ndidu uwem. Ke mmọn̄ mîkpedụhe, uwem eto, ndien ke ntre uwem owo, ikpekemeke ndidu. N̄ko-n̄ko, mbahade 63 eke ikie ke idemfo edi mmọn̄. Ndusụk nta mme ẹse n̄kpọ mban̄a nsọn̄idem ẹkam ẹtoro ẹte ẹmụm udomo oro ẹkama ebe ke ndin̄wọn̄ n̄kpọ nte ekpeme mmọn̄ iba ye ubak ke usen. Kpukpru mme edinam esịtidem fo—ọtọn̄ọde ke udia nditaha tutu osịm edision̄o ndek mfep ke idem—oyom mmọn̄. Edieke mûn̄wọn̄ke mmọn̄ ke urua kiet, afo eyekpa.

Kpasụk ntre, “mmọn̄ uwem” anam uwem eke spirit odu onyụn̄ ọbọk enye. Edieke nnyịn isịnde ndibọ mmọn̄ uwem, nnyịn idinyeneke ini iso oro ebịghide. (John 3:36) Edieke nnyịn in̄wọn̄de enye, nnyịn imekeme ndinyene nsinsi uwem. Eyịghe idụhe n̄wan Samaria akanamde n̄kpọ ye udọn̄ ke ini Jesus ọkọdọhọde enye ete: “Owo ekededi eke ọn̄wọn̄de mmọn̄ emi Ami ndinọde enye idikopke nsatitọn̄ aba: edi mmọn̄ oro ndinọde enye eyekabade edi idịm mmọn̄ ke esịt esie eke otopde akabade ọwọrọ edi nsinsi uwem”! (John 4:14) Nnyịn ikpakam inyanade ibịne ye ukem udọn̄ oro inyụn̄ ibọ mmọn̄ uwem ke ikpîkpu.

[Ebiet Ẹdade Ndise Ẹto ke page 32]

Garo Nalbandian