Mme Mbụme Ẹtode Mme Andikot
Nte ẹkpenyene ndikot John emi okonịmde Jesus baptism “John Baptist” m̀mê “John Andinịm Owo Baptism”?
Enyịn̄ mbiba ẹnenen ẹnyụn̄ ẹdi se Bible ọsọn̄ọde.
Akana John “anam mmọemi ẹkenịmde ẹnọ Ọbọn̄ ẹben̄e idem ẹbet Enye,” emi enye akanamde ebe ke ‘ndikwọrọ baptism edikabade esịt, man ẹfen mme idiọkn̄kpọ.’ (Luke 1:17; 3:3) Apostle Matthew ekewet ete: “John Baptist oto edi edikwọrọ ikọ ke desert Judea, ete, Mbufo ẹkabade esịt; koro Ubọn̄ Heaven ke ekpere. . . . Ekem mbio Jerusalem, ye ofụri Judea, . . . ẹwọn̄ọ ẹtiene enye; ẹnyụn̄ ẹna baptism ke ubọk esie ke akpa Jordan, ke ẹyararede mme idiọkn̄kpọ mmọ.”—Matthew 3:1-6.
Timfiọk ete ke Matthew okowụt John nte edide “Baptist.” Anaedi Matthew, emi nte an̄wan̄ade ekewetde mbụk esie ọnọ mme Jew, ama ekere ete ke mme Jew ẹyefiọk enyeemi “Baptist” ekedide. Enye akada “Baptist” nte enyịn̄ ekpụk esie. Jesus ye mbet esie ẹma ẹda ikọ oro “John Baptist,” ukem nte asan̄autom Herod akadade.a—Matthew 11:11, 12; 14:2; 16:14.
Mbet Mark etịn̄ aban̄a ukem edida ikọ oro “Baptist” ntịn̄ ikọ. (Mark 6:25; 8:28) Edi ke ini eketịn̄de n̄kpọ aban̄a enyeemi John edide, Mark okokot enye “John andinịm owo baptism.” (Mark 1:4, NW) Ikọ Greek oro ẹdade ke Mark 1:4 enyene esisịt ukpụhọde ye enyeoro ẹdade ke mme ufan̄ikọ eken. Ẹkeme n̄ko ndiwet ikọ oro ke Mark 1:4 nte “enyeemi onịmde baptism.” Mark eketịn̄ aban̄a se John akanamde; enye ekedi enyeemi onịmde baptism, andinịm owo baptism.
Nte ededi, emi iwọrọke ite ke ana nnyịn isịn ukpụhọde ke mme usụn̄ ẹmi ẹtịn̄de ẹban̄a John mi. Ke Mark 6:24, 25 (NW), nnyịn ikot iban̄a Salome ntem: “Enye ọwọrọ okobụp eka esie ete: ‘Nso ke n̄kpeben̄e?’ Enye ọdọhọ ete: ‘Ibuot John andinịm owo baptism.’ Kpa idahaoro enye awara odụk ke ọtọ edidem onyụn̄ ekeben̄e ete: ‘Nyom afo ọnọ mi ibuot John Baptist idahaemi ke usan.’” Ẹkeda enyịn̄ mbiba ẹmi ẹtịn̄ ikọ ukem ukem.
“Baptist” emi ekeme ndin̄wan̄a ndusụk owo nte ekemde ye udiana usụn̄ emi ẹsịnde enye ke n̄wed ukabadeikọ nte: “Andibuana m̀mê andinịm ukpepn̄kpọ n̄ka Protestant ke akpanikọ emi ẹdiọn̄ọde ebe ke ndutịm esop ye baptism oro ebụkde-bụk owo ke mmọn̄ kpọt.” John ke akpanikọ ikedịghe andibuana ke n̄ka emi.
Ntem, mbiba “John Baptist” ye “John Andinịm Owo Baptism” ẹnenen ẹnyụn̄ ẹdot.
[Mme Ikọ idakisọn̄]
a Ewetmbụk mbon Jew oro, Flavius Josephus ama ewet aban̄a “John, emi ẹkekotde Baptist.”