Ntọt M’ọkwọrọ Obio Ubọn̄
Akparawa Kiet Emi Enyenede Udọn̄ Aban̄a Itieutom Tren Ekpep Akpanikọ
EDIEKE owo enyenede udọn̄ ke esịt esie aban̄a edinen ido, adan̄aoro Jehovah Abasi, eyeda Jesus Christ ye mme angel ke heaven anam n̄kpọ ndikụt nte ke ẹda eti mbụk Obio Ubon̄ ẹsọk utọ owo mbieterọn̄ oro ke akpatre. Ke edikem ini owo oro ekeme ndididu ke nnennen idaha ndibọ mfọn nto Jesus. (Matthew 25:31-33) Emi ekedi ntre ye akparawa kiet emi enyenede udọn̄ aban̄a itieutom tren ke Austria emi ọkọbọde akpanikọ ke n̄wọrọnda usụn̄.
Se ikedide n̄kpọ nduaidem inọ akparawa emi ikan ke edinam ini nduọkodudu esie ekedi enye ndisan̄a ke tren n̄kanade, ke unyịme itieutom esede n̄kpọ aban̄a uwat tren. Enye ama esisio ndise ke ini isan̄ kiet kiet ke n̄kpọ usio ndise video esie man ekeme ndikafiak nse ke ufọk esie. Ke isan̄ kiet emi enye okotode ke Vienna aka Salzburg, awat tren oro ekedi kiet ke otu Mme Ntiense Jehovah. Enye ama ada ifet oro nditịn̄ n̄kpọ mban̄a Obio Ubọn̄ nnọ enyene udọn̄ mban̄a itieutom tren oro. Ke akpa ifet akparawa oro ama odu ke n̄kpaidem ndikop nte awat tren oro etịn̄de n̄kpọ aban̄a Abasi ye Bible, edi ke ini isan̄ oro, enye ama owụk ntịn̄enyịn ke ndise akan ke se awat tren oro eketịn̄de ọnọ enye.
Ke afiakde osịm ufọk, akparawa oro enyenede udọn̄ mi ama ese se enye okomụmde ọdọn̄ ke video esie idịghe ini kiet edi utịm ike duop, koro enye ama enen̄ede enyene udọn̄ ke ukaisan̄ enyeemi. Sia enye n̄ko ama okomụm uyoikọ esịn, enye ama okop se Ntiense oro eketịn̄de ọnọ enye ediwak ini. Nte enye ekesese video oro, ntre ke se ẹketịn̄de ẹnọ enye akan̄wan̄a enye akan. Enye idahaemi ama ọtọn̄ọ ndikere mban̄a emi, ndien ke akpatre enye ama okop nduaidem aban̄a utịbe utịbe etop oro ekenọde eto Bible. Enye ama oyom ndifiọk n̄kpọ efen efen.
Enye ama eti enyịn̄ awat tren oro onyụn̄ ọfiọk ete ke enye odụn̄ ke Vienna. Ntre enye ama aka post ofis onyụn̄ ọkọtọn̄ọ ndinọ ikot ke nsio nsio nọmba emi ẹwetde ke idak enyịn̄ oro ke n̄wed urụk ukopikọ. Mbụme oro enye okobụpde mme andikeyere ikot oro ekedi: “Ndi afo edi awat tren?” Edieke ibọrọ ekedide baba, enye eyekot ke nọmba efen. Ke akpatre, enye ama okụt awat tren oro. Enye ama etịn̄ mbụk esie ọnọ enye onyụn̄ ọdọhọ ete ke imọ ima inyene udọn̄ ke etop Bible oro imọ ikokopde ke video.
Ntiense oro ama anam ndutịm ebe ke n̄kọk itieutom man owo emi okodụn̄de ekpere akparawa oro aka ekese enye. Ke mfọniso Ntiense efen emi ekedide awat tren n̄ko ama odu ke esop n̄kann̄kụk oro. Udiana awat tren emi ama aka ekese akparawa oro enyenede udọn̄ mi aban̄a itieutom tren, ndien ukpepn̄kpọ Bible ama ọtọn̄ọ. Ke ndaeyo 1991, akparawa oro ama ana baptism.
Anaedi Jehovah, emi ọdụn̄ọrede esịt kpukpru owo, ama okụt nte ke owo emi ama enyene udọn̄ esịt akpanikọ aban̄a edinen ido. Ntre, enye ama anam enye ọbọ akpanikọ Bible—okposụkedi ekedide ke n̄wọrọnda usụn̄.—1 Chronicles 28:9; John 10:27.
[Ebiet Ẹdade Ndise Ẹto ke Page 9]
Ẹbọ unyịme ẹto Austrian Railways