Enye Ama An̄wana Kaban̄a Mbuọtidem Esie
ISUA ita ẹmi ẹkebede Caridad Bazán Listán, kiet ke otu Mme Ntiense Jehovah ke Cádiz, Spain, ama oyom usiakidem usọp usọp. Udọn̄ọ edidiana ekpa ke akanam enye ufiopidem onyụn̄ ọdọn̄ idiọk ibọkn̄kpa ke usan̄aiyịp esie. Ke ini ẹkesịnde n̄wan emi ke ufọkibọk n̄kann̄kụk, enye ama anam idaha esie oro ọkọn̄ọde ke Bible an̄wan̄a emi aban̄ade edisịn ndinyịme edikịm iyịp nsịn ke idem. Mme dọkta ẹma ẹnyịme ndinam usiakidem oro ye unana iyịp. Nte ededi, esisịt ini mbemiso ẹdade enye ẹdụk ubet usiakidem, mme dọkta ẹma ẹdọhọ enye esịn ubọk ke n̄wed. N̄wed emi okowụt nte ke mmọ ẹma ẹnyịme ndikpono ubiere esie kaban̄a iyịp edi nte ke edieke n̄kpọ etịbede ke mbuari, ke mmimọ imoyom unyịme esie ndinọ sededi usọbọ oro emi ediyomde.
Ebiowo esop emi okodude ke ufọkibọk oro ye eyeneren Caridad, emi n̄ko edide Ntiense, ẹma ẹwụt Caridad se edisịn ubọk ke utọ n̄wed oro abuanade. Enye ndisịn ubọk ke n̄wed oro ọkpọkọnọ mme dọkta odudu ndikịm iyịp nsịn enye ke idem edieke mbabuat n̄kpọ okpotịbede. Ke ini mbiaibọk usọbọ ẹkedide ndimen enye ndụk ubet usiakidem, enye ama anam an̄wan̄a ete ke imọ idisịnke ubọk ke n̄wed oro. Ẹma ẹsọsọp ẹda enye ẹfiak ẹkenịm ke ubet esie ẹnyụn̄ ẹsịn ke idak ọkpọsọn̄ mfịghe man okpụhọde ekikere esie.
Ke ẹma ẹkeneme ekese n̄kpọ mmọ ẹma ẹbiere ndikot ebiereikpe ibọkusọbọ man otodo enye edinam enye okpụhọde ekikere, edi ufọn ikodụhe. Caridad ama anam an̄wan̄a ete ke imọ ikere ke iyenyene ubiomikpe ke iso Abasi edieke imọ iyakde mmọ ẹnọ imọ iyịp. Enye ama osio owụt ete ke idak Ibet Moses, edieke ẹkedan̄de n̄wan ke n̄kanubọk, owo ikobiomke enye ikpe edieke enye ọkọbiọn̄ọde odudu odudu ke ndifiori nyom un̄wam. (Deuteronomy 22:23-27) Enye ama ọdọhọ ete, “Mme dọkta ke ẹfụmi se nyomde ke ẹnyụn̄ ẹdomo ndibiat ubieresịt mi, ntre ana mbiọn̄ọ odudu odudu kpa nte n̄kpanamde edieke mmọ ẹkpedan̄de mi ke n̄kanubọk.”
Ndusụk hour ẹma ẹbe, ndien ke akpatre mme dọkta ẹma ẹnyịme ndisiak enye idem ye unana edisịn iyịp. Ke ubet usiakidem, Caridad ama eben̄e ete ẹyak imọ ibọn̄ akam inọ Jehovah. Enye ama anam emi, ndien usiakidem oro ama okụt unen.
Edi, ke oro ebede idaha Caridad ama enen̄ede ọdiọk, ndien mme dọkta ẹma ẹbiere ndifụmi se enye okoyomde nnyụn̄ n̄kịm iyịp nsịn enye ke idem ke odudu. Ntem, dọkta ye nọs ẹma ẹben̄e idem ndikịm iyịp nsịn enye ke idem. Kpa ye idaha mmemidem esie, Caridad ama ada ofụri odudu esie ọbiọn̄ọ. Enye ama akam an̄wana odom ọkpọ oro akanade iyịp asan̄a ebe. Ke akpatre, dọkta ama okop bụt ata etieti ke se mmọ ẹkenamde anam enye ama osion̄o idem efep. Enye ọkọdọhọ ete, “Ami n̄kemeke ndikaiso nnam emi. Ami mmosion̄o idem n̄kpọn̄!”
Caridad ama ọbọhọ n̄kpọntịbe emi onyụn̄ okop nsọn̄idem ye unana idaha ndikaiso ndiọk. Mbuọtidem ye uko n̄wan emi iketreke nditụk mme dọkta ye mme nọs ke idem ntotụn̄ọ ntotụn̄ọ. Kpukpru emi okotịbe ke ini Caridad ekedide isua 94 ke emana.