Ntak ‘Akade Ke Ebiet Iyọn̄-ọ’?

ENYENE-ỌNIỌN̄ Edidem Solomon eke Israel eset ọkọnọ item emi: “Ka ke ebiet iyọn̄.” Ntak emi enye eketịn̄de emi-e? Nso ke nnyịn ikeme ndikpep nto iyọn̄?

Solomon ama adian do ete: “Se ido [iyọn̄], ndien nyene ibuot; emi mînyeneke etubom, ye andise, ye ọbọn̄; ke ndaeyo ke mmọ ẹnịm udia mmọ, ke ini idọk ke ẹtan̄ se ẹdiade.” (Mme N̄ke 6:6-8) Mme ikọ eset ẹmi ẹwụt akpanikọ oro mme ekpepn̄kpọ mban̄a obot ke eyomfịn ẹkụtde.

Otop n̄ke oro Agur owụt ete ke iyọn̄ “ẹnyene ibuot etieti.” (Mme N̄ke 30:24, 25) Nte ededi, ifiọk mmọ itoho ọniọn̄ ọniọn̄ n̄kọkibuot edi osụn̄ọ oto ntụk oro Andibot ekesịnde mmọ ke idem. Ke uwụtn̄kpọ, ke ntak ntụk, iyọn̄ ẹsitan̄ udia mmọ ẹbok ke nnennen ini.

Ẹtịm iyọn̄ ke utịbe utịbe usụn̄. Ke ẹdianade kiet ẹnyụn̄ ẹtịn̄de enyịn ke ekemmọ mbonutom ke n̄wọrọnda usụn̄, mmọ ẹsin̄wam iyọn̄ oro adade unan m̀mê oro idem ememde ndifiak nnyọn̄ itieidụn̄. Mmọ ke ntụk ẹsiben̄e idem ẹnọ ini iso ẹnyụn̄ ẹnam kpukpru n̄kpọ oro ẹkemede man ẹma utom mmọ.

Ndammana usụn̄uwem iyọn̄ owụt nte ke mme owo ẹkpenyene ndinam ndutịm nnọ ini iso nnyụn̄ ndi mbon oro ẹnamde utom ọkpọsọn̄. Emi abuana mme edinam eke ufọkn̄wed, eke itieutom, ye eke spirit. Nte iyọn̄ ọbọde ufọn oto nsịnifịk esie, ntre ke Abasi oyom mme owo ‘ẹkụt eti n̄kpọ ke kpukpru ọkpọsọn̄ utom mmọ.’ (Ecclesiastes 3:13, 22; 5:18) Nte mme iyọn̄ ẹnyenede ekese ndinam, mme ata Christian ẹsinam eti utom ke usen. Mmọ ‘ẹda odudu mmọ ẹnam kpukpru se ubọk mmọ okụtde ndinam,’ idịghe koro eseutom esede, edi ke ntak edinam akpanikọ ye udọn̄ ndidi ifịk ifịk mme anamutom oro ẹnyenede uforo.—Ecclesiastes 9:10; men Mme N̄ke 6:9-11 domo; se n̄ko Titus 2:9, 10.

Ke akpanikọ, nnyịn iyekop inemesịt edieke nnyịn ‘ikade ke ebiet iyọn̄’ inyụn̄ idade se nnyịn ikpepde ito enye isịn ke edinam. Ndien n̄kponn̄kan inemesịt eyedi eke nnyịn edieke nnyịn inamde uduak Jehovah Abasi ifịk ifịk, nte ẹwụtde ke Bible.