Ndiyom Mme Ntịn̄nnịm Ikọ Oro Ẹdide Se Ẹberide Edem
“OWO emi ekemede ndifiọk se iditịbede usen ita ke iso eyenyene inyene ke ediwak tọsịn isua.” Ntre ke n̄ke China kiet ọdọhọ.
Mme owo ẹsiyom ndifiọk se n̄kpọn̄ edidade edi, ndien ediwak owo ke idatesịt ẹyekpe akamba ekọmurua kaban̄a orụk ntọt oro, emi ẹkemede ndiberi edem. Mmọ ẹsiyom mme ntịn̄nnịm ikọ oro ẹdide akpanikọ. Nte ẹkụtde ọtọn̄ọde ke edibemiso ntịn̄ nte eyo editiede ye idaha ndutịm uforo, nnyịn imenyene udọn̄ ke mme n̄kpọntịbe oro ẹdide ke iso. Akan oro, ifiọk oro edide se eberide edem oro aban̄ade ini iso eyen̄wam nnyịn ndidiomi nnyụn̄ ntịm uwem nnyịn.
Udọn̄ ndifiọk se ini iso akamade omonụk ediwak owo ndiyom item nto mme etịn̄ ini iso, mme adausụn̄ ido ukpono, mme ekpepn̄kpọ mban̄a ntantaọfiọn̄, ye mbia ifọt. Mme itie unyam n̄wed ye mme itie ubon magazine ẹyọhọ ye mme uwetn̄kpọ eset ye eke eyomfịn eke mbon oro ẹdọhọde nte itịn̄de ini iso. Edi mme orụk ntịn̄nnịm ikọ ẹmi ẹyọhọ ye eyịghe. Ẹdọhọ ke owo ukara Rome oro Cato ọkọdọhọ ete: ‘Idem esikpa mi nte etịn̄ ini iso kiet mîsisakke imam ke ini enye okụtde etịn̄ ini iso efen.’
Nte ededi, ediwak uduot ntịn̄nnịm ikọ ẹdu. Ke 1972 otu nditọ ufọkn̄wed ye mbon mbubehe ofụri ererimbot kiet emi ẹdiọn̄ọde nte N̄ka Rome ama emịn̄ ndụn̄ọde kiet emi eketịn̄de ete ke mme inyene oro owo mîkemeke nditọn̄ọ ntak nnyene ẹyekụre ke ererimbot. Ererimbot idinyeneke gold etisịm 1981, mercury etisịm 1985, tian etisịm 1990, aran uwat etisịm 1992, ye ntre ntre eken. Nnyịn idahaemi imokụt ite ke mme ntịn̄nnịm ikọ ẹmi ikedịghe akpanikọ.
Ediwak ntịn̄nnịm ikọ ẹkekọn̄ọ ke mme ekikere ido ukpono. Ke ndinam an̄wan̄a: Bishop England oro Wulfstan ọkọdọhọ ete ke edidụk oro mbon Denmark ẹkedade ẹkọn̄ ẹdụk England ke ntọn̄ọ ntọn̄ọ ọyọhọ isua ikie-11 ekedi idiọn̄ọ nte ke utịt ererimbot ama ekpere. Ke 1525, Thomas Münzer ama ada usụn̄ ke en̄wan oro mme ọtọin̄wan̄ Germany ẹken̄wanade ye ukara koro ke n̄kukụt kiet enye ama okụt mme angel ẹbande ofụt ukpen̄e ẹnọ se enye ekekerede ke edidi akwa ukpen̄e. Nte an̄wan̄ade, mme ntịn̄nnịm ikọ ẹmi ikenenke.
Nte afo ekemede ndifiọk, Bible ọdọn̄ọ mme ntịn̄nnịm ikọ. Akan oro, mme andiwet Bible ẹkedọhọ ke Abasi ọkọnọ mmimọ odudu spirit. Christian apostle Peter ọkọdọhọ ete: “Baba ikọ prọfet kiet ke N̄wed Abasi idịghe se owo ekemede ndisiak ke usụn̄ esiemmọ. Koro akanam baba ikọ prọfet itoho ke uduak owo: edi mme owo ẹtịn̄ ikọ eke otode Abasi, nte edisana spirit esịnde mmọ ẹtịn̄.”—2 Peter 1:20, 21.
Ke adianade ye mme n̄kpọ eken, Bible ama ebem iso etịn̄ aban̄a nsio nsio n̄kpọ oro ẹdinamde ẹdiọn̄ọ emana oro edikụtde edidu Jesus Christ ke odudu Obio Ubọn̄ heaven. Ekọn̄, akan̄, unyekisọn̄, ye n̄wụre ke ukeme ido uwem owo oro akanam mîdụhe ẹmenịm idiọn̄ọ ke se Bible anamde an̄wan̄a nte “ukperedem ini.” (2 Timothy 3:1-5; Matthew 24:3-14, 34) Nte ekemde ye Bible, edisio oro ẹdisiode editịm n̄kpọ oro odude kemi ẹfep eyeberede usụn̄ ọnọ inemesịt ubonowo ke obufa ererimbot oro mme edidiọn̄ mîdinyeneke utịt.—2 Peter 3:13; Ediyarade 21:1-4.
Didie ke afo ese mme utọ ntịn̄nnịm ikọ Bible oro? Nte edide ye ediwak ntịn̄nnịm ikọ eken, nte mmọ ẹdi ikpîkpu ekikere? Nnyịn imekeme ndidomo nte mme prọfesi Bible oro mîsụhe kan̄a ẹdide se ẹberide edem ke ndibiere m̀mê mme ntịn̄nnịm ikọ Bible ẹmi ẹkeban̄ade mme n̄kpọntịbe ini edem ẹma ẹdi se ẹberide edem. Ke ibuotikọ oro etienede, nnyịn iyekere iban̄a ndusụk ke otu mmọemi.
[Ebiet Ẹdade Ndise Ẹto ke page 3]
Ẹbọ ẹto National Weather Service