Nte Udia Emi ekeme Ndinyene se ọwọrọde Ọnọ Fi?
MBITMBỊT un̄wana ọyọhọ ọfiọn̄ ke ayama ọtọ isọn̄. Ke ubet enyọn̄ ufọkidụn̄ kiet ke akani Jerusalem, irenowo 12 ẹtie ẹkanade okpokoro. Duopekiet ke ẹnọ ọyọhọ n̄kpan̄utọn̄ nte Andikpep mmọ ọtọn̄ọde ata akwa edinam onyụn̄ etịn̄de mme ikọ ẹmi ẹnen̄erede ẹnyene se ẹwọrọde. Mbụk kiet ọdọhọ ete:
“Jesus [Christ] emen uyo, ọdiọn̄ onyụn̄ obụn̄, ọnọ mbet Esie ete, Ẹbọ, ẹta; emi edi ikpọkidem Mi. Ndien Enye emen cup, onyụn̄ ọkọm Abasi, onyụn̄ ọnọ mmọ ete, Mbufo kpukpru ẹda ẹn̄wọn̄; koro emi edi iyịp Mi, eke ediomi, emi ẹduọkde ẹban̄a ediwak owo, man efen mme idiọkn̄kpọ mmọ. Edi ndọhọ mbufo nte, Ndin̄wọn̄ke aba mfri vine emi, tutu osịm usen oro ndin̄wọn̄de enye obufa ye mbufo ke Obio Ubọn̄ Ete Mi. Ekem ke mmọ ẹma ẹkekwọ ikwọ, mmọ ẹwọn̄ọ ẹka ke Obot Olive.”—Matthew 26:26-30.
Emi okotịbe ke utịn ama okosụhọde ke ọyọhọ usen 14 ke ọfiọn̄ Nisan eke mbon Jew ke isua 33 eke Eyo Nnyịn. Jesus ye mme apostle esie ndisụk nnịm Passover n̄kụre edi oro ke editi edinyan̄a oro ẹkenyan̄ade Israel ẹsio ke ufụn Egypt ke ọyọhọ isua ikie 16 M.E.N. Christ ama ebịn Judas Iscariot, oro okoyomde ndida enye nnọ. Ntem, Jesus ye mme anam-akpanikọ apostle esie 11 kpọt ẹkedu.
Udia mbubịteyo emi ikedịghe n̄kaiso Passover mbon Jew. Enye ekedi obufa n̄kpọ oro ẹkedikotde Udia Mbubịteyo Ọbọn̄. Kaban̄a edinam emi, Jesus ama owụk mme anditiene enye ete: “Ẹnam emi nditi Mi.” (Luke 22:19, 20; 1 Corinth 11:24-26) Ntak emi enye eketịn̄de emi? Ndien didie ke n̄kpọntịbe ediwak isua ikie emi ekeme ndinyene se ọwọrọde ọnọ fi?