Mme Mbụme Ẹtode Mme Andikot
Nso ke Christian akpanam ke ini enye mîkemeke ndikụt nsan̄andọ oro odotde?
Kpa ye oro idide mme Christian oro iyakde idem inọ, nnyịn isụk ikekeme ndikop editịmede esịt ke ini nnyịn itịmde idori enyịn iban̄a n̄kpọ edi ekem okpu. Ẹnen̄ede ẹtịn̄ nte etiede nnyịn ke idem ke Mme N̄ke 13:12, emi ọdọhọde ete: “Idotenyịn eke anamde ubịghi esịn esịt ọdọn̄ọ.” Emi edi nte esitiede ndusụk Christian ke idem ke ini ẹnyenede udọn̄ ndidọ ndọ ẹdi ikemeke ndikụt nsan̄andọ oro odotde. Emi ototịm edi ntre ye mbon oro apostle Paul eketịn̄de aban̄a nte ‘ẹkpade udọn̄.’—1 Corinth 7:9.
Jehovah ama esịn mme owo udọn̄ ndiyom owo isio uduot nte ata nsan̄a oro anamde owo ọyọhọ. Ntre, idịghe n̄kpọ n̄kpaidem ndikụt mme utọ ntụk oro edemerede ke idem ediwak Christian oro mîdọhọ ndọ. (Genesis 2:18) Mme utọ oto obot ntụk ẹmi ẹkeme nditịm nsọn̄ odudu ke n̄kaowo oro esịnde ọkpọsọn̄ udọn̄ ọnọ edidọ ndọ (m̀mê edidọ ndọ ke akpan isua emana) mîdịghe ke ini mme nsan̄andọ oro ẹkopde inemesịt ke esop ẹdude ẹkanade mme Christian oro mîdọhọ ndọ. Nte ededi, ifọnke ndiyak editịmede esịt ebịghi ke anyanini. Ntre didie ke mme ata Christian ẹkeme ndinam n̄kpọ ye utọ idaha oro ye unana edikop editịmede esịt mbe adan̄a?
Idịghe mmemmem n̄kpọ, ndien mbon en̄wen ikpenyeneke ndida n̄kpọ emi nte n̄kpọ oro ẹdọhọde ke enye edi n̄kukụre ebeubọk n̄kpọ m̀mê ata ekpri mfịna. Edi ke akamba udomo, ukeme ndiyọ m̀mê ndibiere idaha emi ọkọn̄ọ ke mme usio-ukot oro owo oro mîdọhọ ndọ ekemede ndinam.
Nnyịn ikụt ukpọhọde ke eti item Bible emi: “Ọfọn ndinọ akan ndibọ.” (Utom 20:35) Owo emi mîkọdọhọ ndọ kpa Jesus Christ eketịn̄ oro, ndien enye ama ọfiọk se enye eketịn̄de aban̄a. Ndinam mme n̄kpọ nnọ mbon efen ye unana ibụk ibụk udọn̄ edi eti usụn̄ ndin̄wam owo nnyịn ekededi ndikan mme ntụk oro ẹsụn̄ọde ẹto idotenyịn eke ẹnamde ubịghi. Nso ke emi ọwọrọ kaban̄a Christian emi mîdọhọ ndọ?
Sịn ukeme ndinam mme edinam mfọnido nnọ ubon fo ye mbon efen ke esop, nyụn̄ nam n̄kọri ke mme utom fo ke utom ukwọrọikọ. Item emi iwọrọke ite, ‘Sịn idem ke ndinam n̄kpọ, ndien afo eyefre aban̄a udọn̄ ndidọ ndọ.’ Baba. Ke ndiyọhọ ke mme utom Christian oro ẹn̄wụmde mfri mi, afo eyekụt nte ‘ọsọn̄ọde enyene iwụk ke esịt fo, ye unana n̄kpọ ndinyịk fi’ ndien emekeme ndida mme ifet oro afo enyenede kemi anam n̄kpọ ke eti usụn̄.—1 Corinth 7:37.
Ndusụk owo oro ẹnyenede ọkpọsọn̄ udọn̄ ndidọ ndọ ẹmeyak emi akabade akara ekikere mmọ ofụri ofụri. Mmọ ẹmekam ẹnam n̄kpọ ebeubọk ẹkesịm idem edisuan etop ke mme n̄wedmbụk n̄kpọntịbe nyom nsan̄andọ. Didie ke otịm odot ntem, ndien, ndidori nsọn̄uyo ke ediwụt esịtekọm mban̄a mme ufọn oro ẹkemede ndibọ nto ini oro owo mîdọhọ ndọ.—Mbọk se mme ibuotikọ oro “Idọhọ Ndọ Edi Ọyọhọ Ekem Ndinam Utom Abasi” ye “Itie Unana Ndọ—Ọnọ Uyụhọ Usụn̄uwem” ke Enyọn̄-Ukpeme eke November 15, 1987, ye “Nte Ndọ Edi N̄kukụre Ukpọhọde Inemesịt?” ke Enyọn̄-Ukpeme eke May 15, 1992.
Bọn̄ akam nọ Jehovah kaban̄a un̄wam ndisọn̄ọ ndu ke itie unana ndọ. (Philippi 4:6, 7, 13) Ediwak Christian oro mîdọhọ ndọ ẹmekụt ẹte ke ndida ini mmọ n̄kpep nnyụn̄ ntie n̄kere Ikọ Abasi ye ke ndidụk nnyụn̄ mbuana ke mme mbonoesop Christian, mmọ ẹmekụt nte emi adiande ‘nduọkodudu ọnọ ukpọn̄ mmọ,’ nte Jesus ọkọn̄wọn̄ọde ọnọ mbon oro ẹtienede enye. (Matthew 11:28-30) Emi aman̄wam mmọ ndikọri mme edu eke spirit, man mmọ ẹkpedi nti ebendọ m̀mê ibanndọ edieke mmọ nte ini akade ẹdikụtde nsan̄andọ eke odotde.
Kûdede ufre ute ke Jehovah ọdiọn̄ọ idaha kpukpru mbon oro mîdọhọ ndọ ẹmi ẹnamde n̄kpọ ẹnọ enye. Enye ọmọfiọk ete ke ekeme ndidi afo ukereke ke idaha oro afo odude idahaemi edi se afo akpamade. Ima ima Ete nnyịn eke heaven ọmọfiọk n̄ko se idinọde fi nsinsi ufọn ke n̄kan̄ eke spirit ye eke ntụk. Ke n̄kan̄ eken afo emekeme ndidiọn̄ọ emi ke ata akpanikọ: Ebede ke ndibet Jehovah ye edida mme edumbet Ikọ esie nsịn ke edinam ke uwem eke usen ke usen, afo emekeme ndidori enyịn nte ke enye eyeyụhọ ata akpan udọn̄ fo ke usụn̄ oro edidide ke nsinsi ufọn fo.—Men Psalm 145:16 domo.