Ndibemiso Ntịn̄ Mban̄a Ini Iso Ndutịm Uforo Ererimbot
UNANA iwụk ke mme ndutịm unyamurua ye unana mbuọtidem ke idem mme anam-ndụn̄ọde ẹmi ẹkekpude ndibemiso ntịn̄ mban̄a n̄wụre ke ndutịm unyamurua ke 1987 amanam ndusụk mme anam mbubehe ẹwọn̄ọde ẹbịne ukpepn̄kpọ aban̄ade ntantaọfiọn̄ man ẹbemiso ẹtịn̄ ndutịm okụk ini iso mmọ ẹnọ mmọ, nte magazine eke London oro Accountancy Age owụtde. Magazine oro owụt ete ke “mme ekpepn̄kpọ mban̄a okụk ẹnyene uwak ibat mme ọwọrọiso mbonurua oro ẹyomde ẹbemiso ẹtịn̄ ndutịm urua mmọ.”
Ata ọnọitem kiet ama odomo edisan̄a n̄kanade oro enye okokụtde ke uwetn̄kpọ ndutịm okụk eke usen ke usen ye edisan̄a n̄kanade eke ekondo. Ọkọn̄ọde ke emi enye ama esibemiso etịn̄ aban̄a ini iso. Okposụkedi ediwak mbonurua ẹkemen̄ede ndida item esie nsịn ke edinam mbemiso 1987, enye idahaemi omokụt idem mme anam mbubehe okụk oro ẹsọn̄de obotitọn̄ nte ẹben̄ede idem ndikpan̄ utọn̄.
Ekpepn̄kpọ mban̄a okụk efen ama ewet mme chart ẹkọn̄ọde ke mme usen emana man odụn̄ọde edu owo onyụn̄ “oyom idiọn̄ọ ndibiere ini oro uforo ekemede ndidu ke mbubehe.” Edi owo efen okonịm ke akpanikọ ete ke edikpu ke urua silver etiene edisan̄a n̄kanade eke ọfiọn̄. Edi ke ini ẹmende ẹdomo ye ndụn̄ọde okụk oro ẹsinamde ofụri ini, ekpepn̄kpọ oro ama okụt ete ke mbonurua esie ẹnọ enye “ata esisịt ifet edinam ndudue.”
Nte ededi, odu etịn̄ ini iso kiet mban̄a okụk oro mîditreke ndidi akpanikọ, ndien enye inyeneke n̄kpọ ndomokiet ndinam ye ukpepn̄kpọ aban̄ade ntantaọfiọn̄. Ntịn̄nnịm ini iso emi edi se ẹwetde ke Bible onyụn̄ edi se Jehovah ọnọde odudu, kpa Abasi emi anamde tutu idụhe ndomo esisịt “ifet ndinam ndue” ndomokiet. Enye edi Abasi “emi mîkemeke ndisu nsu.” (Titus 1:2) Enye ama anam prọfet Ezekiel esie atan̄a ete: “Mmọ ẹyemen silver mmọ ẹduọk ke esien; gold mmọ eyenyụn̄ akabade edi ndek: silver mmọ ye gold mmọ idikemeke ndinyan̄a mmọ.”—Ezekiel 7:19.
Ini ewe ke emi editịbe? Ke ini “akwa ukụt” emi edide oro Jesus Christ ekebemde iso etịn̄ aban̄a, emi Ezekiel okotde “usen ifụtesịt Jehovah.” (Matthew 24:21; Ezekiel 7:19) Uforo okụk idinọhọ edinyan̄a, inamke n̄kpọ m̀mê nso ke mme ekpepn̄kpọ mban̄a ntantaọfiọn̄ ẹkeme ndibemiso ntịn̄. Mbuọtidem ke Jehovah Abasi kpọt, kpa Akwa Andinyan̄a, edi se ikemede ndinọ ubiọn̄ kaban̄a ifụre ke ini mbabuat nsobo ofụri ererimbot oro edisiode kpukpru mbiara ido uwem efep—ukaraidem, ido ukpono, ye unyamurua.—Mme N̄ke 3:5, 6; Zephaniah 2:3; 2 Peter 2:9.