Emi Ikemeke Nditịbe!
“EDI mmemmem n̄kpọ ye camel ndibe ke odudu abiabon, akan owo inyene ndidụk ke Obio Ubọn̄ Abasi.” (Matthew 19:24) Jesus Christ eketịn̄ emi man ekpep mme mbet esie n̄kpọ. Akparawa kiet emi edide owo inyene ekesịn ikot edikabade ndi anditiene Jesus nnyụn̄ mbuana ediwak utịbe utịbe ifet eke spirit ke ndondo oro. Eren oro ama emek ndimụm ediwak inyene esie n̄kama utu ke nditiene Messiah.
Jesus ikọdọhọke ite ke owo inyene idikemeke ke ofụri ofụri ndinyene nsinsi uwem ke ndutịm Obio Ubọn̄, koro ndusụk mme enyene n̄kpọ owo ẹma ẹkabade ẹdi mme anditiene enye. (Matthew 27:57; Luke 19:2, 9) Nte ededi, owo inyene ekededi oro amade inyene esie akan mme n̄kpọ eke spirit ikemeke ndinyene emi. Ibọhọke enye enyene udọn̄ ke n̄kpọ eke spirit esie onyụn̄ oyom un̄wam Abasi ke utọ owo oro ekeme ndibọ edinyan̄a oro Abasi ọnọde.—Matthew 5:3; 19:16-26.
Inaha ẹda uwụtn̄kpọ camel ye odudu abiabon ke ataata usụn̄. Jesus akada ikọ oro anamde n̄kpọ enyene udop ndiwụt ọkpọsọn̄ idaha oro mbon inyene oro ẹn̄wanade ndinem Abasi esịt ke adan̄aemi ẹmụmde owowo, usụn̄uwem uma-inyene ẹkama ẹsakde iso ẹse.—1 Timothy 6:17-19.
Ndusụk owo ẹdọhọ ẹte ke odudu abiabon ekedi ekpri inuaotop ke ibibene obio emi camel ẹkpekemede ndibe ke ọkpọsọn̄ edisịn̄ede idem edieke enye mîmenke mbiomo. Edi ikọ Greek oro rha·phisʹ, emi ẹkabarede “abiabon” ke Matthew 19:24 ye Mark 10:25, oto ikọedinam oro ọwọrọde “kịm.” Ke Luke 18:25 ikọ oro be·loʹne owụt abiabon ukịmọfọn̄, ndien do New World Translation okot ete: “Ke akpanikọ, edi mmemmem n̄kpọ camel ndibe ke odudu abiabon ukịmọfọn̄ akan owo inyene ndidụk obio ubọn̄ Abasi.” Ediwak n̄wed ẹsọn̄ọ ukabade emi. W. E. Vine ọdọhọ ete: “Etie nte ekikere oro nte ke ‘odudu abiabon’ ada aban̄a n̄kpri inuaotop edi ekikere eyomfịn; owo ikemeke ndidụn̄ọde enye n̄kosịm ini eset.”—An Expository Dictionary of New Testament Words.
N̄wed ndụn̄ọde kiet ọdọhọ ete, akamba camel ndin̄wana ndibe ekpri odudu abiabon ukịmọfọn̄ “ọnọ ekikere n̄kponinua Edem Usiahautịn.” Ndien kaban̄a ndusụk owo oro ẹtịmde ẹwụt eti ibuot tutu etie nte mmọ ikemeke ndinam se mîkemeke nditịbe, The Babylonian Talmud ọdọhọ ete: “Mmọ ẹwet enịn nte ebede odudu abiabon.” Jesus akada ataata ikọ oro anamde n̄kpọ okpon ye in̄wan̄în̄wan̄ isio n̄kpọ ndisọn̄ọ n̄wụt n̄kpọ oro mîkemeke nditịbe. Camel, m̀mê enịn, ikemeke ndibe ke odudu abiabon ukịmọfọn̄. Nte ededi, ye un̄wam Abasi, owo inyene ekeme ndikpọn̄ ekikere uma-inyene onyụn̄ enen̄ede oyom nsinsi uwem. Kpukpru owo oro ẹnyenede udọn̄ esịt akpanikọ ndikpep nnyụn̄ nnam uduak Ata Edikon̄ Abasi, kpa Jehovah, ẹkeme ndinam ntre.