N̄wan Oro Ama Ọbọ Enọ

KIYOE, emi odude ke akamba ufọkn̄wed, ama ewet n̄kọk itieutom Watch Tower Society ke Japan ete, “Ami mmọkọm mbufo etieti.” N̄wan emi owụt esịtekọm ntre aban̄a nso? Kiyoe osụk ọbọ nsọn̄urua n̄kan enọ ndondo emi ke udomo uwetn̄kpọ ofụri idụt, emi N̄ka Ukpeme N̄kpọisan̄ ke Japan esede aban̄a. Akwa enọ oro ama esịne edinam isan̄ n̄ka Sweden.

Kiyoe ekewet ndiwụt esịtekọm oro enye enyenede kaban̄a ediwak nti n̄wed ẹmi Watch Tower Bible and Tract Society ewetde, emi enye ekerede nte edide se ikan̄wamde imọ akamba akamba ndikụt unen. Ke ẹsiode udomo emi ẹfep, enye ama esitịn̄ ikọ onyụn̄ ewet mme udomo ediwak ini ke ibuot ufọkn̄wed esie. Enye ọdọhọ ete, “Ke ediwak ke otu mme udomo ẹmi, ẹsinọ ibuotikọ, ndien nditọ ufọkn̄wed ẹsinam ndụn̄ọde ke itie ubonn̄wed kaban̄a udomo mmọ. Nte ededi, ami nsisịnke idem ke kpukpru afanikọn̄ oro. Ami mmesikụt utịbe utịbe ntọt ke itie ubonn̄wed ke ufọk!” Enye akaiso ete: “Sededi emi ibuotikọ edide, edide aban̄a mme mfịna ini usọn̄, n̄kann̄kụk, ebuana eke kpukpru idụt, m̀mê edinam n̄kọri eke idemowo, nte ido edide mme magazine Enyọn̄-Ukpeme m̀mê Awake! ẹsineme n̄kpọ ntotụn̄ọ ntotụn̄ọ ẹban̄a.”

Edi, idịghe mme n̄wed ẹmi ikpọn̄ ẹken̄wam Kiyoe. Enye ọdọhọ ete ke ukpep emi imọ ikọbọde ebe ke mme ndutịm ukpepn̄kpọ eke Mme Ntiense Jehovah akan̄wam imọ ndinam n̄kọri ke edikot ye ediwet n̄wed, ndien emi ama an̄wam enye ndikan ke mme udomo oro. Enye ama onyịme ete, “Ini kiet, ami mma nnen̄ede nyom ndika ufọkn̄wed ntaifiọk. Edi ke mmọn̄ ke ami n̄kpekeme ndibọ ukpep eke etiede ntem?” Idahaemi enye enyene idotenyịn ndinam utom uyọhọ-ini ke ndin̄wam mbon en̄wen ẹbọ ufọn ẹto ukpep oro enye ọkọbọde. Ke adan̄aemi adatde esịt aban̄a enọ uwetn̄kpọ oro enye ọkọbọde, esịt Kiyoe owụhọ ke ndibọ enọ uwem.—Men Philippi 3:14 domo.