‘Mme Heaven ke Ẹbụk . . .’
Ke n̄kpọ nte itiat miliọn 93 ọtọn̄ọde ke ebiet emi afo odude idahaemi, utịn esiyama ye ufiop ufiop uyama ke ikpaenyọn̄. Ke ẹtuakde ibuot ẹnọ nte abasi ke ediwak tọsịn isua, ubọn̄ ubọn̄ ekondo mbọhọidụn̄ nnyịn emi odude ke enyọn̄ mi, ke akpanikọ, edi n̄kpọ ntiense ọnọ odudu Andibot esie, “andinam enyọn̄ ye isọn̄.” (Psalm 115:15) Un̄wana ye ufiop esie ẹdi akpan n̄kpọ kaban̄a uwem ke isọn̄. Ndien mme akpanikọ oro ntaifiọk ẹdụn̄ọrede ẹkụt akpa nnyịn idem.
Ẹsian nnyịn ẹte ke utịn esisio akamba udomo odudu. Nte afo ama ọfiọk ete ke se ikpride ikan mbahade iba ke itie tọsịn miliọn kiet ke otu ufiop ye un̄wana oro enye esisiode ke isọn̄ esibọ? Edi, mbahade oro edi ukem ye akwa odudu edide biliọn 240 ke odudu oro enan̄-mbakara odụride n̄kpọ ke minịt kiet!
Didie ke utịn anam ofụri odudu oro? Ebe ke akwa odudu atọm oro odude ke ọwọn̄esịt esie emi osion̄ode odudu ebe ke ndikot tọn hydrogen miliọn inan̄ ke kpukpru second kiet. Ke inemesịt ubonowo, utịn enyene odudu oro anamde ndutịm emi akaiso ke ediwak biliọn isua.
Ndusụk n̄kpọ oro ntaifiọk ẹkụtde ẹdemede mbụme efen efen. Ke uwụtn̄kpọ, utịn esinam uyom kpukpru ini, nte ukwak oro ẹmiade ke hammer. Ntak-a? N̄ko, kere ban̄a emi: ikan̄ ikan̄ ọwọn̄esịt utịn edi ikpehe oro ofiopde akan ndien nte ikpehe ọniọn̄de ọkpọn̄ ọwọn̄esịt emi, ntre ke enye ebịt. Edi ke nnyịn idide idisịm enyọn̄ ikpehe utịn, kpa corona, oro okpụhọde. Corona ofiop akan mme ikpehe eken oro ẹkperede ikan̄ ikan̄ ọwọn̄esịt oro ẹkan. Ntak-a?
N̄ko-n̄ko, ke adan̄aemi—ukem nte isọn̄—utịn asan̄ade akanade, nsio nsio ikpehe ẹsan̄a ẹkanade ye nsio nsio usọp. Ke uwụtn̄kpọ, ikpehe oro odude ke enyọn̄ akanade ọsọp akan mme ikpehe oro ẹdude ke esịt. Ntak-a? Ndien didie ke oro ekeme nditịbe? Ekem mbubịt ikpehe ẹdu. Mme ntọi ntọi ikpehe ẹmi ẹyama ẹnyụn̄ ẹnịme kpukpru ini ke ufan̄ isua 11. Ntak emi mmọ ẹkpụhọde kpukpru ini ke utọ usụn̄ oro?
Okposụkedi ekese n̄kpọ osụk odude ndikpep mban̄a utịn, se nnyịn ima ikọfọfiọk anam nnyịn iwụk enyịn ise Andibot esie, Jehovah, ye uten̄e. Kpukpru ini oro nnyịn ikụtde utịn, ẹti nnyịn ẹte ke “mme heaven ke ẹbụk ubọn̄ Abasi, ikpaenyọn̄ onyụn̄ etịn̄ se ubọk esie anamde.”—Psalm 19:1.