Idọk Eke Ata Ọkwọrọikọ

WILLIAM R. BROWN ekebemiso aka Africa ke 1923. Ye n̄wan ye eyen esie, enye ‘ama anam utom ọkwọrọikọ’ ke Gambia, Ghana, Liberia, Nigeria, ye Sierra Leone. (2 Timothy 4:5) Mbun̄wụm utom esie edi n̄wọrọnda.

Amanaisọn̄ owo West Indies emi ikedịghe andibuana ke mme ufọkederi Christendom ndien ke akpanikọ iketieneke ibuana ke mbre ukara. Utu ke oro, enye ekekpebe Jesus ye mme apostle ke ndikwọrọ enyịn̄ ye itie edikara Jehovah, ọsọn̄ọde etịn̄ nte ufak edide akpan n̄kpọ, onyụn̄ ọkwọrọde eti mbụk Obio Ubọn̄. (Matthew 9:35; 20:28; John 17:4-6) William R. Brown kpukpru ini ekesikama Bible, owụtde enye nte akpatre itie odudu ke mme n̄kpọ ẹban̄ade ukpepn̄kpọ ye mbuọtidem. (2 Timothy 3:16) Enye ama esikọbọ ke ndinam emi kpukpru ini tutu eyedi se ẹdiọn̄ọde enye nte Bible Brown.

Ye edidiọn̄ Jehovah, n̄kpasịp oro Bible Brown ọkọtọde ẹma ẹtịbe ẹnyụn̄ ẹkọri. Mfịn, ke mme idụt oro enye akadade usụn̄, se ikperede ndisịm mbon Africa 200,000 ẹma ẹyak uwem mmọ ẹnọ Andibot mmọ ndien, ekem, ẹkwọrọ eti mbụk Obio Ubọn̄ ẹnọ mbon en̄wen. (Matthew 24:14; 1 Corinth 3:6-9) Ẹdiọn̄ọ mme ifịk ifịk Christian ẹmi ntatara ntatara ke edinam akpanikọ mmọ ye edidi se ẹkemede ndiberi edem. Mmọ ẹkop inemesịt ndidi Mme Ntiense Jehovah ye mme andidu ke idak Christ, kpa Edidem oro akarade.

Utọ idọk oro edi utịp utom ukwọrọikọ eke ata Christian. Ke ẹdọk ukem idọk oro ke ofụri ererimbot ke kpukpru ikpọ ikpehe isọn̄ oro ẹdụn̄de. Ke se iwakde isịm idụt 200, se ibede mme enyene esịt-akpanikọ iren ye iban miliọn inan̄ ke “ẹdọk” ke ẹnyụn̄ ẹtịn̄ ẹfiak ẹtịn̄ ẹnọ mbon en̄wen mme ikọ angel oro edide ọkwọrọikọ ete: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe esie.” (Ediyarade 14:7) Ke akpanikọ, n̄kukụre usụn̄ ndinyene idotenyịn ke ntịme ntịme emana nnyịn emi edi ndiwọn̄ọde mbịne Abasi nnyụn̄ nsụk idem nnọ ukara Obio Ubọn̄ esie.