“N̄wan Uyen Fo”

“EFỊBE etie nte edi n̄kpọ ofụri usen.” Ntre ke ekese mme nta anam-ndụn̄ọde ẹdọhọ, nte ekemde ye Los Angeles Times. Ndi utọ ikọ oro akpa fi idem? Edi, ọkọkudọn̄ọ mbeibuot oro Frank Pittman ọnọ ekikere nte ke n̄kpọ nte mme ebendọ ẹdide mbahade 50 eke ikie ye ibanndọ ọtọn̄ọde ke mbahade 30 eke ikie osịm mbahade 40 eke ikie ikanamke akpanikọ. Ke oro edide akpanikọ, ekpere ndidi mbahade iba ke otu mme ọdọndọ ẹsịn efịbe!

Nte oro ọwọrọ ete ke oburobụt ido enen? Ndomo esisịt! Use nditara nsuana inamke enye enen—kpa nte n̄kọri ke ubiatibet eke efak mînamke ediwo owo enen. Oburobụt ido esinọ unan. Ke uwụtn̄kpọ, ubonowo mfịn ẹbọ unọmọ ẹto udọn̄ọ oro ẹmende ẹto idan̄ nditara nsuana emi kpukpru ẹdide se ẹkemede ndikpan edieke mme owo ẹkpedude eti uwem. AIDS emi edide udọn̄ọ uwot owo ikpedehede idọn̄ n̄kam ntre ke mme owo mîkpefeheke ewọriwọ ke uwem idan̄ mmọ.

Ke ẹsiode oro ẹfep, idem ata mbon ifiọk eyo emi ye “mbon oro ẹnyenede ntatenyịn” ẹsikop ọkpọsọn̄ ubiak ke ini nsan̄andọ mmọ mînamke akpanikọ. Ini kiet oro owo esịnde efịbe ekeme ndinọ unan oro edidade mbahade iba ke otu isua uwem owo ndikọk.

Ata akpan n̄kpọ, nte ededi, edi nte ke unana edida ediomi ndọ ke akpan n̄kpọ edi akwa ediwụt unana ukpono nnọ Abasi, sia enye edide Anditọn̄ọ ndọ. Bible ọdọhọ ete: “Yak kpukpru owo ẹbat ndọ ke n̄kpọ eke ẹkponode.” Ẹdụri nnyịn utọn̄ n̄ko ẹte: “Abasi eyekpe ikpe ye mbon use ye mme esịn efịbe.”—Mme Hebrew 13:4.

Ntem, mbon eti ibuot ẹnam ikọ eke odudu spirit emi: “Dara n̄wan uyen fo.” (Mme N̄ke 5:18) Mmọ ẹyom ndikop uyụhọ ye inemesịt ye nsan̄andọ mmọ. Ke ndinam ntre mmọ ẹkpeme nsọn̄idem eke ikpọkidem ye eke ntụk mmọ, ndien ke edide akpan n̄kpọ akan, mmọ ẹda ukpono ẹsọk akwa Anditọn̄ọ ndọ, kpa Jehovah Abasi.