Uwem—Enọ Otode Abasi

KE HOUR-EDỊP-YE-INAN̄ ke usen, esịt nnyịn esisuan ọsọn̄urua iyịp ọdọn̄ ke ofụri idem nnyịn. Nnyịn ide idap, ndien obufre nnyịn akaiso nditara nnyụn̄ mfụrọ. Nnyịn idia udia, ndien udia oro ataha inikiet inikiet. Kpukpru emi ẹsida itie kpukpru usen, ye esisịt ukeme m̀mê ye unana ukeme ekededi ke n̄kan̄ nnyịn. Mme ndedịbe ye utịbe utịbe edinam ẹmi, emi mmemmem mmemmem ẹsidade ke ekpri n̄kpọ, ẹdi ubak ke otu enọ oro nnyịn ikotde uwem. Ke nditịm ntịn̄ enye edi enọ oro ẹkemede ndikot utịbe.

Kere ban̄a ndutịm aban̄ade uyomo idịbi ye uman. Okposụkedi idem owo esisịnde n̄kpọ oro edide esen, idịbi isisịnke nsen oro ekemede ndiboro eyen. Utu ke ndisịn ọbọn̄eyen oro ọkọride nte esen n̄kpọ, enye esibọk onyụn̄ ekpeme enye tutu enye ekem ini ediwọrọ ndi nte nsekeyen. Ye unana idịbi ndinyene ukeme ndinam akpan ukpụhọde emi ke ibet edisịn esen n̄kpọ, owo ikpekemeke ndiman uman.

Kpa ye oro, uwem obufa nsekeyen ekpedi ibio ibio ke mîkpedịghe n̄kọri oro esidade itie ke idịbi ke ini ọbọn̄eyen edide n̄kpọ nte ọfiọn̄ inan̄ kpọt. Ke ini oro enye esitọn̄ọ ndiwap akpan nnuenubọk esie, anamde mme esịp oro edin̄wamde enye ke ukperedem ndiwap eba eka esie ọsọn̄idem. Ndien emi edi sụk kiet ke otu mme akpan n̄kpọ oro ẹsibierede ke anyanini mbemiso eyen amana.

Ke adan̄aemi ọbọn̄eyen odude ke idịbi, odudu odu ke ibibene esịt esie. Odudu emi, nte ededi, esisịre inikiet inikiet ke ini emana. Adianade do, akamba usan̄a-iyịp oro asan̄ade ebe obufre ke adan̄aemi ọbọn̄eyen odude ke idịbi esifụrọ inikiet inikiet ke ini emana; iyịp kemi ebe aka obufre, ke ebiet emi enye abuahade ye eti ofụm nte nsekeyen ọtọn̄ọde ndikot akpa ibifịk.

Kpukpru emi edi sụk ntọn̄ọ. Ke ofụri eyouwem, udịm udịm ndiye ndutịm (utọ nte mme ndutịm edikot ibifịk, iyịp ndisan̄a n̄kanade, esịp, ye mme ndido usion̄o ndek ke idem) ẹyenam utom ẹnyụn̄ ẹnam ndutịm ẹnọ mme edinam mmọ ke eti usụn̄ oro ayan̄ade owo ifiọk—kpukpru man anam uwem akaiso. Eyịghe idụhe ewetn̄wed eset kiet eketịn̄de aban̄a Abasi ete: “Nyekọm fi, koro nyenede ndyọ ye ndịk; se afo anamde edi utịbe; ukpọn̄ mi onyụn̄ ọfiọk enen.”—Psalm 139:14.

Nte an̄wan̄ade, andiwet mme inem inem ikọ oro ikonịmke ke akpanikọ ite ke uwem edi sụk n̄kpọ otode nnan nnan, mbuari mbuari edito ke unam mforo, m̀mê mbabuat n̄kpọntịbe. Edieke oro ekpedide ntre, nnyịn ikpenyeneke ata isoutom m̀mê mbiomo ekededi ke nte nnyịn ikpadade uwem nnyịn inam n̄kpọ. Nte ededi, ndutịm uwem nte an̄wan̄ade owụt ndudiọn̄, ndien ndudiọn̄ oyom ata ndudiọn̄. Bible owụt edumbet emi: “Kpukpru ufọk enyene andibọp, edi Enyeemi ọkọbọpde kpukpru n̄kpọ edi Abasi.” (Mme Hebrew 3:4) Ke ntre edi akpan n̄kpọ ‘ndifiọk nte ke Jehovah edi Abasi; edi enye akanam nnyịn, idịghe nnyịn ikanam idem nnyịn.’ (Psalm 100:3) Ih, uwem esịne se ikande sụn̄sụn̄ mbabuat n̄kpọntịbe; enye edi enọ otode Abasi ke idemesie.—Psalm 36:9.

Ke edide ntre, nso mbiomo ke nnyịn inyene ke n̄kan̄ Andinọ uwem? Didie ke enye oyom nnyịn ida uwem nnyịn inam n̄kpọ? Ẹyeneme mmọemi ye mme mbụme oro ẹnyenede ebuana ke udiana ibuotikọ.