Mmọ Ẹma Ẹdi Kpa ye Mfịna ye N̄kpọndịk
USENỌFIỌN̄ ekedi January 2, 1992. Ebiet ekedi—Maxixe, ke ikpehe Obio Ukara Inhambane. Ẹma ẹtịmede uyom-okoneyo ke idụt Mozambique ke Africa usọp usọp nte ẹkekpọhọrede radio. Okot mbụk n̄kpọntịbe ama ọtọt ete, “Mme Ntiense Jehovah ke ẹnịm Mbono ‘Mme Ama Ubọhọ-Ufụn’ mmọ ke ikpehe obio ukara nnyịn. Uduak mmọ edi ndikpep mme owo nte ẹkemede ndinyene ata ubọhọ-ufụn ke ererimbot mfịn. Ẹkot kpukpru owo ndibuana.”
Do ke nsannsan inụk Africa oro, n̄kpọ ama otịbe oro editide ke anyanini! Ke akpa ini, ẹma ẹnịm mbono district eke Mme Ntiense Jehovah, ndien owo 1,024 ẹkedu do ndidụk. Ke isua ifan̄ ẹmi ẹkebede, utọ n̄kpọntịbe oro ikpekekemeke nditịbe an̄wan̄wa ntre ke Mozambique, sia utom Mme Ntiense Jehovah okodude ke idak ukpan adan̄aoro. Nte afo akpama ndikop n̄kpọ mban̄a uko uko n̄waidem oro ẹkenamde man ẹdụk mbono emi?
Obio Ukara Inhambane, ukem nte ediwak ikpehe eken ke Africa, eye ata etieti. Ubom ukọiyak ebietde ubom mbon Arab, emi enyenede afara emi edide ọsọbọ-ita esiwat ke inyan̄ emi ke ẹkpọn̄de mbenesụk esie. Isịp mbakara ẹwak mi. Edi n̄kpọndịk ọmọnọmọ obio-in̄wan̄ oro: ekọn̄ mbio obio!
Ye mbon oro ẹdede ke ufọk n̄kanya ke tụhitụhi usenubọk, idịghe esen n̄kpọ ndidemede ke ndap ndap uyom ọtọmbe oro oyomode boom-boom-boom ke mbọhọ obio-in̄wan̄ nte ekọn̄ oro ẹn̄wanade ke akai akarade ofụri okoneyo. Ke ediwak idaha esidi mbio obio oro mîduehe ẹsibọ ufen. Ndusụk ini ẹsikụt nditọn̄wọn̄ ẹfrọde ye ibio ubọk m̀mê ukot. Idem ndusụk ke otu Mme Ntiense Jehovah ẹsinyene unan ke iso ye ke idem ẹto ufen oro mmọ ẹbọde.
Ke utọ idaha ẹmi kpukpru mbon oro ẹkedụkde ẹma ẹdara Mbono “Mme Ama Ubọhọ-Ufụn” ntotụn̄ọ ntotụn̄ọ. Kpa ye ẹkemede ndidịbe ke ikọt mmụm mmọ ke usụn̄ uka mbono oro, ediwak otu ubon ẹtode mme ikpehe obio-in̄wan̄ oro ẹma ẹbiere ndika. Ndisịm do ikedịghe ifụre ifụre n̄ko, sia n̄kpọ ukaisan̄ awakde ndidi ikpọ ana-in̄wan̄ moto mbiomo. Ndusụk ini n̄kpọ nte owo 400 ẹsifaha ke moto mbiomo kiet! Ediwak moto mbiomo ẹmi ẹsisan̄a ke udịm man ẹnam otu mbonisan̄ ẹmi mbonekọn̄ ẹdade isan̄.
Nora ye nditọiban esie mbita, ẹmi ẹdide isua kiet, ita, ye itiokiet ke emana, ẹkedi ubon kiet emi ẹkesịnde uwem mmọ ke itiendịk ke ndinam isan̄ ke utọ usụn̄ emi. Enye ama onịm okụk ke ediwak ọfiọn̄ ke mbemiso man ada aka isan̄ emi. Akpanikọ oro nte ke itieidụn̄ ikodụhe ke itiembono oro ikakpanke enye. Adianade ye ediwak mbon en̄wen, Nora ye ubon esie ẹkesikam ẹtem udia, ẹdia udia, ẹnyụn̄ ede ke an̄wa ke an̄wa itiembono oro.
Uyat uyat ufiop eyo etienede ọkpọsọn̄ edịm ikakam ikemeke ndinịme idara nditọete nnyịn oro n̄kpọ mîkpanke, ẹmi ẹkedụkde usọrọ eke spirit ọtọkiet. Mmọ ẹkekere ke idụhe n̄kpọ ndomokiet oro edide akpan n̄kpọ ọnọ mmimọ akan ndidu ke mbono oro. Owo 17 ẹma ẹyarade uyakidem mmọ ke ufiop ufiop mmọn̄ Indian Ocean. Nte baptism akadade itie, ama edemede idara idara otuowo oro ẹkedade ẹse ndikwọ itoro nnọ Jehovah.
Otu mme andituak ibuot emi ke akpanikọ ẹma ẹkụt se ọwọrọde ndikabade ndi mme ama ubọhọ-ufụn Abasi. Hans, andida ke ibuot mbon oro ẹketode Maputo, ibuot obio ẹdi, ọkọdọhọ ete: “Nnyịn ikam ikụt ntọn̄ọ obufa eyo ke utom Mme Ntiense Jehovah ke ikpehe Africa enyeemi.”