Ikan̄ Edemede Ndutịm Ubọpufọk

“IKAN̄! Ikan̄! Ufọkmbono Mme Ntiense Jehovah ata ikan̄!” Mbabuat mfiori oro akada itie uwemeyo Friday kiet ke October 1989 ke Heerenveen, kpa obio kiet emi odude ke n̄kan̄ edem edere Netherlands.

Mme Ntiense Jehovah ẹma ẹda ediye Ufọkmbono emi ẹnam n̄kpọ ke isua 11. Ekpere ndidi ke kpukpru utịturua, owo ke mme itie ikie ẹsisop idem do edide kaban̄a mbono circuit usen iba m̀mê usen akpan mbono usen-kiet. Enye ekedi ifụre ifụre itie nditie mbọ item Bible.

Mbabuat n̄kpọntịbe ama ada itie ke ini ẹkenamde utom ke ọkọm ufọk emi. Ke minit ifan̄ kpọt, n̄kpọntịbe unana idotenyịn emi ama anam ufọk emi akabade edi n̄wụre oro asakde ikan̄ sụn̄sụn̄. Nte ededi, edi n̄kpọ inemesịt nte ke baba owo kiet ikadaha unan.

Ke ẹkopde mfụhọ ẹban̄a ntakurua oro edi iduọkke idotenyịn, Mme Ntiense Jehovah ẹma ẹnam ndutịm ẹnọ obufa ufọk ke ebiet efen. Mmọ ẹma ẹkụt ebiet emi odotde ke Swifterbant, ke ikpehe ukara obio Flevoland. Emi edi akamba ikpehe isọn̄ emi ẹsiode ke inyan̄ ke akani obotikọt Zuider Zee, emi osụhọrede ke ikpat 16.

Ke January 1991 ẹma ẹnọ ntọt ẹte ẹtọn̄ọ ndibọp obufa Ufọkmbono. Ẹkebọp enye ke ufọt May ye September 1991. Mme Ntiense ke ediwak itie ikie ẹma ẹnọ idem unyịme unyịme ndinam utom ke itie emi, ndien ndusụk n̄kparawa iren ẹma ẹkụt edinam emi nte utọ-ukot ọnọ edinam n̄kpọ Jehovah Abasi ofụri-ini. Ediwak mbonutom ẹma ẹto Belgium ye England ẹdi.

Ẹma ẹbọp ediye ufọk emi ẹtịmde ẹdiọn̄. Usụn̄otop emi ẹdade akrasi ẹdori ọkọm abahade n̄kan̄ oro ẹsitiede ẹkop ikọ ye itieudia. Idem itie mbono emi ekeme ndidụk owo 1,008, ndien owo 230 efen ẹkeme nditie ke ufọk emi odude ekpere nse edinam ke television.

Mfịn, ediwak tọsịn owo ke ẹdọhọ: ‘Ẹdi, nnyịn idọk ke obot Jehovah, ndien enye eyekpep nnyịn ido esiemmọ.’ (Isaiah 2:2, 3) Obufa Ufọkmbono emi edi kiet ke otu ediwak itie ẹmi ẹnọde utọ ukpep eke spirit emi. Ufọkmbono Obio Ubọn̄ Mme Ntiense Jehovah eke n̄kann̄kụk edi ebiet efen. Afo eyekụt ẹdarade fi ufiop ufiop do.