Ndidat Esịt ke Soviet Union

EKPRI eyenan̄wan emi ke Lvov enyene ntak ndidat esịt. Enye edi kiet ke otu owo 74,252 ẹmi ẹkesopde idem ifụre ifụre ke Soviet Union man ẹdụk mbono Christian ẹnyụn̄ ẹbọ ke usem Russia obufa ediye n̄wed emi Akakan Owo Oro Akanam Odude Uwem. Okposụkedi akananam owo mîkenyịmeke Mme Ntiense Jehovah ẹnịm mme mbono ke Soviet Union, mmọ ẹma ẹnịm itiaba ke ndaeyo isua oko.

Kiet ke otu mme obio mbono oro ekedi Alma-Ata, Kazakhstan, emi mme odụk mbono n̄ko ẹketode mme idụt ukara Soviet eke Russia, Uzbekistan, Kirghizia, Tadzhikistan, ye Turkmenistan ẹdi. Se iwakde ibe owo 6,000 ẹma ẹdat esịt ndibọ obufa n̄wed emi ke Alma-Ata. Ke ini mme owo ẹwakde ẹbe 4,000 ẹmi ẹkedụkde ke Usolye-Sibirskoye, Siberia, ẹkebọde kiet kiet ke mfọn ke idemowo, akamautom an̄wambre oro ama ofiori ete: “Emi edi utịben̄kpọ!”

Ke Kiev, ke ini ediwak mme borisi ye mme anamutom unịmeikan̄ ẹkekụtde n̄wed oro, mmọ ẹma ẹben̄e ẹte ẹnọ mmimọ idem kiet, ẹdọhọde ẹte: “Idem n̄kpọ, n̄kọm nnyịn ikekpeme mbufo; nnyịn ikodu ye mbufo ke mbono.” Akwaowo borisi ama oyom ndifiọk, “Ẹkewet enye ke m̀mọ̀n̄? Idem ifan̄ ke ẹmịn̄?”

Kan̄a kemi, ẹmemịn̄ se iwakde ibe miliọn 12 ke n̄kpọ nte usem 60, esịnede utọ mbon oro mme andisem mmọ mîwakke nte Bislama, Efịk, Ewe, Ga, Igbo, Rarotongan, Sepedi, Shona, Tsonga, Tswana, Twi, ye Venda.

Ediwak miliọn owo ke ofụri ererimbot ke ẹdat esịt ndikot obufa ediye n̄wed emi enyenede page-448 mi, oro aban̄ade uwem ye utom Jesus Christ. Edieke afo edimade ndinyene n̄kaiso ntọt mban̄a Jesus ye idaha esie ke ndisu uduak Abasi kaban̄a isọn̄, mbọk wet n̄wed nọ ẹsọk Watch Tower, P.M.B. 1090, Benin City, Edo State, mîdịghe nọ ẹsọk nnennen adres oro odude ke page 2.