Mbon Gibeon—Mmọ Ẹma Ẹyom Emem

ẸDIỌN̄Ọ obio ibuot obot emi odude ke enyọn̄ emi nte odude ke ebiet emi Gibeon eset akadade, emi odude ke n̄kpọ nte itiat 6 ke n̄kan̄ edem edere Jerusalem.

Ekeme ndidi afo ọmọdiọn̄ọ nte ke Gibeon ekedinyene uwọrọiso ndondo oro Joshua ama akada Israel odụk Isọn̄ Un̄wọn̄ọ onyụn̄ akan Jericho. Mbon Canaan ẹtode Gibeon ẹma ẹkụt ẹte ke mmimọ idikemeke ndin̄wana ye Israel, emi nte an̄wan̄ade ekenyenede ibetedem Abasi. Nso ke ẹkpenam? Ke ẹdade n̄kari n̄kari usụn̄, mbon Gibeon ẹma ẹdọn̄ isụn̄utom ẹmi ẹkewụtde idem nte mbonisan̄ ẹmi ẹtode anyan ebiet. Ukeme emi mmọ ẹkesịnde ke ndiyom emem ama okụt unen, koro Israel ama anam ediomi ye mmọ. Ke ini ẹkeyararede n̄kari mmọ, mbon Gibeon ẹma ẹkabade ẹdi mme asiak-ifia ye mme okoi-mmọn̄.

Anaedi Abasi ikayatke esịt ye mbon ẹmi ẹkeyomde emem mi. Enye ama ọnọ Joshua ibetedem ndinyan̄a mbon Gibeon ẹmi ke ini ndidem ition ẹkedide ekọn̄ ye mmọ. Jehovah ama akam anam utịben̄kpọ ke ndinam utịn ada ebịghi kaban̄a ekọn̄ oro.—Joshua 9:3-27; 10:1-14.

Mme ọdọkisọn̄ ẹma ẹkụt editụn̄ọ ukpe, m̀mê obube mmọn̄, oro ẹketụn̄de ke itiat ke ibombom emi. Mbon Gibeon ẹma ẹkeme ndisụhọde ke udịghi-ukot ndụk editụn̄ọ ukpe emi nnyụn̄ n̄kokoi mmọn̄ ke ubet esịtisọn̄. Nte ekeme ndidi emi edi “n̄kpọdiọhọ mmọn̄ Gibeon” emi ẹtịn̄de ẹban̄a ke 2 Samuel 2:13? Mme ọdọkisọn̄ nyom n̄kpọeset n̄ko ẹma ẹkụt ubet udọn̄ n̄kpọ idakisọn̄ emi ẹketụn̄de ke itiat ye ata ediwak n̄kpọ unam wine. Ih, etie nte Gibeon ekedi iwụk ebiet unam wine.

Ke eyo David ataya, m̀mê itie utuakibuot, Abasi akpanikọ okowụhọ mi. Edi mi ke Edidem Solomon ekesidi ediwa mme uwa. Jehovah ama owụt Solomon idem ke ndap onyụn̄ ọn̄wọn̄ọ “esịt ifiọk ye ọniọn̄” ọnọ enye, ọkọrọ ye inyene. (1 Ndidem 3:4-14; 2 Chronicles 1:3) Ibuotikọ oro odude ke page 12-17 eke nsiondi emi owụt nte ke ẹma ẹnọ mme andito ubon mme owo oro ẹkedụn̄de mi ke Gibeon akpan ifetutom ke otu ikọt Abasi nte ini akakade. Nte afo ọmọfiọk ntak?

[Ebiet Ẹdade Ndise Ẹto ke page 32]

Pictorial Archive (Near Eastern History) Est.