Nnyịn Imoyom Owo Eke Akpan̄de Utọn̄
NTE mme owo, nnyịn imesidomo ndikụt idatesịt ye uyụhọ ke uwem. Edi ke ini mme ọkpọkpọ mfịna ẹdemerede, edi n̄kpọ un̄wam ye ndọn̄esịt didie ntem ndikụt owo emi ikemede ndineme mme mfịna nnyịn nnọ!
Dr. George S. Stevenson ọdọhọ ete: “Ndineme ofụri n̄kpọ esin̄wam ndifịghede fi mfịghe, esin̄wam fi ndikụt mfịna fo ke ata in̄wan̄în̄wan̄ usụn̄, ekese ini esin̄wam fi ndikụt se afo ekemede ndinam mban̄a enye.” Dr. Rose Hilferding ọkọdọhọ ete: “Kpukpru nnyịn inyene ndibuana mme mfịna nnyịn. Nnyịn inyene ndibuana ntịmede esịt. Nnyịn inyene ndinyene ke ekikere nte ke owo odu ke ererimbot oro onyịmede ndikpan̄ utọn̄ onyụn̄ ekemede ndifiọk.”
Ke akpanikọ, owo baba kiet ikemeke ndiyụhọ udọn̄ emi ọyọhọ ọyọhọ. Ke ntak emi ini ye mme n̄kpọ eken ẹnyenede-nyene adan̄a, mme owo ẹmi nnyịn ibuọtde idem ẹkeme nditre ndidu ke ini emi nnyịn itịmde iyom mmọ, mîdịghe nnyịn imekeme ndimen̄e ndineme ndusụk n̄kpọ ye idem mme n̄kpere n̄kan ufan nnyịn.
Mme Christian akpanikọ, nte ededi, akanam inanake owo eke akpan̄de utọn̄ ọnọ mmọ ofụri ofụri, koro usụn̄ ubọn̄ akam esidu kpukpru ini. Bible esịn udọn̄ ọnọ nnyịn kpukpru ini ndibọn̄ akam nnọ Abasi, kpa Andibot nnyịn, emi enyịn̄ esie edide Jehovah. Ẹteme nnyịn ẹte ibọn̄ akam ke ofụri esịt, ke enyịn̄ Jesus, ye ke n̄kemuyo ye uduak Abasi. Idem mme ọkpọkpọ n̄kpọ ye mme ndịben̄kpọ idemowo ẹdi nnennen n̄kpọ ndibọn̄ akam mban̄a. Ẹsian nnyịn ke N̄wed Mbon Philippi 4:6 ẹte, “Ke kpukpru n̄kpọ . . . ẹsian Abasi se mbufo ẹyomde.” Nso n̄wọrọnda enọ ke emi edi ntem! Akakan Andikara ekondo nnyịn eben̄e idem kpukpru ini ndidara nnyụn̄ n̄kop akam mme osụhọdeidem asan̄autom esie ke ini ekededi oro mmọ ẹyomde ndika mbịne enye.—Psalm 83:18; Matthew 6:9-15; John 14:13, 14; 1 John 5:14.
Edi, nte Abasi esinen̄ede akpan̄ utọn̄? Ndusụk owo ẹkeme ndiyịk m̀mê se akam ekemede ndinam etre ke ebiet emi ukeme owo etrede: Owo ọbọn̄ akam, otịm mme ekikere esie ke adiana ke adiana onyụn̄ etịn̄ mmọ ke ikọ. Ke ama eketịn̄ mfịna esie ntem, enye oyom usọbọ oro odotde onyụn̄ odu ke edidemede aban̄a kpukpru n̄kpọ oro ẹkemede nditịp n̄kpọ nsịn ke ndikụt enye. Ke ini ẹkọkde mfịna esie, enye ekeme nditoro Abasi, edi ke akpanikọ ekedi esịt ye mme ukeme esie ẹkesion̄o nti utịp oro ẹdi.
Ediwak owo mfịn ẹkere ẹte ke edimen esịt ye mme ukeme owo mbuan ke mfịna edi ofụri se inen̄erede ibuana ke akam. Nte afo ekere ntre? Nte odudu akam ekpri ntre? Ih, mme ukeme owo ke n̄kan̄ ekikere ye ke ikpọkidem ndidu ke n̄kemuyo ye mme akam esie ẹnyene akpan udeme ke edibọ mme ibọrọ. Nte ededi, nso kaban̄a udeme Abasi ke n̄kpọ emi? Nte Abasi esikpan̄ utọn̄ ke ini afo ọbọn̄de akam ọnọ enye? Nte enye abat mme akam fo ke akpan n̄kpọ, ekerede aban̄a se mmọ ẹsịnede onyụn̄ ọbọrọde mmọ?
Mme ibọrọ ke mme mbụme ẹmi ẹdi akpan n̄kpọ. Edieke Abasi mîbiọn̄ke utọn̄ ke mme akam nnyịn, do akam iwọrọke n̄kpọ ikan ekikere esịt. Ke n̄kan̄ eken, edieke edide Abasi esikop onyụn̄ akpan utọn̄ ye udọn̄ ke kpukpru akam nnyịn, nnyịn ikpowụt esịtekọm didie ntem iban̄a utọ ndutịm oro! Emi ekpenyene ndinụk nnyịn ndida ndutịm oro nnam n̄kpọ kpukpru usen.
Nnyịn imeben̄e fi, ndien, ndikaiso n̄kot, nte ẹnemede mme n̄kpọ ẹmi ke ibuotikọ emi etienede.