Utom Edinọ Un̄wam Aka Ukraine
INI kiet efen ndiọi mbụk amasuana ke mme ufọkutom usuanetop. Ọkpọsọn̄ ndutịme ke ndutịm uforo, unana udia, ye biọn̄ ke ẹnọmọ isọn̄—isan̄ enyeemi ke mme ikpehe oro ke akpa ekedide Soviet Union. Otu Ukara eke Mme Ntiense Jehovah ke ndondo emi ama ọdọhọ yak ọfis n̄kọk itieutom Watch Tower Society ke Denmark anam ndutịm aban̄a un̄wam oro ẹdinọde Mme Ntiense ẹmi ẹdude ke unana ke Ukraine. Nso ke nditọete ke Denmark ẹkenam?
Mmọ ẹma ẹtọn̄ọ utom kpa ke ndondo oro! Ọfis n̄kọk itieutom ama ọsọsọp osio nditọete ọdọn̄ urua man ẹkeyom mfọnn̄kan n̄kpọ udia oro ẹdidepde. Ẹma ẹnọ etop ẹsọk kpukpru esop ikọt Jehovah ke Denmark, ẹnamde mmọ ẹfiọk ẹban̄a unana emi. N̄kọk itieutom oro ọtọt ete: “Kpukpru esop ẹma ẹnen̄ede ẹnyịme nditịp n̄kpọ nsịn. Ke akpatre, nnyịn ima ikeme ndinọ ata uyarade esịtmbọm oro nnyịn ikenyenede iban̄a mbon oro ẹbọde ufen mi.” Ikpọ moto mbiomo ition adianade ye bọs iba ye mme andiwat ẹmi ẹdide owo 14 ẹmi ẹnọde idemmọ unyịme unyịme ẹma ẹkebehe ke n̄kọk itieutom Denmark ke Saturday, December 7, 1991. Mbonutom n̄kọk itieutom oro ẹma ẹdọn̄ udia ẹmi mmọ ẹkedepde ẹyọhọ moto mbiomo ẹmi.
Ke uwemeyo Monday, December 9, mbonisan̄ ẹmi ẹma ẹtọn̄ọ anyan isan̄ oro ẹbede ke Europe ẹka Ukraine. N̄kọk itieutom oro ewet ete, “Ekedi edinam oro otụkde owo esịt nte ofụri mbonufọk Bethel ẹkebohode ọtọkiet ẹfụn̄ mmọ ubọk ẹdọhọ ẹka ẹdi-o. Ke ifiọkde ite ke ediwak mbonutom unọ un̄wam ẹsisobo unọmọ ke usụn̄, nnyịn ima ida akam isan̄a ye nditọete nnyịn oro ke ofụri usụn̄isan̄ oro.”
Ke December 18 oyomonsia ama etre. N̄kọk itieutom Denmark ama ọbọ etop nte ke mbonisan̄ oro ẹma ẹdibehe ke Lviv, Ukraine, ke ifụre. Nditọete ke Ukraine ẹma ẹbọ un̄wam oro. Ekedi n̄kpọ nsụkesịt didie ntem ndision̄o ikpọ ekwo 1,100, ẹmi ẹdobide ke pound-44—kiet kiet esịnede unam, ndomuyo, edesi, sugar, ye udia eken! Ke ofụri ofụri, mbonisan̄ oro ẹkenọ udia ẹdobide ke tọn 22. N̄kọk itieutom Denmark ewet ete: “Idatesịt nnyịn okpon, nte nnyịn ikọmde Jehovah ke ukpeme esie ye ke enye ndinọ nnyịn ifet emi man inọ un̄wam.”
Ke ẹnam ndutịm n̄ko ndinọ ọfọn̄ aka. N̄kọk itieutom oro ọtọt ete ke afan̄ emi n̄ko, “nte mme esop ẹnamde n̄kpọ, inua ikemeke nditịn̄.” Jehovah ke akpanikọ ‘omofori ikọt esie kaban̄a kpukpru orụk ntatubọk.’ (2 Corinth 9:11) Mmọ, ke n̄kan̄ eken, ẹnyene ntotụn̄ọ idatesịt oro otode edinọ nditọete mmọ iren ye iban n̄kpọ ke mfọn. Ima oro mmọ ke ntre ẹwụtde edi n̄kpọ oro ẹdade ẹdiọn̄ọ mme anditiene Jesus. (John 13:35) Utọ ima oro anana ata etieti ke ererimbot unana emi.