Ntọt M’ọkwọrọ Obio Ubọn̄
Jehovah Ọnọ Uyen Oro Anamde Akpanikọ Utịp
MME uyen oro ẹnamde akpanikọ ẹdi ata ọsọn̄urua n̄kpọ ke enyịn Jehovah. Ifiọk n̄kpọntịbe oro etienede mi, emi aban̄ade akparawa eren emi anamde akpanikọ ekpenyene ndisịn udọn̄ nnọ mme uyen eken ndimụm nsọn̄ọnda mmọ n̄kama nte mmọ ẹnamde n̄kpọ Jehovah.
Ke Argentina eyeneren isua 11 ye ekpri eyeneka esie eren ẹma ẹsikpep n̄wed Akpanikö oro Adade osim Nsinsi Uwem ye ekaeka mmọ. Ibịghike, ete ye eka nditọiren ẹmi ẹma ẹtọn̄ọ ubiọn̄ọ, ẹnyụn̄ ẹwụk nditọiren ẹmi ẹte ẹkûka mme mbonoesop ke Ufọkmbono Obio Ubọn̄. Ke ndusụk ini, man ẹdụk mme mbonoesop, nditọ oro ẹma ẹsisan̄a window ufọk uyere-mmọn̄ ẹwọrọ, ẹfrọ ẹduọ ke esịt ebiet mbọhọidụn̄ mmọ, ẹnyụn̄ ẹto do ẹka Ufọkmbono Obio Ubọn̄. Ekem owo ama editịn̄ ọnọ eka mmọ nte ke mmọ ke ẹsidụk mbonoesop Mme Ntiense Jehovah. Eka mmọ ama esịn mmọ ndịk ke idem ete ke imọ iyemia mmọ, ndien emi ama esịn ekpri eyeneren oro ndịk ke idem, emi eketrede ndikpep n̄kpọ. Edi akamba eyeneren ama osụk akaiso. Ke isua ition enye ama esin̄wana odụk mme mbonoesop ye unana ete ye eka ndidiọn̄ọ.
Ke ini enye ọkọsọn̄de ke isua 16, enye ama oyom ndikpep n̄kpọ oro owo mîsikpepke ke akamba ufọkn̄wed obio esie. Ndikpọn̄ ufọk eyenọ enye akwa ifụre ndikpep akpanikọ. Ete ye eka esie ẹma ẹnyịme enye aka, ndien ke ufan̄ ọfiọn̄ ita n̄kpọ ẹma ẹbono nte ọfọnde. Ekem etubom ufọkn̄wed ama ọtọt ete ye eka esie ete ke eyen mmọ isinyịmeke ndikọm ọfọn̄ etakubom m̀mê ndikwọ ikwọ ufreidụt. Ke iso etubom ufọkn̄wed, ete ye eka esie, ewetn̄wed ufọkn̄wed, lọya, ye ikpọ mme andikpep duop, akparawa emi ama ekeme ndinọ eti ikọ ntiense kaban̄a ntak emi enye nte ekemde ye ubieresịt esie mîkemeke ndinam mme edinam ẹmi. (Exodus 20:4, 5) Ete ye eka esie ẹma ẹfụt esịt. Eka esie ama ọbọ ikan̄, aduakde nditop ekaeka esie, emi enye ekekerede nte edide ntak. Edi enye ikekemeke ndikụt enye odude ikpọn̄.
Ekem, ke etienede ekikere oro ubon mmọ ọkọnọde ye unyịme etubom ufọkn̄wed, ete ye eka ẹma ẹbiere ndisịn akparawa emi ke ufọk mbon udọn̄ọ mbeibuot, ẹkerede ẹte ke edinọ enye usọbọ mbon udọn̄ọ mbeibuot eyenam enye akan̄ mbuọtidem esie. Anamutom ufọkibọk ama esimen eyeneren emi ke moto awat aka ebiet oyomde usụn̄ ke itiat 60 onyụn̄ okịm enye mmọn̄ibọk insulin ye n̄kpọsọn̄ ibọk eken tutu enye idiọn̄ọke idem aba. Ke edemerede, enye ikọdiọn̄ọke baba n̄kpọ kiet, idiọn̄ọke owo ndomokiet aba, onyụn̄ etie ndisịme ndisịme. Ke ẹma ẹkenam ekese ndụn̄ọde dọkta oro ikekwe mfịna mbeibuot ndomokiet ke idem esie. Edi ufọkibọk oro ama akaiso ndinọ usọbọ. Ke ini afiakde ọdiọn̄ọ idem, eyen emi ama ọbọn̄ akam ndien ndien ọnọ Jehovah ete okûkpọn̄ imọ onyụn̄ eben̄e enye ete ọnọ imọ odudu ndiyọ. Jehovah ama ekpeme enye, ndien ke akpatre ẹma ẹsio enye ke ufọkibọk oro.
Ini kiet etubom ufọkn̄wed ama obụp akparawa emi m̀mê enye eben̄e idem ndikan̄ mbuọtidem esie. Ke ini enye ọkọbọrọde ete ke imọ ikan̄ke, etubom oro ama ọdọhọ ete ye eka ẹfiak ẹmen enye ẹka ufọkibọk koro enye ama adama idat akan nte akanam adamade. Ete ye eka ẹma ẹmen enye ẹkenịm ke ufọkidụn̄ nditọ ufọkn̄wed, ẹnyụn̄ ẹwụk n̄wan enyene ufọk oro ẹte okûyak enye aka mbonoesop Mme Ntiense Jehovah. Ke ete ye eka ẹma ẹkenyọn̄, nso n̄kpọ n̄kpaidem ke ekedi ntem! Mme enyene ufọkidụn̄ nditọ ufọkn̄wed oro ẹkedi Mme Ntiense Jehovah! Ke akpatre ete ye eka ẹma ẹtre enye ndibọ usọbọ udọn̄ọ mbon mbeibuot, ẹnịmde ke akpanikọ ẹte ke mme dọkta ẹkebabian̄a mmimọ. Kan̄a kemi, Akwa Esopikpe eke Argentina ama ebiere ete ke owo inyeneke ndibịn nditọ Mme Ntiense Jehovah mfep ke ufọkn̄wed ke ntak oro mmọ mîkọmke ọfọn̄ etakubom.
Nte idomo ẹmi ẹma ẹnyene ufọn ẹnọ anam-akpanikọ uyen emi? Ih. Enye ọdọhọ ete: “Ami mma n̄keme ndinọ mme dọkta, mme andikpep, nsan̄a nditọ ufọkn̄wed, ete ye eka mi, ye mme iman, idem, ofụri obio ntatara ikọ ntiense. Ete ye eka mi ẹma ẹkpụhọde edu ẹnyụn̄ ẹnyene nnennen ekikere ẹban̄a Mme Ntiense. Idahaemi, ke mfiakde nse isua uyen mi, mmokụt nte Abasi edide utịbe onyụn̄ enyenede ima ke ndise mban̄a owo emi ọsọn̄ọde ada anam akpanikọ ọnọ enye. Emi etie ukem ukem nte se andiwet Psalm eketịn̄de ke Psalm 27:10 ete: ‘Koro ete mi ye eka mi ẹkekpọn̄de mi, ndien Jehovah emen mi akama.’”
Akparawa emi edi isua 23 ke emana idahaemi, ọmọdọ ndọ, onyụn̄ esịn ifịk etieti ke utom Jehovah. Ke akpanikọ, odudu Jehovah oro omụmde owo akama inyeneke adan̄a.—Psalm 55:22.